◊ໃນລະຫວ່າງ ວັນທີ 26-27 ພຶດສະພາ 2022 ນີ້, ທີ່ຫ້ອງປະຊຸມສະພາປະຊາຊົນ ແຂວງຫົວພັນ ໄດ້ຈັດກອງປະຊຸມ ທາບທາມ ຮ່າງກົດໝາຍ 9 ສະບັບ ໂດຍການເປັນປະທານຂອງທ່ານ ຄອນປະພັນ ເລືອງສີຈັນທອງ ຄະນະປະຈຳພັກແຂວງ, ຮອງປະທານສະພາປະຊາຊົນ ແຂວງຫົວພັນ; ມີບັນດາທ່ານຄະນະປະຈຳ ສະພາປະຊາຊົນແຂວງ; ສະມາຊິກສະພາແຫ່ງຊາດປະຈະເຂດເລືອກຕັ້ງທີ 8, ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງ, ຄະນະກຳມະການ, ຄະນະເລຂາທິການ ສະພາປະຊາຊົນແຂວງ , ຫົວໜ້າ, ຮອງຫົວໜ້າພະແນກການ, ອົງການທຽບເທົ່າ ທີ່ກ່ຽວຂ້ອງ ເຂົ້າຮ່ວມ.
#ກອງປະຊຸມດັ່ງກ່າວ, ໄດ້ນຳເອົາຮ່າງກົດໝາຍ 9 ສະບັບ ຄື: ຮ່າງກົດໝາຍວ່າດ້ວຍ ສານປະຊາຊົນ; ກົດໝາຍວ່າດ້ວຍ ນ້ຳ ແລະ ຊັບພະຍາກອນນ້ຳ; ກົດໝາຍວ່າດ່ວຍ ການຄຸ້ມຄອງ ເງິນຕາຕ່າງປະເທດ; ກົດໝາຍວ່າດ້ວຍ ການຄຸ້ມຄອງອາວຸດ ແລະ ວັດຖຸລະເບີດ; ກົດໝາຍວ່າດ້ວຍ ການສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ; ກົດໝາຍວ່າດ້ວຍ ຊັບສິນຂອງລັດ; ກົດໝາຍວ່າດ້ວຍຄວາມປອດໄພຂອງເຂື່ອນ; ກົດໝາຍວ່າດ້ວຍ ວິຈິດສິນ ແລະ ກົດໝາຍວ່າດ້ວຍການແກ້ໄຂຄຳຮ້ອງທຸກ. ໃນການດຳເນີນກອງປະຊຸມທາບທາມຮ່າງກົດໝາຍ ປະທານກອງປະຊຸມ ໄດ້ມີຄຳເຫັນເຈາະຈີ້ມບາງບັນຫາ ແລະ ຜູ້ແແທນກອງປະຊຸມໄດ້ພ້ອມກັນ ປະກອບຄຳຄິດ, ຄຳເຫັນໃສ່ ບັນດາຮ່າງກົດໝາຍດັ່ງກ່າວ ຢ່າງກົງໄປກົງມາ ໂດຍສະເພາະ ໄດ້ສຸມໃສ່ບາງໝວດ, ບາງມາດຕາ ທີ່ເຫັນວ່າຍັງບໍ່ທັນສອດຄ່ອງ ເໝາະສົມກັບສະພາບຄວາມເປັນຈິງ.
#ຕອນທ້າຍ ປະທານກອງປະຊຸມ ໄດ້ສະແດງຄວາມຍ້ອງຍໍຊົມເຊີຍຕໍ່ ຜູ້ແທນທີ່ເຂົ້າຮ່ວມກອງປະຊຸມ ທີ່ມີຄວາມເອົາໃຈໃສ່ ຄົ້ນຄວ້າປະກອບຄຳຄິດຄຳເຫັນໃສ່ເນື້ອໃນ 9 ຮ່າງກົດໝາຍ ຈະນຳເອົາຄຳ, ຄິດເຫັນ ຂອງບັນດາທ່ານ ນຳໄປຄົ້ນຄວ້າ-ສັງລວມ ສົ່ງໃຫ້ສະພາແຫ່ງຊາດປັບປຸງ, ນຳເຂົ້າຜ່ານ ກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ lX ທີ່ຈະເປີດຂື້ນໃນມໍ່ໆນີ້ ໃຫ້ມີເນື້ອໃນຄົບຖ້ວນ, ສົມບູນ ແລະ ສ່ອດຄ່ອງກັບຊີວິດຕົວຈິງໃນສັງຄົມ.

(ພາບ ແລະ ຂ່າວ ໂດຍ ນາງ ປຸ້ຍນິຕາ ເພັງມີໄຊ)