(ສພຊ) ຕອນເຊົ້າວັນທີ 11 ກຸມພາ 2020 ທີ່ຫ້ອງປະຊຸມໃຫຍ່ສະພາແຫ່ງຊາດ (ສພຊ) ນະຄອນຫລວງວຽງຈັນ, ສະພາແຫ່ງຊາດ ໄດ້ຈັດກອງປະຊຸມສະຫລຸບວຽກງານພາຍໃນ ແລະ ຍ້ອງຍໍກົມກອງລວມໝູ່, ການນໍາ ແລະ ພະນັກງານ-ລັດຖະກອນ ພາຍໃນສະພາແຫ່ງຊາດປະຈໍາປີ 2019 ໂດຍການເປັນປະທານຂອງທ່ານ ນາງ ປານີ ຢາທໍ່ຕູ້ ປະທານ ສພຊ, ມີບັນດາທ່ານຮອງປະທານ ສພຊ, ປະທານ-ຮອງປະທານກໍາມາທິການ, ຫົວໜ້າ-ຮອງຫົວໜ້າສະຖາບັນ, ຄະນະຮັບຜິດຊອບວຽກງານເຂດເລືອກຕັ້ງ, ຄະນະສະມາຊິກສະພາແຫ່ງຊາດເພດຍິງ, ຫົວໜ້າ-ຮອງຫົວໜ້າກົມ, ສູນ, ຫົວໜ້າ-ຮອງຫົວໜ້າພະແນກ ຕະຫລອດຮອດພະນັກງານວິຊາການພາຍໃນ ສພຊ ເຂົ້າຮ່ວມ.
ຈຸດປະສົງຂອງການຈັດກອງປະຊຸມໃນຄັ້ງນີ້ ເພື່ອເປັນການສະຫລຸບຕີລາຄາການຈັດຕັ້ງປະຕິບັດວຽກງານພາຍໃນ ສພຊ ໃນໄລຍະ 1 ປີຜ່ານມາ ແລະ ທິດທາງແຜນການຕໍ່ໜ້າ; ສະຫລຸບຕີລາຄາຂະບວນການແຂ່ງຂັນຮັກຊາດ ແລະ ພັດທະນາ ໃນໄລຍະໜຶ່ງປີຜ່ານມາ ແລະ ທິດທາງແຜນການປະຈໍາປີ 2020; ຍ້ອງຍໍຜົນງານໃຫ້ແກ່ພະນັກງານ-ລັດຖະກອນ ພາຍໃນສະພາແຫ່ງຊາດ (ກົມກອງ ແລະ ບຸກຄົນ) ແລະ ເພື່ອເຮັດໃຫ້ຜົນການປະເມີນສາມາດນໍາເຂົ້າໃນວຽກງານພັດທະນາ ແລະ ວຽກງານຄຸ້ມຄອງພະນັກງານ-ລັດຖະກອນໃຫ້ສອດຄ່ອງກັບເງື່ອນໄຂຄວາມຕ້ອງການຂອງ ສພຊ ໃນໄລຍະໃໝ່ ຢ່າງເປັນປົກກະຕິ.
ກອງປະຊຸມໄດ້ຮັບຟັງການຜ່ານບົດສະຫລຸບການເຄື່ອນໄຫວວຽກງານພາຍໃນສະພາແຫ່ງຊາດ ແລະ ຂະບວນການແຂ່ງຂັນ ຮັກຊາດ ແລະ ພັດທະນາ ຢູ່ພາຍໃນ ສພຊ ປະຈໍາປີ 2019 ແລະ ທິດທາງແຜນການ ປະຈໍາປີ 2020; ການຢັ້ງຢືນການຈັດຕັ້ງຂະບວນການແຂ່ງຂັນ ຮັກຊາດ ແລະ ພັດທະນາ ຢູ່ພາຍໃນ ສພຊ ປະຈໍາປີ 2020 ຈາກຕາງໜ້າບັນດາກໍາມາທິການ, ຄະນະເລຂາທິການ, ກົງຈັກທີ່ສະພາແຫ່ງຊາດສ້າງຕັ້ງ ແລະ ຜ່ານມະຕິຂອງຄະນະປະຈໍາສະພາແຫ່ງຊາດ ແລະ ຂໍ້ຕົກລົງຂອງຄະນະເລຂາທິການສະພາແຫ່ງຊາດ ວ່າດ້ວຍການຍ້ອງຍໍຜົນງານຂອງກົມກອງ ແລະ ບຸກຄົນ ພາຍໃນສະພາແຫ່ງຊາດ ປະຈໍາປີ 2019 ພ້ອມທັງມອບໃບຍ້ອງຍໍຂອງຄະນະປະຈໍາສະພາແຫ່ງຊາດໃຫ້ແກ່ບຸກຄົນ (ການນໍາຂັ້ນສູງ, ຂັ້ນກົມ-ວິຊາການ) ຂອງ ສພຊ ແລະ ມອບໃບຍ້ອງຍໍ ແລະ ໃບຊົມເຊີຍຂອງຄະນະເລຂາທິການສະພາແຫ່ງຊາດໃຫ້ກົມກອງ ແລະ ບຸກຄົນ (ຂັ້ນກົມ-ວິຊາການ) ຂອງ ສພຊ.
ໂອກາດດັ່ງກ່າວ ທ່ານປະທານ ສພຊ ໄດ້ມີຄໍາເຫັນໂອ້ລົມຕໍ່ກອງປະຊຸມ ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ການຈັດຕັ້ງປະຕິບັດວຽກງານໃນໄລຍະຜ່ານມາ ທີ່ສາມາດຍາດໄດ້ຜົນງານພົ້ນເດັ່ນຫລາຍດ້ານ ສະແດງອອກໃນຂະບວນການຍ້ອງຍໍ ເຊິ່ງຈະໄດ້ສະຫລຸບຖອດຖອນບົດຮຽນຂະບວນການດັ່ງກ່າວ ເພື່ອໃຫ້ແທດຕົວຈິງ ສາມາດສ້າງໄດ້ກຳລັງແຮງບຸກຄະລາກອນດີເດັ່ນເພີ່ມຂຶ້ນ. ການດຳເນີນຜົນຕໍ່ການປະຕິບັດໜ້າທີ່ຮັບຜິດຊອບຂອງສະມາຊິກພັກໃນແຕ່ລະຂັ້ນ ໄດ້ເອົາໃຈໃສ່ຊີ້ນໍາ-ນໍາພາໃກ້ຊິດ, ເພີ່ມທະວີຄວາມສາມັກຄີພາຍໃນ, ຂະບວນການປັບປຸງແບບແຜນວິທີເຮັດວຽກ, ຍົກລະດັບຂີດຄວາມສາມາດຂອງພະນັກງານ-ລັດຖະກອນ. ປີ 2020 ເປັນປີມ້ວນທ້າຍຂອງການຜັນຂະຫຍາຍມະຕິ 10 ຂອງພັກໃນການພັດທະນາເສດຖະກິດ-ສັງຄົມ ແຜນພັດທະນາເສດຖະກິດ 5 ປີ ຂອງລັດ ກໍຄືແຜນ 5 ປີ ຂອງການເຄື່ອນໄຫວວຽກງານຂອງສະພາແຫ່ງຊາດ. ພ້ອມນັ້ນ, ທ່ານຍັງໄດ້ສະເໜີໃຫ້ບັນດາການນໍາແຕ່ລະຂັ້ນໃຫ້ເປີດກວ້າງການແຂ່ງຂັນ ຮັກຊາດ ແລະ ພັດທະນາ ໃຫ້ເຂົ້າສູ່ລວງເລິກ, ມີຄຸນນະພາບ, ຊີ້ນໍານໍາພາບັນດາພະນັກງານ-ລັດຖະກອນພາຍໃນກົມກອງຂອງຕົນໃຫ້ໄດ້ຮັບການເສີມຂະຫຍາຍຢ່າງກວ້າງຂວາງ ມີຈຸດສຸມກວ່າເກົ່າໃນການແຂ່ງຂັນ ຮັກຊາດ ແລະ ພັດທະນາ ເພື່ອໃຫ້ເປັນຮູບປະທຳ ແລະ ມີຜົນສໍາເລັດຕົວຈິງ; ສະເໜີໃຫ້ສຸມໃສ່ການຈັດຕັ້ງຜັນຂະຫຍາຍມະຕິກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII ເຂົ້າສູ່ວຽກງານຕົວໃຈ ຢ່າງມີປະສິດທິຜົນ.