(ສພຊ) ວັນທີ 28 ມັງກອນ ຜ່ານມາ ທີ່ສະພາແຫ່ງຊາດ ນະຄອນຫລວງວຽງຈັນ,  ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ (ສພຊ) ແຫ່ງ ສປປລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ນາງ ເອລີຕາ ກຣູມີນາ (Elita Krumina) ປະທານສໍານັກງານກວດສອບແຫ່ງ ສາທາລະນະລັດ ລັດເວຍ ໃນໂອກາດທີ່ເດີນທາງມາຢ້ຽມຢາມ ສປປລາວ ລະຫວ່າງວັນທີ 26-31 ມັງກອນ 2020.

ທ່ານ ນາງ ເອລີຕາ ກຣູມີນາ ສະແດງຄວາມດີໃຈຕໍ່ການຕ້ອນຮັບຢ່າງອົບອຸ່ນຂອງການນໍາ ສປປລາວ, ພ້ອມທັງແຈ້ງຜົນຂອງການພົບປະສອງຝ່າຍລະຫວ່າງອົງການກວດສອບລາວ ແລະ ລັດເວຍ ແລະ ການຈັດກອງປະຊຸມເຝິກອົບຮົມໃຫ້ພະນັກງານອົງການກວດສອບ ສປປລາວ ພ້ອມທັງແຈ້ງໃຫ້ຮູ້ສະພາບເສດຖະກິດ-ສັງຄົມຂອງ ສທາລະນະລັດ ລັດເວຍ ໃຫ້ຊາບໂດຍສັງເຂບ; ທ່ານ ເອລີຕາ ກຣູມີນາ ຍັງກ່າວຕື່ມວ່າ: ການມາຢ້ຽມຢາມ ແລະ ເຮັດວຽກຢູ່ ສປປລາວ ໃນຄັ້ງນີ້ ເປັນການເສີມສ້າງສາຍພົວພັນຮ່ວມມືລະຫວ່າງ ສປປລາວ ແລະ ສ.ລັດເວຍ ກໍຄືສຳນັກງານກວດສອບແຫ່ງລັດເວຍ ແລະ ອົງ ການກອບສອບແຫ່ງລັດ ສປປລາວ ໃນການພົວພັນຮ່ວມມື, ແລກປ່ຽນບົດຮຽນ ແລະ ສະໜັບສະໜູນເຊິ່ງກັນແລະກັນ.

ທ່ານ ນາງ ປານີ ຢາທໍ່ຕູ້ ໄດ້ສະ​ແດງ​ຄວາມຍິນດີຕ້ອນຮັບທ່ານ ນາງ ເອລີຕາ ກຣູມີນາ ປະທານສໍານັກງານກວດສອບແຫ່ງ ສາທາລະນະລັດ ລັດເວຍ ພ້ອມດ້ວຍຄະນະ ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຮ່ວມກັບອົງການກວດສອບແຫ່ງລັດ ສປປລາວ ໃນຄັ້ງນີ້. ທັງເປັນການປະກອບສ່ວນອັນສຳຄັນໃນການເສີມສ້າງສາຍພົວພັນມິດຕະພາບຮ່ວມ ແລະ ການຮ່ວມມືຂອງສອງຝ່າຍ ລະຫວ່າງອົງການກວດສອບແຫ່ງລັດຂອງສອງປະເທດ ໃຫ້ໄດ້ຮັບການພັດທະນາ ການຮ່ວມມືໃນຂົງເຂດວຽກງານການກວດສອບໃຫ້ນັບມື້ນັບເຂັ້ມແຂງ, ມີປະສິດທິຜົນ ແລະ ປະສົບຜົນສຳເລັດຢ່າງໜັກແໜ້ນ ຕ່າງຝ່າຍຕ່າງມີຜົນປະໂຫຍດ. ທ່ານປະທານສະພາແຫ່ງຊາດ ໄດ້ຕີລາຄາສູງຕໍ່ຜົນການພົບປະລະຫວ່າງສອງອົງການ ກວດສອບຂອງສອງປະເທດ  ເຫັນວ່າປະສົບຜົນສຳເລັດຢ່າງຈົບງາມ. ພ້ອມນີ້, ກໍສະເໜີໃຫ້ທັງສອງຝ່າຍ ສືບຕໍ່ຈັດຕັ້ງຜັນຂະຫຍາຍເນື້ອໃນບົດບັນທຶກຄວາມເຂົ້າໃຈ ແລະ ແຜນການຮ່ວມມືສອງຝ່າຍ ທີ່ໄດ້ລົງນາມຮ່ວມກັນໃຫ້ໄດ້ຮັບໝາກຜົນດີຍິ່ງໆຂຶ້ນ. ພ້ອມທັງສະແດງຄວາມຊົມເຊີຍຕໍ່ສຳນັກງານກວດສອບ ແຫ່ງ ສາທາລະນະລັດ ລັດເວຍ ແລະ ອົງການກວດສອບແຫ່ງລັດ ຂອງ ສປປລາວ ມີການພົວພັນຮ່ວມມືທີ່ດີຕໍ່ກັນຕະຫລອດມາ ໃນເວທີພາກພື້ນ ແລະ ສາກົນ ໂດຍສະເພາະ ແມ່ນການຮ່ວມມືສະໜັບສະໜູນດ້ານວິຊາການ ແລະ ການສ້າງຄວາມເຂັ້ມແຂງໃຫ້ແກ່ອົງການກວດສອບແຫ່ງລັດຂອງ ສປປລາວ. ການມາພົບປະເຮັດວຽກໃນຄັ້ງນີ້ ແມ່ນທັງສອງຝ່າຍຈະໄດ້ມີການປຶກສາຫາລື ແລະ ແລກປ່ຽນບົດຮຽນເຊິ່ງກັນ ແລະກັນ ໃນການພັດທະນາວຽກງານກວດສອບໃຫ້ມີຄວາມເຂັ້ມແຂງ. ພ້ອມນັ້ນ, ຍັງມີຊ່ຽວຊານມາເຝິກອົບຮົມໃຫ້ພະນັກງານ-ນັກກວດສອບ ຂອງອົງການກວດສອບແຫ່ງລັດ ຂອງ ສປປລາວ ໃນຫົວຂໍ້: ການສ້າງແຜນຍຸດທະສາດ ແລະ ການພັດທະນາສຳນັກງານກວດສອບແຫ່ງ ສາທາລະນະລັດ ລັດເວຍ; ປະສົບການຕົວຈິງໃນການຈັດຕັ້ງປະຕິບັດວຽກງານກວດສອບ ແລະ ສິ່ງທ້າທາຍຂອງສຳນັກງານກວດສອບແຫ່ງ ສາທາລະນະລັດ ລັດເວຍ ແລະ ລະບົບການຕິດຕາມການຈັດຕັ້ງປະຕິບັດຄໍາແນະນໍາຜົນການກວດສອບໃຫ້ແກ່ນັກກວດສອບແຫ່ງລັດ ສປປລາວ ຈໍານວນຫລາຍທ່ານ ເຊິ່ງເປັນການຍົກລະດັບຄວາມຮູ້ຄວາມສາມາດໃຫ້ພະນັກງານ-ນັກກວດສອບແຫ່ງລັດ ສປປລາວ ກາຍເປັນຜູ້ທີ່ມີຄວາມຊໍານິຊໍານານ ແລະ ມືອາຊີບເທື່ອລະກ້າວ.