ໃນລະຫວ່າງວັນທີ 22-23 ພຶດສະພາ 2022 ທີ່ຜ່ານມາ  ທ່ານ ນາງ ວັນດີ ບຸດທະສະວົງ ຮອງປະທານກໍາມາທິການການຕ່າງປະເທດ​ ສະພາແຫ່ງຊາດ​ ພ້ອມຄະນະ ໄດ້ລົງເຄື່ອນໄຫວເຮັດວຽກຢູ່ແຂວງຈໍາປາສັກ ໂດຍມີຈຸດປະສົງເພື່ອລົງຕິດຕາມກວດກາ ການຈັດຕັ້ງປະຕິບັດກົດຫມາຍ ໃນຂົງເຂດວຽກງານການຕ່າງປະເທດ.

ການເຄື່ອນໄຫວໃນວັນທີ 22 ພຶດສະພາ 2022 ໄດ້ສົມທົບກັບສະພາປະຊາຊົນແຂວງຈໍາປາສັກ ເດີ່ນທາງລົງເຄື່ອນໄຫວເຮັດວຽກກັບຄະນະຄຸ້ມຄອງດ່ານສາກົນໜອງນົກຂຽນ (ຊາຍແດນລາວ-ກໍາປູເຈຍ) ໂດຍໄດ້ຮັບຟັງການລາຍງານຫຍໍ້ຄະນະຄຸ້ມຄອງດ່ານ ໃນການຈັດຕັ້ງປະຕິບັດ ວຽກງານການເຂົ້າອອກ-ຂອງປະຊາຊົນ ທັງສອງປະເທດ ຄືລາວ-ກຳປູເຈຍ ການຂົນສົ່ງສິນຄ້ານໍາເຂົ້າ ແລະສົ່ງອອກ ສິນຄ້າຜ່ານແດນ, ຂໍ້ສະດວກ ແລະຂໍ້ຫຍຸ້ງຍາກຫລາຍໃນການຈັດເກັບລາຍຮັບ ທີ່ຂັ້ນເທິງໄດ້ມອບໃຫ້

ຈາກນັ້ນ, ໃນວັນທີ 23 ພຶດສະພາ 2022 ທ່ານ ນາງ ວັນດີ ບຸດທະສະວົງ ຮອງກຳມະທິການຕ່າງປະເທດ ສະພາແຫ່ງຊາດ ພ້ອມຄະນະ ຍັງໄດ້ສືບຕໍ່ເຮັດວຽກກັບຄະນະນໍາຂອງສະພາປະຊາຊົນແຂວງ  ໂດຍສົມທົບກັບທ່ານ ແກ້ວລັດຕະນະ ສີຫາວົງ ຄະນະປະຈໍາພັກແຂວງ ຮອງປະທານສະພາປະຊາົນແຂວງຈໍາປາສັກ ເປີດກອງປະຊຸມຮັບຟັງການລາຍງານຈາກ 5 ພາກສ່ວນຄື::ພະແນກການຕ່າງປະເທດ, ພະແນກແຜນການ ແລະ ການລົງທຶນ, ພະແນກແຮງງານ ແລະ ສັດຫວັດດີການສັງຄົມ, ກອງບັນຊາການປ້ອງກັນຊາດ, ກອງບັນຊາການປ້ອງກັນຄວາມສະຫງົບ ເຊິ່ງສາມາດເຫັນໄດ້ເຖິງສະພາບລວມຈຸພິເສດ ດ້ານດີ ແລະ ບັນຫາຂໍ້ຫບຸ້ງຍາຂອງແຂວງ ໂດຍສະເພາະບັນຫາການປັກຫລັກຫມາຍຊາຍແດນ ທີ່ຍັງບໍທັນໄດ້ສໍາເລັດ, ບັນຫາການແຕ່ງງານລະຫວ່າງຄົນລາວກັບຄົນຕ່າງປະເທດ ທີ່ບໍທັນຖືກກັບກົດຫມາຍຂອງ ສປປ ລາວ ແລະ ບັນຫາອື່ນໆ ເຊິ່ງກອງປະຊຸມໄດ້ມີການຕັ້ງຄໍາຖາມເຈາະຈີ້ມແລກປ໋ຽນ ແລະ ແລກປ່ຽນຄໍາຄິດຄໍາເຫັນຕໍ່ເນື້ອໃນທີພະແນກການອ້ອມຂ້າງໄດ້ສະເໜີ. ຈາກນັ້ນ, ຕອນບ່າຍຂອງວັນດຽວກັັນ ຄະນະຂອງທ່ານຮອງປະທານກໍາມາທິການການຕ່າງປະເທດ​ ສະພາແຫ່ງຊາດ​ ຍັງໄດ້ເຄື່ອນໄຫວເຮັດວຽກຮ່ວມກັບພະແນກການ ໂຍທາທິການ ແລະ ຂົນສົ່ງແຂວງຈໍາປາສັກ ແລະ ລົງຕິດຕາມກວດກາຄວາມຄືບໜ້າໂຄງການກໍ່ສ້າງຕາຝັ່ງກັນເຈື່ອນແຄມຂອງ ເທດສະບານນະຄອນປາກເຊ ອີກດ້ວຍ.

(ພາບ-ຂ່າວ: ພຸດທະສອນ ແສງພອນ)