ຕອນບ່າຍວັນທີ 20 ພຶດສະພາ ຜ່ານມານີ້. ທີ່ຫ້ອງປະຊຸມສະພາປະຊາຊົນແຂວງ (ສພຂ) ອັດຕະປື. ທ່ານ ນາງ ວັນດີ ບຸດທະສະວົງ ຮອງປະທານກໍາມາທິການການຕ່າງປະເທດ ສະພາແຫ່ງຊາດ ພ້ອມຄະນະ ໄດ້ເຂົ້າເຮັດວຽກຕິດຕາມກວດກາ ການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ ໃນຂົງເຂດວຽກງານການຕ່າງປະເທດ.ຮ່ວມກັບ ສພຂ ແລະ ພາກສ່ວນທີ່ກ່ຽວຂ້ອງ. ໂດຍມີທ່ານ ນາງ ມີນາພອນ ໄຊສົມພູ ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 17 ປະທານ ສພຂ. ມີບັນດາທ່ານຄະນະປະຈໍາ ສພຂ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 17, ຄະນະກຳມະການ, ຄະນະເລຂາທິການ, ຕາງໜ້າພະແນກການຕ່າງປະເທດ, ພະແນກແຜນການ ແລະ ການລົງທຶນ, ກອງບັນຊາການທະຫານ ແລະ ດ່ານສາກົນພູເກືອ ເຂົ້າຮ່ວມ.

ໂອກາດດັ່ງກ່າວ, ໄດ້ຮັບຟັງກາຍລາຍງານຈາກພາກສ່ວນທີ່ກ່ຽວຂ້ອງເປັນຕົ້ນ: ສະພາບການຈັດຕັ້ງປະຕິບັດ ແລະ ຄຸ້ມຄອງໂຄງການຊ່ວຍເຫລືອລ້າ (ODA) ການລົງທຶນຂອງຕ່າງປະເທດ ໂດຍສະເພາະໂຄງການລົງທຶນ ແລະ ຊ່ວຍເຫລືອລ້າຂອງ ສປ.ຈີນ, ສສ.ຫວຽດນາມ, ການຄຸ້ມຄອງການເຄື່ອນໄຫວຂອງອົງການທີ່ບໍ່ຂຶ້ນກັບລັດຖະບານ (INGOs), ອົງການຈັດຕັ້ງທາງສັງຄົມຂອງຕ່າງປະເທດ (CSO), ສະພາບການຄຸ້ມຄອງດ່ານສາກົນ (ການຂົນສົ່ງສີນຄ້າຜ່ານແດນ),ບັນຫາການຄຸ້ມຄອງຄົນຕ່າງປະເທດເຂົ້າ-ອອກເມືອງແບບຜິດກົດໝາຍ, ການຄຸ້ມຄອງຄົນຕ່າງດ້າວ ແລະ ແຮງງານຕ່າງປະເທດ ແລະ ການແຕ່ງງານກັບຄົນຍຕ່າງປະເທດທີ່ຜິດກົດໝາຍ, ການນຄຸ້ມຄອງຫລັກ  ໝາຍຊາຍແດນແຫ່ງຊາດ, ສະກັດກັ້ນ ແລະ ແກ້ໄຂບັນຫາການຄ້າຂາຍຢາເສບຕິດ ແລະ ການຄ້າຂາຍເຖື່ອນຕາມບໍລິເວນຊາຍແດນ, ການຄ້າມະນຸດໂດຍສະເພາະແມ່ນແມ່ຍິງ ແລະ ເດັກນ້ອຍ. ຈາກນັ້ນ, ໄດ້ສົນທະນາແລກປ່ຽນ ປະກອບຄໍາຄິດຄໍາເຫັນ ຢ່າງກົງໄປກົງມາ ແລະ ເລິກເຊິ່ງ.

(ວິນັດ)