ໂດຍປະຕິບັດຕາມແຈ້ງການຂອງຄະນະເລຂາທິການສະພາແຫ່ງຊາດ ສະບັບເລກທີ 185/ຄລສ. ລົງວັນທີ 5  ພຶດສະພາ 2022 ໃນຕອນເຊົ້າ ວັນທີ 18 ພຶດສະພາ 2022 ເວລາ 8:30ໂມງ ທີ່ຫ້ອງປະຊຸມສະພາປະຊາຊົນແຂວງວຽງຈັນ ໄດ້ເປີດກອງປະຊຸມ ເພື່ອຮັບຟັງການລາຍງານຜົນການທາບທາມຮ່າງກົດໝາຍ ຈໍານວນ 5 ສະບັບ ທີ່ບັນດາພະແນກການກ່ຽວຂ້ອງ ໄດ້ພ້ອມກັນຈັດຕັ້ງການທາບທາມ ໃນຂົງເຂດທີ່ຕິດພັນກັບວຽກງານຂອງຕົນກ່ອນທີ່ຈະນໍາເຂົ້າພິຈາລະນາໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ເຊິ່ງປະກອບມີ: ຮ່າງກົດໝາຍວ່າດ້ວຍສານປະຊາຊົນແຂວງ, ຮ່າງກົດໝາຍວ່າດ້ວຍນໍ້າ ແລະ ຊັບພະຍາກອນນໍ້າ, ຮ່າງກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ (ສະບັບປັບປຸງ), ຮ່າງກົດໝາຍວ່າດ້ວຍການຄຸ້ມຄອງອາວຸດ ແລະ ວັດຖຸລະເບີດ ແລະ ຮ່າງກົດໝາຍວ່າດ້ວຍການສົ່ງເສີມຈຸລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ(ສະບັບປັບປຸງ) ກອງປະຊຸມດັ່ງກ່າວໂດຍການເປັນປະທານຂອງ ທ່ານ ລໍາໄມ ກູດລາວົງ ຄະນະປະຈໍາພັກແຂວງ, ຮອງປະທານສະພາປະຊາຊົນແຂວງ ທັງເປັນປະ ທານຄະນະກໍາມະການເສດຖະກິດ-ແຜນການ ແລະ ການເງິນ ສະພາປະຊາຊົນແຂວງວຽງຈັນ ເຂົ້າຮ່ວມມີ ປະທານ-ຮອງປະທານຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ສະພາປະຊາຊົນແຂວງ, ຕາງໜ້າຈາກພະແນກການ, ອົງການ, ກົມກອງ, ທີ່ກ່ຽວຂ້ອງ ຕະຫຼອດຮອດຫົວໜ້າຂະແໜງ-ຮອງຂະແໜງ ແລະ ພະນັກງານວິຊາການພາຍໃນສະພາປະຊາຊົນແຂວງເຂົ້າຮ່ວມ.

ຈຸດປະສົງຂອງກອງປະຊຸມຄັ້ງນີ້ ແມ່ນການທາບທາມຮ່າງກົດໝາຍຈໍານວນ 5 ເພື່ອເປັນບ່ອນອີງ ໃນການ ລາຍງານຜົນການທາບທາມ ຄໍາຄິດ-ຄໍາເຫັນ ໃຫ້ແກ່ຄະນະປະຈໍາສະພາແຫ່ງຊາດ ໄດ້ຄົ້ນຄ້ວາພິຈາລະນາ ແລະ ສະເໜີຫາພາກສ່ວນກ່ຽວຂ້ອງ ພ້ອມນັ້ນ ບັນດາທ່ານທີ່ເຂົ້າຮ່ວມກອງປະຊຸມໄດ້ພ້ອມກັນ ແລກປ່ຽນ, ຄໍາຄິດ ຄໍາເຫັນໃສ່ຮ່າງກົດໝາຍຈໍານວນ 5 ສະບັບ ຕື່ມອີກໂດຍອີງໃສ່ຄໍາແນະນໍາຂອງ ກໍາມາທິການກົດໝາຍສະພາແຫ່ງຊາດ ແລະ ເພື່ອເຮັດໃຫ້ເນື້ອໃນຂອງບັນດາກົດໝາຍມີຄວາມຮັດກຸມ, ທຸກບັນຫາມີຄວາມກະຈ່າງແຈ້ງ ພ້ອມທັງເປັນບ່ອນອີງໃຫ້ຂະແໜງການຢູ່ຂັ້ນທ້ອງຖິ່ນ ໃນການຈັດຕັ້ງປະຕິບັດໜ້າທີ່ວຽກງານໃຫ້ສອດຄ່ອງຕາມພາລະບົດບາດ ແລະ ໜ້າທີ່ ທີ່ກົດໝາຍກໍານົດໄວ້.