(ສພຊ) ວັນທີ 17 ທັນວາ 2019, ທີ່ສະພາປະຊາຊົນແຂວງ (ສພຂ) ຫົວພັນ, ທ່ານ ພົທ. ແສງນວນ ໄຊຍະລາດ ເລຂາທິການສູນກາງພັກ, ຮອງປະທານສະພາແຫ່ງຊາດ (ສພຊ) ພ້ອມດ້ວຍຄະນະ ເຊິ່ງປະກອບດ້ວຍຮອງປະທານກໍາມາທິການບັນດາເຜົ່າ, ຮອງປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ), ຕາງໜ້າກໍາມາທິການການຕ່າງປະເທດ ແລະ ວິຊາການທີ່ກ່ຽວຂ້ອງ ຈາກ ສພຊ ໄດ້ສືບຕໍ່ເຄື່ອນໄຫວຕິດຕາມກວດກາ ຢູ່ແຂວງຫົວພັນ; ເຂົ້າຮ່ວມມີທ່ານ ຄໍາວອນ ບຸນທະວົງ ປະທານ ສພຂ ຫົວພັນ, ມີຮອງປະທານ ສພຂ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 8 ແຂວງຫົວພັນ ທີ່ເປັນກໍາມະການຂອງກໍາມາທິການ ປກຊ-ປກສ, ຕາງໜ້າອົງການແນວລາວສ້າງຊາດແຂວງ, ບັນດາພະແນກການທີ່ກ່ຽວຂ້ອງຂອງແຂວງ, ເລຂາທິການ ສພຂ, ພ້ອມດ້ວຍວິຊາການຈາກ ສພຊ ແລະ ສພຂ ຫົວພັນ.
ຕາງໜ້າອົງການແນວລາວສ້າງຊາດແຂວງ ໄດ້ລາຍງານໃຫ້ຊາບວ່າ: ສາສະໜາພຸດ ເປັນສາສະໜາຕົ້ນຕໍ ຂອງປະຊາຊົນແຂວງຫົວພັນ, ສ່ວນສາສະໜາອື່ນ ກໍເຫັນວ່າມີຈໍານວນໜຶ່ງໃນແຕ່ລະເມືອງ ເຊິ່ງມີພຶດຕິກໍາທີ່ຂັດຕໍ່ ການເຄື່ອນໄຫວຂະບວນການຂອງອໍານາດການປົກຄອງ, ອໍານາດການປົກຄອງຂັ້ນແຂວງ-ຂັ້ນເມືອງ-ຂັ້ນບ້ານ ກໍໄດ້ມີການສຶກສາອົບຮົມ ເພື່ອແກ້ໄຂບັນຫາດັ່ງກ່າວ, ການນໍາເອົາດໍາລັດວ່າດ້ວຍການຄຸ້ມຄອງ ແລະ ປົກປ້ອງການເຄື່ອນໄຫວສາສະໜາຢູ່ ສປປລາວ ເລກທີ 315/ລບ ລົງໄປເຜີຍແຜ່ ແມ່ນໄດ້ປະຕິບັດແລ້ວໃນທຸກໆເມືອງ; ຕາງໜ້າພະແນກການຕ່າງປະເທດແຂວງ ໄດ້ລາຍງານວ່າ: ສະພາບຊາຍແດນລະຫວ່າງແຂວງຫົວພັນ ກັບເຊິນລາ ເຫງອານ ແລະ ແທງຮວ່າ ສສ.ຫວຽດນາມ ໂດຍລວມຍັງເປັນຊາຍແດນທີ່ມີຄວາມສະຫງົບ, ປະຊາຊົນແຂວງຫົວພັນໄດ້ຍົກຍ້າຍໄປຢູ່ຫວຽດນາມ 549 ຄົນ ຍິງ 522 ຄົນ, ໄປຢູ່ແບບຖືກຕ້ອງ 11 ຄົນ ຍິງ 4 ຄົນ, ໄປສ້າງຄອບຄົວບໍ່ຖືກຕ້ອງ 538 ຍິງ 518 ຄົນ, ປະຊາຊົນຫວຽດນາມ ມາຢູ່ແຂວງຫົວພັນ 769 ຄົນ ຍິງ 648 ຄົນ, ມາຕັ້ງພູມລໍາເນົາ 9 ຄອບຄົວ, ມາສ້າງຄອບຄົວ 722 ຄົນ ຍິງ 623 ຄົນ; ບັນຫາຫຍຸ້ງຍາກມີ 3 ບັນຫາຄື: ອົງການປົກຄອງບ້ານຈໍານວນໜຶ່ງ ບໍ່ໃຫ້ການຮ່ວມມື, ເມືອງ ຫລື ບ້ານທີ່ຕິດຊາຍແດນ ແມ່ນເຂດກັນດານ ຫຍຸ້ງຍາກໃນການເຂົ້າເຖິງ ແລະ ຂາດເຂີນງົບປະມານໃນການລົງເກັບກໍາຂໍ້ມູນ; ກອງບັນຊາການປ້ອງກັນຄວາມສະຫງົບແຂວງ ແລະ ອົງການໄອຍະການປະຊາຊົນ ກໍໄດ້ລາຍງານວ່າ: ໄລຍະຜ່ານມາ ເຫັນວ່າມີຈໍານວນຄະດີເພີ່ມຂຶ້ນ, ຂອດການຕັດສິນປະຕິບັດໄດ້ ແຕ່ການປະຕິບັດຕາມຄໍາຕັດສິນ ແມ່ນຍັງເຮັດບໍ່ໄດ້, ຍັງມີບາງຄະດີແກ່ຍາວຊັກຊ້າ ແລະ ມີການກັກຂັງແກ່ຍາວ, ມີຄວາມຂາດເຂີນ ສະເໜີໃຫ້ມີການຍົກລະດັບພະນັກງານທີ່ເຮັດວຽກງານຍຸຕິທໍາ.
ທ່ານ ພົທ. ແສງນວນ ໄຊຍະລາດ ໄດ້ມີຄໍາເຫັນໂອ້ລົມ ເຊິ່ງທ່ານໄດ້ອະທິບາຍໃຫ້ເຂົ້າໃຈເລິກກ່ຽວກັບສາສະໜາ ເຊິ່ງແມ່ນທີ່ເພິ່ງທາງດ້ານຈິດວິນຍານຂອງຄົນເຮົາ, ແຕ່ບໍ່ໃຫ້ເຄື່ອນໄຫວທາງສາສະໜາ ທີ່ຂັດຕໍ່ລັດຖະທໍາມະນູນ ແລະ ກົດໝາຍ, ຕໍ່ບັນຫາຄວາມຂັດແຍ່ງ ແລະ ພຶດຕິກໍາທີ່ຂັດຕໍ່ແນວທາງນະໂຍບາຍຂອງພັກ-ລັດ ແມ່ນໃຫ້ອໍານາດການປົກຄອງ ກໍຄືພະແນກການທີ່ກ່ຽວຂ້ອງ ສຶກສາອົບຮົມການເມືອງ-ແນວຄິດດ້ວຍຄວາມນຸ້ມນວນ ແລະ ຄ່ອງແຄ້ວ, ດ້ວຍເຫດດ້ວຍຜົນ; ເພີ່ມທະວີຄວາມສາມັກຄີ ໃຫ້ເປັນປຶກແຜ່ນແໜ້ນໜາ; ວຽກງານປ້ອງກັນຊາດ-ປ້ອງກັນຄວາມສະຫງົບ ຕ້ອງກໍາໃຫ້ໄດ້ຄົນເຂົ້າ-ອອກເມືອງຜິດກົດໝາຍ ຕະຫລອດຮອດການມາສ້າງຄອບຄົວກັບຄົນຕ່າງປະເທດ, ຄົນລາວໄປສ້າງຄອບຄົວກັບຄົນຕ່າງປະເທດ ແລະ ການເຄື່ອນຍ້າຍມາຕັ້ງຖິ່ນຖານ ແລະ ອື່ນໆ; ຕໍ່ບັນດາຂໍ້ສະເໜີຕ່າງໆ ໂດຍສະເພາະແມ່ນບັນຫາພື້ນຖານໂຄງລ່າງ ຖະໜົນຫົນທາງ, ດ້ານການສຶກສາ ແລະ ສາທາລະນະສຸກ ແມ່ນຈະນໍາສະເໜີຕໍ່ພາກສ່ວນທີ່ກ່ຽວຂ້ອງ ເພື່ອແກ້ໄຂຕາມຄວາມເໝາະສົມ.