ຕອນເຊົ້າວັນທີ 11 ພຶດສະພາ 2022 ທ່ານ ພົນໂທ ສຸວອນ ເລືອງບຸນມີ ກຳມະການສູນກາງພັກ ຮອງປະທານສະພາແຫ່ງຊາດ ພ້ອມດ້ວຍຄະນະ ລົງຕິດຕາມ, ກວດກາ ແລະ ປະເມີນຜົນການຈັດຕັ້ງປະຕິບັດກົດໝາຍ ຈຳນວນ 4 ສະບັບ ທີ່ຕິດພັນກັບວາລະແຫ່ງຊາດ (ກ່ຽວກັບການແກ້ໄຂບັນຫາເສດຖະກິດການເງິນ) ຢູ່ແຂວງຫລວງນ້ຳທາ,  ໂອກາດນີ້ ໄດ້ເຂົ້າພົບທ່ານ ຈັນທອງ ແກ້ວປະເສີດ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ ເພື່ອເຂົ້າລາຍງານ ຈຸດປະສົງການລົງເຄື່ອນໄຫວເຮັດວຽກຢູ່ແຂວງຫລວງນ້ຳທາ, ຈາກນັ້ນ ທ່ານ ຈັນທອງ ແກ້ວປະເສີດ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ ໄດ້ກ່າວຕ້ອນຮັບຢ່າງອົບອຸ່ນ, ໄດ້ລາຍງານສະພາບຕົວຈິງໃນການຈັດຕັ້ງປະຕິບັດວຽກງານພາຍໃນແຂວງໂດຍຫຍໍ້ ແລະ ອວຍພອນທິມງານສະພາແຫ່ງຊາດຈົ່ງປະຕິບັດໜ້າທີ່ວຽກງານພາຍໃນແຂວງຫລວງນ້ຳທາຄັ້ງນີ້ ໄດ້ຮັບຜົນສຳເລັດຕາມຄາດໝາຍ ແລະ ຕອນເຊົ້າຂອງວັນດຽວກັນ ໄດ້ເປີດກອງປະຊຸມປະເມີນການຈັດຕັ້ງປະຕິບັດກົດໝາຍຈຳນວນ 4 ສະບັບ ທີ່ຕິດພັນກັບວາລະແຫ່ງຊາດ ຢູ່ສະໂມສອນຂອງແຂວງຫລວງນ້ຳທາ ພາຍໃຕ້ການເປັນປະທານຂອງທ່ານ ທ່ານ ພົນໂທ ສຸວອນ ເລືອງບຸນມີ ກຳມະການສູນກາງພັກ ຮອງປະທານສະພາແຫ່ງຊາດ, ໃຫ້ກຽດເຂົ້າຮ່ວມຂອງທ່ານ ຄຳຟອງ ອິນມະນີ ຮອງເລຂາພັກແຂວງ ປະທານສະພາປະຊາຊົນແຂວງ, ມີຄະນະປະຈຳພັກແຂວງ, ຄະນະຮອງປະທານສະພາປະຊາຊົນແຂວງ, ຮອງປະທານກຳມາທິການສະພາແຫ່ງຊາດ, ສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ, ຫົວໜ້າ, ຮອງຫົວໜ້າພະແນກການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ 52 ທ່ານ, ຍິງ 7 ທ່ານ.

ຈຸດປະສົງໃນການລົງເຄື່ອນໄຫວເຮັດວຽກຢູ່ແຂວງຫລວງນ້ຳທາ ຄັ້ງນີ້ ເພື່ອລົງຕິດຕາມກວດກາ, ການປະເມີນຜົນການຈັດຕັ້ງປະຕິບັດໝາຍ ຈຳນວນ 4 ສະບັບ ທີ່ຕິດພັນກັບວາລະແຫ່ງຊາດ(ກ່ຽວກັບການແກ້ໄຂບັນຫາເສດຖະກິດການເງິນ)ຄື: ກົດໝາຍວ່າດ້ວຍ ທີດິນ, ກົດໝາຍວ່າດ້ວຍ ການສົ່ງເສີມການລົງທຶນ, ກົດໝາຍວ່າດ້ວຍ ຊັບສິນຂອງລັດ ແລະ ກົດໝາຍວ່າດ້ວຍ ແຮ່ທາດ ເພື່ອນຳເອົາຄຳສະເໜີຕ່າງໆ ນຳໄປຄົ້ນຄວ້າ, ພິຈາລະນາ, ປັບປຸງແກ້ໄຂໃຫ້ເນື້ອໃນກົດໝາຍມີເນື້ອໃນຄົບຖ້ວນສົມບຸນ ແລະ ໃນກອງປະຊຸມໄດ້ຮັບຟັງການລາຍງານຂອງບັນດາພະແນກການກ່ຽວຂ້ອງຂອງແຂວງ ກ່ຽວກັບການປະເມີນຜົນການຈັດຕັ້ງປະຕິບັດກົດໝາຍວ່າດ້ວຍ ທີ່ດິນ, ກົດໝາຍວ່າດ້ວຍ ການສົ່ງເສີມການລົງທຶນ, ກົດໝາຍວ່າດ້ວຍ ຊັບສິນຂອງລັດ ແລະ ກົດໝາຍວ່າດ້ວຍ ແຮ່ທາດ ຕາມຄຳຖາມເຈາະຈິ້ມຂອງກຳມາທິການທີ່ກ່ຽວຂ້ອງ ຂອງສະພາແຫ່ງຊາດ ເປັນຕົ້ນ: ການຈັດຕັ້ງປະຕິບັດກົດໝາຍ 4 ສະບັບ, ຂໍ້ສະດວກ, ຂໍ້ຫຍຸ້ງຍາກ ຂອງທ້ອງຖິ່ນໃນໄລຍະຜ່ານມາ ພ້ອມດຽວກັນນັ້ນ ຜູ້ແທນກອງປະຊຸມຍັງໄດ້ສຸມໃສ່ແລກປ່ຽນປະກອບຄຳຄິດເຫັນໃສ່ບັນດາກົດໝາຍ ຈຳນວນ 4 ສະບັບ ທີ່ຕິດພັນກັບວາລະແຫ່ງຊາດ ຢ່າງກົງໄປກົງມາ ເພື່ອເປັນຂໍ້ມູນນຳໄປ ຄົ້ນຄວ້າ, ປັບປຸງແກ້ໄຂກົດໝາຍດັ່ງກ່າວ ໃຫ້ມີເນື້ອໃນຄົບຖ້ວນສົມບຸນ ສາມາດນຳໄປຈັດຕັ້ງປະຕິບັດໃຫ້ມີຄຸນນະພາບສູງສຸດ.

ຕອນທ້າຍ ຍັງໄດ້ຮັບຟັງຄຳເຫັນໂອ້ລົມຂອງທ່ານ ທ່ານ ພົນໂທ ສຸວອນ ເລືອງບຸນມີ ກຳມະການສູນກາງພັກ ຮອງປະທານສະພາແຫ່ງຊາດ ກ່ອນອື່ນທ່ານ ໄດ້ສະແດງຄວາມຍ້ອງຍໍຊົມເຊີຍຕໍ່ການກະກຽມບົດລາຍງານ, ການປະກອບຄຳຄິດເຫັນຕໍ່ກັບການຈັດຕັ້ງປະຕິບັດກົດໝາຍ 4 ສະບັບ ພາຍໃນແຂວງ ເຫັນວ່າມີຄວາມເຂັ້ມງວດສົມຄວນ, ເປັນຂໍ້ມູນທີ່ດີໃຫ້ກັບທິມງານທີ່ກ່ຽວຂ້ອງຂອງສະພາແຫ່ງຊາດ ແລະ ໄດ້ຮຽກຮ້ອງໃຫ້ບັນດາພະແນກການຂອງແຂວງທີ່ກ່ຽວຂ້ອງນຳເອົາຄຳສະເໜີຕ່າງໆ ນຳໄປປັບປຸງແກ້ໄຂຕໍ່ບົດລາຍງານຂອງຕົນ ສົ່ງໃຫ້ອົງການປົກຄອງແຂວງສັງລວມເປັນບົດລາຍງານສົ່ງໃຫ້ບັນດາກະຊວງທີ່ກ່ຽວຂ້ອງ ເພື່ອນຳເອົາຂໍ້ມູນດັ່ງກ່າວ, ນໍາເຂົ້າຄົ້ນຄວ້າ, ພິຈາລະນາແກ້ໄຂ ໃນກອງປະຊຸມສະໄໝສາມັນເທື່ອທີ3 ຂອງສະພາແຫ່ງຊາດ; ນອກນັ້ນ ຍັງໃຫ້ສືບຕໍ່ໃນການຈັດຕັ້ງປະຕິບັດກົດໝາຍອື່ນໆພາຍໃນແຂວງ ໃຫ້ມີຄວາມເຂັ້ມງວດຂຶ້ນກວ່າເກົ່າ