ໃນວັນທີ 7 ເມສາ 2022 ທີ່ບ້ານລອງຮາງ ເມືອງພູກູດ ແຂວງຊຽງຂວາງ ໄດ້ມີພິທີມອບ-ຮັບໂທລະໂຄ່ງໃຫ້ ບ້ານລ່ອງຮາງ ແລະ ບ້ານລັງຈອງ ເມືອງພູກູດ ແຂວງຊຽງຂວາງ ໂດຍການກ່າວມອບ ຂອງທ່ານ ບຸນສົງ ວິລິວົງສະມາຊິກສະພາປະຊາຊົນປະຈໍາເຂດເລືອກຕັ້ງເມືອງພູກູດ ແລະ ກ່າວຮັບ ຂອງທ່ານ ອໍາຄາ ບຸນມາປັນຍາວົງ ຮອງເລຂາພັກເມືອງຜູ້ຊີ້ນໍາວຽກງານການເມືອງແນວຄິດ ໂດຍຊ່ອງໜ້າທ່ານນາງ ສົດທິດາ ທິບມູນຕາລີ ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 9, ມີສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງພູກູດ, ຕ່າງໜ້າຮ້ານຂາຍລົດໃຫຍ່ສອນທະນູ ມໍເຕີ, ຮອງເລຂາພັກເມືອງ, ພະນັດກງານສະພາປະຊາຊົນແຂວງ, ຄະນະພັກກຸ່ມ, ຄະນະພັກບ້ານ ແລະ ປະຊາຊົນຂອງສອງບ້ານເຂົ້າຮ່ວມເປັນສັກຂີພີຍານໃນຄັ້ງນີ້.
ເຄື່ອງທີ່ນໍາມາມອບ-ຮັບໃນຄັ້ງນີ້ມີ ໂທລະໂຄ່ງ 2 ຊຸດ ມູນຄ່າ 5.000.000 ກີບ ເພື່ອເປັນການປະກອບເຂົ້າໃນການພັດທະນາສ້າງສາ ເມືອງພູກູດກໍ່ຄືບ້ານລອງຮ່າງ ແລະ ລັ້ງຈອງ ໃຫ້ມີຄວາມສະດວກໃນການຈັດຕັ້ງປະຕິບັດວຽກງານ. ເຄື່ອງດັ່ງກ່າວແມ່ນສະມາຊິກສະພາປະຊາຊົນແຂວງເປັນຜູ້ລະດົມຂົນຂວາຍຈາກຮ້ານຂາຍລົດໃຫຍ່ ສອນທະນູ ມໍເຕີ. ໃນພິທີ ທ່ານ ບຸນສົງ ວິລິວົງ ໄດ້ມີຄໍາເຫັນໂອ້ລົມຕໍ່ປະຊາຊົນທັງສອງບ້ານ ຈົ່ງນໍາເອົາໂທລະໂຄ່ງດັ່ງກ່າວ ໄປນໍາໃຊ້ໃຫ້ສອດຄ່ອງ ແລະ ເໝາະສົມກັບຄວາມຮຽກຮ້ອງຕ້ອງການໃນການຈັດຕັ້ງປະຕິບັດວຽກງານຂອງຕົນ ໃຫ້ສະດວກຍິ່ງຂຶ້ນກວ່າເກົ່າ ແລະ ຈົ່ງຊ່ວຍກັນປົກຮັກສາ, ຊົມໃຊ້ໃຫ້ໄດ້ຍາວນານ.
ໃນຕອນທ້າຍຂອງພິທີທ່ານ ອໍາຄາ ບຸນມາປັນຍາ ໄດ້ສະແດງຄວາມຂອບໃຈ ມາຍັງສະພາປະຊາຊົນແຂວງ ນັ້ນກໍຄືສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງພູກູດ ທີ່ໄດ້ລະດົມຂົນຂວາຍທຶນມາຊ່ວຍເຫຼືອ ໃນຄັ້ງນີ້ ພ້ອມທັງໃຫ້ຄໍາໝັ້ນສັນຍາວ່າ ຈະນໍາໃຊ້ ແລະ ປົກປັກຮັກສາເຄື່ອງຊ່ວຍເຫຼືອດັ່ງກ່າວ ໃຫ້ມີຜົນປະໂຫຍດສູງສຸດ, ນໍາໃຊ້ຢ່າງຍາວນານ ແລະ ທ່ານຍັງຫວັງວ່າໄດ້ຮັບການຊ່ວຍເຫຼືອໃນດ້ານຕ່າງໆ ຈາກສະພາປະຊາຊົນແຂວງຕື່ມອີກ ໃນຕໍ່ໜ້າ.
ສະພາປະຊາຊົນແຂວງຊຽງຂວາງ
ຂ່າວໂດຍ: ນາງ ສຸກສະຫວັນ ອິນທະແສງ