ວັນທີ 5 ເມສາ 2022 ນີ້ ທ່ານ ນ. ດາວ ໄຊເສດຖາ ກໍາມະການພັກແຂວງ ຮອງປະທານສະພາປະຊາຊົນແຂວງບໍ່ແກ້ວ ທ່ານ ນ. ອຳພອນ ບຸນຍາວົງ ຄະນະປະຈຳສະພາປະຊາຊົນແຂວງ ປະທານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ, ທ່ານ ຄຳຈັນ ອິນທະຈັກ ຮອງເລຂາພັກເມືອງ ປະທານກວດກາພັກ-ລັດເມືອງ ສະມາຊິກສະພາປະຊາຊົນແຂວງບໍ່ແກ້ວ ປະຈໍາເຂດເລືອກຕັ້ງເມືອງປາກທາ ພ້ອມຄະນະ ລົງພົບປະໂອ້ລົມຊຸກຍູ້ວຽກງານການຈັດຈັ້ງປະຕິບັດຄາດໝາຍຂົງເຂດສືກສາທິການ ແລະ ກິລາເມືອງຢູ່ໂຮງຮຽນ ມສ ປາກທາ, ເຊິ່ງມີ ຫົວໜ້າຫ້ອງການສືກສາທິການເມືອງ, ອໍານວຍການໂຮງຮຽນ ມສ ປາກທາ, ຫົວໜ້າໝວດໂຮງຮຽນປະຖົມປາກທາຕະຫຼອດຮອດ, ຫົວໜ້າ-ຮອງຫົວໜ້າໜ່ວຍງານ, ຄູ-ອາຈານ ເຂົ້າຮ່ວມຮັບຟັງຢ່າງພ້ອມພຽງ.

ພິທີ ແມ່ນໄດ້ຮັບຟັງການຜ່ານບົດສະຫລຸບການຈັດຕັ້ງປະຕິບັດການຮຽນ-ການສອນໃນສົກຮຽນຜ່ານຂອງໂຮງຮຽນພາຍໃນເມືອງ ເຊິ່ງໄດ້ຍົກໃຫ້ເຫັນດ້ານດີຜົນງານ, ຂໍ້ສະດວກ, ຂໍ້ຫຍຸ້ງຍາກ ແລະ ວິທີປັບປຸງແກ້ໄຂພ້ອມທັງພາກສະເໜີຕໍ່ກັບຂັ້ນເທິງໃນຫຼາຍໆບັນຫາທີ່ຈະໄດ້ສຸມໃສ່ແກ້ໄຂໃນຕໍ່ໜ້າໃຫ້ໄດ້ຮັບຜົນດີ. ຈາກນັ້ນ, ຫ້ອງການສືກສາທິການ ແລະ ກິລາເມືອງ, ຄະນະອໍານວຍການ ໂຮງຮຽນ ແລະ ຫົວໜ້າໜວດໂຮງຮຽນປະຖົມປາກທາເມືອງ ກໍ່ໄດ້ປະກອບຄຳຄິດຄຳເຫັນ ຕາມຄໍາຖາມເຈາະຈີ້ມຂອງຄະນະຮັບຜິດຊອບ ທີ່ໄດ້ຊັກຖາມ ແລະ ຖອດຖອນບົດຮຽນເຊິ່ງກັນ ແລະ ກັນ ໃນວຽກງານ ທີ່ຕົນຮັບຜິດຊອບ ເພື່ອເຮັດໃຫ້ການຮຽນ-ການສອນໃນຕໍ່ໜ້າມີຄວາມສະດວກຂຶ້ນ.

ໂອກາດນີ້ ທ່ານ ນ. ດາວ ໄຊເສດຖາ ກໍາມະການພັກແຂວງ ຮອງປະທານສະພາປະຊາຊົນແຂວງບໍ່ແກ້ວ ໄດ້ມີຄຳເຫັນສະແດງຄວາມຍ້ອງຍໍຊົມເຊີຍຕໍ່ຄະນະພັກ ຄະນະນຳຫ້ອງການສືກການສືກສາທິການ ແລະ ກິລາເມືອງ, ຄູ-ອາຈານ ທີ່ໄດ້ທຸ້ມເທສະຕິປັນຍາເຫື່ອແຮງຂອງຕົນເຂົ້າໃນການສິດສອນນ້ອງນັກຮຽນເຖິງແມ່ນວ່າໄລຍະຜ່ານມາມີການລະບາດຂອງພະຍາດໂຄວິດ-19 ເຮັດໃຫ້ການຮຽນ-ການສອນ ບໍ່ໄດ້ຮຽນເປັນປົກກະຕິກໍ່ຕາມ ແຕ່ກໍ່ສາມາດເປີດການຮຽນ-ການສອນ ທາງອອນລາຍ ເຮັດໃຫ້ໄດ້ຮັບຜົນສຳເລັດໃນຫຼາຍດ້ານ ເພື່ອເຮັດໃຫ້ວຽກງານການຮຽນ-ການສອນມີປະສິດທິພາບ, ປະສິດທິຜົນ ທ່ານໄດ້ເນັ້ນໜັກໃຫ້ຄະນະພັກ, ຄະນະນຳຫ້ອງການສືກສາທິການ ແລະ ກິລາເມືອງ ຈົ່ງເອົາໃຈໃສ່ໃນການຕິດຕາມ, ກວດກາ, ຊູກຍູ້ ບັນດາໂຮງຮຽນ ຈັດຕັ້ງການຮຽນ-ການສອນໃຫ້ຖືກຕ້ອງຕາມຫຼັກສູດຂອງກະຊວງສຶກສາທິການ ແລະ ກິລາ ວາງອອກ, ຍົກສູງຄວາມຮັບຜິດຊອບໃນການສຶກສາອົບຮົມວຽກງານ ການເມືອງ-ແນວຄິດ ໃຫ້ມີຄວາມໜັກແໜ້ນເຂັ້ມແຂງ ໂດຍສະເພາະຄະນະພັດທະນາການສືກສາແຕ່ລະຂັ້ນ ໃຫ້ເຫັນໄດ້ຄວາມໝາຍຄວາມສຳຄັນຂອງການສືກສາຢ່າງເລີກເຊີງຕ້ອງກຳໃຫ້ໄດ້ 5 ຫຼັກມູນການສຶກສາ ແລະ 3 ຂໍ້ແຂ່ງຂັນຂອງການສືກສາ ເພື່ອເຮັດໃຫ້ວຽກງານສືກສາ ມີຄຸນນະພາບ ແລະ ສຳເລັດຕາມຄາດໝາຍທີວາງໄວ້.

ໂອກາດທີ່ລົງຊຸກຍູ້ວຽກງານໃນຄັ້ງນີ້ ທ່ານ ນ. ດາວ ໄຊເສດຖາ ພ້ອມດ້ວຍຄະນະ ຍັງໄດ້ນຳເອົາຜ້າອັດປາກ-ດັງ, ເຈວລ້າງມື, ປື້ມຕຳຮຽນ ມາມອບໃຫ້ໂຮງຮຽນນຳໃຊ້ເຂົ້າໃນການຮຽນ-ການສອນ ພ້ອມນັ້ນທ່ານຍັງຈະໄດ້ສືບຕໍ່ລົງຊຸກຍູ້ຕິດຕາມຢູ່ໂຮງຮຽນ ມ.ສ ກ້ອນຕື່ນ ແລະ ປະຖົມກ້ອນຕື່ນໃຫ້ສຳເລັດຕາມແຜນທີໄດ້ກຳນົດໄວ້.

ພາບ-ຂ່າວ: ພັດສະວົງ ບຸນຍະຜົນ

    (ນັກຂ່າວເມືອງປາກທາ)