(ສພຊ) ໃນຕອນເຊົ້າຂອງວັນທີ 3 ມິຖຸນາຜ່ານມາ ທີ່ສະພາແຫ່ງຊາດ (ສພຊ) ທ່ານ ນາງ ສີໃສ ລືເດດມູນສອນ ຮອງປະທານ ສພຊ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ດຣ. ນາງ ຊາແມນ ສະໂຕນ ເອກອັກຄະລັດຖະທູດ[Office1] ເພື່ອແມ່ຍິງ ແລະ ເດັກນ້ອຍ ຂອງກະຊວງການຕ່າງປະເທດ ແລະ ການຄ້າ ແຫ່ງ ອົດສະຕຣາລີ ພ້ອມດ້ວຍຄະນະ ເນື່ອງໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປລາວ ລະຫວ່າງວັນທີ 3-6 ມິຖຸນາ 2019.

ໂອກາດດັ່ງກ່າວ, ທ່ານ ນາງ ສີໃສ ລືເດດມູນສອນ ໄດ້ກ່າວສະແດງຄວາມຍິນດີຕ້ອນຮັບອັນອົບອຸ່ນຕໍ່ທ່ານ ດຣ. ນາງ ຊາແມນ  ສະໂຕນ ພ້ອມດ້ວຍຄະນະ ພ້ອມທັງຕີລາຄາສູງໃນການມາຢ້ຽມຢາມ ສປປລາວ ແລະ ເຂົ້າຮ່ວມເປັນປະທານໃນພິທີເປີດການນໍາໃຊ້ຫລັກສູດການຮຽນ-ການສອນກັບກະຊວງສຶກສາທິການ ແລະ ກິລາ ເຊິ່ງເປັນການສະໜັບສະໜູນ ແລະ ຍົກລະດັບການສຶກສາໃນລະດັບພື້ນຖານ ຂອງ ສປປລາວ, ເປັນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ໂດຍທາງກົງ ແລະ ທາງອ້ອມ ຂອງ ສປປລາວ ຖືເປັນການປະກອບສ່ວນອັນໃຫຍ່ຫລວງ ທັງເປັນການຢືນຢັນສືບຕໍ່ການຮ່ວມມືໃຫ້ເຂົ້າສູ່ລວງເລິກ, ມີປະສິດທິຜົນຍິ່ງໆຂຶ້ນ ແລະ ແຈ້ງກ່ຽວກັບສະພາແຫ່ງຊາດໂດຍຫຍໍ້ ໃນການເຮັດພາລະບົດບາດຕິດຕາມກວດກາສົ່ງເສີມແມ່ຍິງ ແລະ ເດັກນ້ອຍ ເຊິ່ງໃນນີ້ ສພຊ ກໍາລັງຈະດໍາເນີນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII ເຊິ່ງໃນນັ້ນຈະໄດ້ຮັບຮອງເອົາກົດໝາຍກ່ຽວກັບການສົ່ງເສີມບົດບາດຍິງ-ຊາຍ.

ທ່ານ ດຣ. ນາງ ຊາແມນ  ສະໂຕນ ກໍໄດ້ກ່າວສະແດງຄວາມຂອບໃຈຕໍ່ທ່ານຮອງປະທານສະພາແຫ່ງຊາດ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ພ້ອມທັງໄດ້ແຈ້ງໃຫ້ຮູ້ກ່ຽວກັບຈຸດປະສົງການເດີນທາງມາຢ້ຽມຢາມ ສປປລາວ ຄັ້ງນີ້ ກໍເພື່ອສືບຕໍ່ສາຍພົວພັນການຮ່ວມມືຂອງສອງປະເທດໃຫ້ມີປະສິດທິຜົນເພີ່ມຂຶ້ນ ແລະ ພົບປະເຮັດວຽກຮ່ວມກັບກະຊວງສຶກສາທິການ ແລະ ກິລາ ຂອງລາວໃນການເປີດຕໍາລາຮຽນ.

ໃນການຢ້ຽມຂໍ່ານັບຄັ້ງນີ້, ທັງສອງທ່ານໄດ້ແລກປ່ຽນບັນຫາຕ່າງໆເປັນຕົ້ນແມ່ນບັນຫາສິ່ງທ້າທາຍກ່ຽວກັບແມ່ຍິງ ແລະ ເດັກນ້ອຍ, ບັນຫາການສົ່ງເສີມການສຶກສາຂອງແມ່ຍິງ ແລະ ເດັກນ້ອຍຢູ່ໃນເຂດຊົນນະບົດຫ່າງໄກສອກຫລີກ, ບັນຫາການປິ່ນປົວສຸຂະພາບເດັກ, ການຢອດຢາ ແລະ ໃຫ້ວັກຊິນປ້ອງກັນພະຍາດເດັກ, ການປະລະການຮຽນຂອງເດັກ, ການແຕ່ງງານກ່ອນກໍານົດ, ການສົ່ງເສີມບົດບາດສິດສະເໝີພາບຍິງ-ຊາຍຂອງອົງການຕ່າງໆທີ່ຂຶ້ນກັບລັດຖະບານ ແລະ ບັນຫາການສ້າງຄວາມເຂັ້ມແຂງ ແລະ ຍົກລະດັບແມ່ຍິງໃຫ້ຢູ່ໃນຕໍາແໜ່ງຜູ້ນໍາທາງດ້ານການເມືອງໃຫ້ຫລາຍຂຶ້ນ ບໍ່ວ່າຈະເປັນການສົ່ງເສີມທາງດ້ານຕົວຈິງການດໍາລົງຊີວິດ ຫລືວ່າການອອກນິຕິກໍາກົດໝາຍສົ່ງເສີມປົກປ້ອງແມ່ຍິງ ແລະ ເດັກນ້ອຍ.

(ສອນສັກ ວັນວິໄຊ)