ຕອນເຊົ້າ, ວັນທີ 5 ເມສາ 2022 ທ່ານ ນາງ ຈັນມະນີ ດວງພາສຸກ ສະມາຊີກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 2 ທັງເປັນ ສສຊ ທີ່ສັງກັດໃນກໍາມະການຂອງກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ພ້ອມດ້ວຍ ທ່ານ ສຸວັນຟູ ລາວລີ ຮອງປະທານຄະນະກໍາມະການເສດຖະກິດ, ແຜນການ ແລະ ການເງິນ ເຂົ້າຮ່ວມກອງປະຊຸມທາງໄກ ເພື່ອລະດົມຄວາມຄິດກຽວກັບການແກ້ໄຂບັນຫາທາງດ້ານເສດຖະກິດ-ສັງຄົມ ແລະ ວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໃນສະພາບການແຜ່ລະບາດຂອງພະຍາດໂຄວີດ 19; ທີ່ຫ້ອງປະຊຸມທາງໄກຂອງສະພາປະຊາຊົນແຂວງຜົ້ງສາລີ ໂດຍການເປັນປະທານຂອງທ່ານ ໄຊສົມພອນ ພົມວິຫານ ປະທານຄະນະປະຈໍາສະພາແຫ່ງຊາດ; ມີ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທືນ, ລັດຖະມົນຕີ, ຮອງລັດຖະມົນຕີ, ຜູ້ຕາງໜ້າຈາກບັນດາກະຊວງ, ອົງການລັດທີ່ກ່ຽວຂ້ອງ ແລະ ສສຊ ທີ່ສັງກັດໃນກໍາມະການຂອງກໍາມາທິການເສດຖະກີດ, ເຕັກໂນໂລຊີ ແລະ ສິ່ງແວດລ້ອມ ໃນທົ່ວປະເທດເຂົ້າຮ່ວມ.

ທີ່ກອງປະຊູມໄດ້ຮັບຟັງ ທ່ານ ສອນໄຊ ສີພັນດອນ ລາຍງານໂດຍຫຍໍ້ ກ່ຽວກັບການຈັດຕັ້ງປະຕິບັດກ່ຽວກັບການແກ້ໄຂບັນຫາທາງດ້ານເສດຖະກິດ-ສັງຄົມ ແລະ ວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຊື່ງທ່ານ ກໍໄດ້ຍົກໃຫ້ເຫັນເຖິງຜົນກະທົບໂດຍກົງຕໍ່ ການພັດທະນາເສດຖະກິດຂອງລາວ ຈາກການແຜ່ລະບາດຂອງພະຍາດໂຄວິດ 19 ແລະ ຜົນກະທົບໂດຍກົງຈາກວິກິດການເສດຖະກິດຂອງສາກົນ; ຄວາມພະຍາຍາມແກ້ໄຂບັນຫາເສດຖະກິດ-ສັງຄົມ ຈາກທຸກພາກສ່ວນ ຢ່າງມີປະສິດທິພາບ ແລະ ໄດ້ຮັບຜົນດີ ໂດຍສະເພາະ ຜ່ານມາລັດຖະບານກໍໄດ້ມີແຜນດໍາເນີນງານຂອງລັດຖະບານ ແລະ ມະຕິວ່າດ້ວຍການແບ່ງຄວາມຮັບຜິດຊອບໃນການຈັດຕັ້ງຜັນຂະຫຍາຍມະຕິຂອງສະພາແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ. ຈາກນັ້ນ, ຜູ້ແທນກອງປະຊຸມກໍໄດ້ຜັດປ່ຽນກັນປະກອບຄໍາເຫັນ ຢ່າງກົງໄປກົງມາ ເພື່ອປືກສາຫາລື, ແລກປຽນຄວາມຄິດເຫັນ ແລະ ທັງເປັນການລະດົມເອົາແນວທາງແກ້ໄຂບັນຫາສະພາບເສດຖະກິດ-ສັງຄົມຂອງລາວ ແລະ ນໍາໄປເປັນບົດຮຽນໃນການດັດປັບເຂົ້າໃນແບບແຜນວີທີເຮັດວຽກໃນຕໍ່ໜ້າຂອງທຸກພາກສ່ວນ ແລະ ເຮັດໃຫ້ການແກ້ໄຂບັນຫາທາງດ້ານເສດຖະກິດ-ສັງຄົມ ແລະ ການຈັດຕັ້ງປະຕິບັດ ວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໃນສະພາບການແຜ່ລະບາດຂອງພະຍາດໂຄວິດ 19 ໄດ້ຮັບສໍາເລັດ ແລະ ບັນລຸຕາມຄາດໝາຍທີ່ວາງໄວ້.

ພາບ-ຂ່າວ: ນາງ ສຸກສົມພອນ ແກ້ວແສງພະຈັນ