ໃນຕອນເຊົ້າວັນທີ 30 ມີນາ 2022 ຜ່ານມານີ້, ພະແນກພະລັງງານ ແລະ ບໍ່ແຮ່ ແຂວງ ເຊກອງ ນໍາໂດຍທ່ານ ເພັດສະໝອນ ຄອນປະສິດ ຫົວໜ້າພະແນກພະລັງງານ ແລະ ບໍ່ແຮ່ ແຂວງ ເຊກອງ ພ້ອມຄະນະ ໄດ້ນໍາເອົາເຄື່ອງຊ່ວຍເຫຼືອ ຈໍານວນໜຶ່ງ ໄປມອບໃຫ້ແກ່ສະພາປະຊາຊົນແຂວງ ເຊກອງ ເພື່ອນໍາໃຊ້ເຂົ້າໃນການເຄື່ອນໄຫວວຽກງານຂອງສະພາປະຊາຊົນແຂວງ ເຊິ່ງໃຫ້ກຽດກ່າວຮັບໂດຍ ທ່ານ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງ, ໂດຍມີບັນດາທ່ານຄະນະເລຂາທິການ, ຄະນະພະແນກພະລັງງານ ແລະ ບໍ່ແຮ່ແຂວງ, ຫົວໜ້າຂະແໜງ-ຮອງຂະແໜງ ພ້ອມດ້ວຍພະນັກງານວິຊາການເຂົ້າຮ່ວມ.       ເຄື່ອງທີ່ນຳມາມອບໃນຄັ້ງນີ້ປະກອບມີ: ນໍ້າດື່ມ ຈໍານວນ 15 ແຟ໋ກ ແລະ ເຈວລ້າງມື ຈໍານວນ 4 ແກັດ ລວມມູນຄ່າ 1.800.000 ກີບ, ຊຶ່ງເຄື່ອງດັ່ງກ່າວ ສະພາປະຊາຊົນແຂວງ ເຊກອງ ຈະໄດ້ນໍາໃຊ້ເຂົ້າໃນການເຄື່ອນໄຫວວຽກງານຕາມພາລະບົດບາດ, ສິດ ແລະ ໜ້າທີ່ ຂອງສະພາປະຊາຊົນແຂວງຢູ່ 4 ຕົວເມືອງ.        ໂອກາດດັ່ງກ່າວ, ທ່ານ ດົງເພັດ ພະຍົນ ໄດ້ກ່າວສະແດງຄວາມຂອບໃຈ ແລະ ຊົມເຊີຍ ຕໍ່ທ່ານ ຫົວໜ້າພະແນກພະລັງງານ ແລະ ບໍ່ແຮ່ແຂວງ ເຊກອງ ພ້ອມຄະນະ ທີ່ໄດ້ນໍາເອົາເຄື່ອງຊ່ວຍເຫຼືອມາມອບໃຫ້ແກ່ສະພາປະຊາຊົນແຂວງ ເພື່ອເປັນການປະກອບສ່ວນຊຸກຍູ້ເຂົ້າໃນການຈັດຕັ້ງປະຕິບັດວຽກງານຂອງສະພາປະຊາຊົນແຂວງໃນຄັ້ງນີ້ ແລະ ພ້ອມຈະນໍາໃຊ້ເຂົ້າໃນການຈັດຕັ້ງປະຕິບັດວຽກງານໃຫ້ເກີດປະໂຫຍດສູງສຸດ.