ໃນວັນທີ 25 ມີນາ 2022 ທ່ານ ຮສ. ປອ. ລິນຄຳ ດວງສະຫວັນ ກຳມະການສຳຮອງສູນກາງພັກ, ຄະນະປະຈຳພັກສະພາແຫ່ງຊາດ, ກຳມະການຄະນະປະຈຳສະພາແຫ່ງຊາດ, ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຕິດຕາມກວດກາ ແລະ ເຮັດວຽກ ຢູ່ແຂວງຄຳມ່ວນ. ຈຸດປະສົງຕົ້ນຕໍຂອງການລົງເຄື່ອນໄຫວຂອງຄະນະດັ່ງກ່າວ ແມ່ນເພື່ອຊຸກຍູ້, ຕິດຕາມ ການຈັດຕັ້ງປະຕິບັດຄາດໝາຍຕ່າງໆ ທີ່ກຳນົດໃນ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ໄລຍະ 6 ເດືອນ ຕົ້ນປີ 2022 ແລະ ວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ຕາມມະຕິກອງປະຊຸມສະພາແຫ່ງຊາດ; ໂດຍລົງເລິກ ຕິດຕາມກວດກາ ແລະ ຊຸກຍູ້ ການຜະລິດ ເພື່ອທົດແທນການນຳເຂົ້າ ແລະ ເປັນສິນຄ້າສົ່ງອອກ; ການຈັດເກັບລາຍຮັບ ເຂົ້າງົບປະມານແຫ່ງລັດ; ບັນຫາການລົງທຶນຢູ່ເຂດເສດ ຖະກິດສະເພາະພູຂຽວ; ການພັດທະນາເຂດໂລຊິດສະຕິກ; ການເຮັດທົດລອງຂຸດຄົ້ນແຮ່ເຫຼັກ; ການຄຸ້ມຄອງແຮງງານ ແລະ ບັນຫາອື່ນໆທີ່ກ່ຽວຂ້ອງ.

ໃນໂອກາດດັ່ງກ່າວ, ຄະນະ ໄດ້ເຮັດວຽກຮ່ວມກັບສະມາຊິກສະພາແຫ່ງຊາດ ປະຈຳເຂດເລືອກຕັ້ງ ທີ 12 ແຂວງຄຳມ່ວນ ແລະ ສະພາປະຊາຊົນແຂວງຄຳມ່ວນ, ໄດ້ຮັບຟັງການລາຍງານຫຍໍ້ ຈາກພະແນກການທີ່ກ່ຽວຂ້ອງ ກ່ຽວກັບການຈັດຕັ້ງປະຕິບັດ ບັນດາຄາດໝາຍ ແລະ ເນື້ອໃນ ທີ່ຕິດພັນກັບ ມະຕິ ດັ່ງກ່າວ. ພ້ອມກັນນັ້ນ, ກໍຍັງໄດ້ຮັບຟັງການລາຍງານ ບັນຫາໃນການຈັດຕັ້ງປະຕິບັດແຜນໂຄງການຂອງເຂດເສດຖະກິດສະເພາະພູຂຽວ ແລະ ສະພາບການຈັດຕັ້ງປະຕິບັດ ຢູ່ດ່ານສາ ກົນຂົວມິດຕະພາບ 3, ດ່ານສາກົນນາເພົ້າ-ຈໍຫຼໍ່ ແລະ ອື່ນໆ. ໃນການລົງເຄື່ອນໄຫວຕິດຕາມກວດ ກາຄັ້ງນີ້, ຄະນະ ຍັງໄດ້ ຕາງໜ້າກອງທຶນຊ່ວຍເຫຼືອສັງຄົມສະພາແຫ່ງຊາດ ມອບເຄື່ອງຊ່ວຍເຫຼືອໃຫ້ແກ່ ພະແນກສາທາລະນະສຸກແຂວງ ເພື່ອມອບຕໍ່ໃຫ້ແພດ ໝໍ ທີ່ປະຕິບັດໜ້າທີ່ໃນການປ້ອງກັນ, ຄວບຄຸມການແຜ່ລະບາດ ແລະ ປິ່ນປົວ ພະຍາດໂຄວິດ-19.

ພ້ອມນັ້ນ, ຄະນະຍັງໄດ້ລົງຢ້ຽມຢາມພື້ນທີ່ຕົວຈິງ ເປັນຕົ້ນ ດ່ານສາກົນຂົວມິດຕະພາບ 3 ທ່າແຂກ-ນະຄອນພະນົມ ແລະ ເຂດໂລຊິດສະຕິກ.