ຕອນເຊົ້າວັນທີ 23 ມີນາ 2022 ນີ້, ທ່ານ ປອ ລີເບີ ລີບົວປາວ ກໍາມະການສູນກາງພັກ, ປະທານກໍາມາທິການແຜນການ, ການເງິນ ແລະ ການກວດສອບ ພ້ອມດ້ວຍຄະນະ ເຄື່ອນໄຫວເຮັດວຽກຢູ່ແຂວງຈໍາປາສັກ ໂດຍມີຈຸດປະສົງເພື່ອລົງເກັບກໍາຂໍ້ມູນໃນການຕິດຕາມກວດກາວຽກງານໃນຂົງເຂດເສດຖະກິດຂອງແຂວງ ເພື່ອນໍາໄປລາຍງານຕໍ່ກອງປະຊຸມຄະນະປະຈໍາສະພາແຫ່ງຊາດ ທັງເປັນການເກັບກໍາຂໍ້ມູນກະກຽມເນື້ອໃນໃຫ້ແກ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ທີ່ຈະດໍາເນີນໃນກາງປີ 2022 ນີ້

ການເຄື່ອນໄຫວ, ໄດ້ພົບປະກັບ ທ່ານ ປອ ວິໄລວົງ ບຸດດາຄໍາ ກໍາມະການສູນກາງພັກ, ເລຂາພັກແຂວງ, ເຈົ້າແຂວງແຂວງຈໍາປາສັກ ທີ່ຫ້ອງຮັບຮອງຂອງຫ້ອງວ່າການປົກຄອງແຂວງ. ໂດຍທ່ານເຈົ້າແຂວງໆຈໍາປາສັກ ໄດ້ກ່າວຕ້ອນຮັບ ແລະ ລາຍງານຫຍໍ້ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປະຈໍາປີ 2022, ການຈັດຕັ້ງປະຕິບັດມະຕິຂອງສະພາແຫ່ງຊາດ ແລະ ມະຕິຂອງສະພາປະຊາຊົນແຂວງ ໂດຍສະເພາະ 2 ວາລະແຫ່ງຊາດ ເຊິ່ງເຫັນໄດ້ຜົນສໍາເລັດ ແລະ ຂໍ້ຄົງຄ້າງບາງດ້ານທີ່ແຂວງຈະຕ້ອງໄດ້ເພີ່ມທະວີຄວາມສາມາດໃນການຈັດຕັ້ງປະຕິບັດໃຫ້ສໍາເລັດໃນຕໍ່ໜ້າ.

ຈາກນັ້ນ, ຄະນະຂອງທ່ານປະທານກໍາມາທິການແຜນການ, ການເງິນ ແລະ ການກວດສອບ ໄດ້ສືບຕໍ່ເຄື່ອນໄຫວຢູ່ສະພາປະຊາຊົນແຂວງ ໂດຍໄດ້ພົບປະກັບ ທ່ານ ສາຍທອງ ໄຊຍະວົງ ຮອງເລຂາພັກແຂວງ ປະທານສະພາປະຊາຊົນແຂວງຈໍາປາສັກ ມີທ່ານຮອງປະທານສະພາປະຊາຊົນແຂວງ ແລະ ທ່ານ ປະທານກໍາມະການເສດຖະກິດ, ແຜນການ ແລະ ການເງິນ ຢູ່ຫ້ອງຮັບຮອງຂອງສະພາປະຊາຊົນແຂວງ. ພ້ອມທັງ,ໄດ້ເປີດກອງປະຊຸມເພື່ອຮັບຟັງການລາຍງານກ່ຽວກັບສະພາບການການຈັດຕັ້ງປະຕິບັດວຽກງານ ຈາກພະແນກແຜນການ ແລະ ການລົງທຶນ, ພະແນກໂຍທາທິການ ແລະ ຂົນສົ່ງ, ພະແນກການເງິນ, ຄະນະຄຸ້ມຄອງເຂດເສດຖະກິດພິເສດ, ຕ່າງໜ້າຜູ້ພັດທະນາໂຄງການເຂດເສດຖະກິດພິເສດ ແລະ ບໍລິສັດ ກໍ່ສ້າງ-ຂົວທາງ ໄຊສົມບູນ.

ພາຍຫຼັງຮັບຟັງການລາຍງານ, ທ່ານ ປອ ລີເບີ ລີບົວປາວ ປະທານກຳມາທິການແຜນການ, ການເງິນ ແລະ ການກວດສອບສະພາແຫ່ງຊາດ ໄດ້ມີຄໍາເຫັນໂອ້ລົມ ໂດຍທ່ານໄດ້ສະແດງຄວາມຍ້ອງຍໍຊົມເຊີຍມາຍັງສະພາປະຊາຊົນແຂວງ ກໍຄືບັນດາພະແນກການຕ່າງໆທີ່ກ່ຽວຂ້ອງ ຂອງແຂວງ ທີ່ໄດ້ເອົາໃຈໃສ່ຈັດຕັ້ງປະຕິບັດໜ້າທີ່ວຽກງານຈົນໄດ້ຮັບຜົນສຳເລັດຫຼາຍດ້ານ. ພ້ອມທັງເນັ້ນແຕ່ລະພາກສ່ວນຈົ່ງພ້ອມກັນເອົາໃຈໃສ່ຊຸກຍູ້ສົ່ງເສີມການຈັດຕັ້ງປະຕິບັດວຽກງານ ກໍຄືແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປະຈໍາປີ 2022 ແລະ ການປະຕິບັດ 2 ວາລະແຫ່ງຊາດ ໃຫ້ປະສົບຜົນສໍາເລັດຕາມແຜນການທີ່ວາງໄວ້.

ຈາກນັ້ນ, ໃນຕອນບ່າຍ ຄະນະຂອງທ່ານປະທານກຳມາທິການແຜນການ, ການເງິນ ແລະ ການກວດສອບສະພາແຫ່ງຊາດ, ໄດ້ເຄື່ອນໄຫວຢ້ຽມຊົມເຂດເສດຖະກິດພິເສດນິຄົມອຸສະຫະກໍາ ປາກເຊ-ຢີປຸ່ນ ເອັສເອັມອີ ແລະ ຈະສືບຕໍ່ເຄື່ອນໄຫວເບິ່ງພາກສະໜາມໂຄງການກໍ່ສ້າງຍຸດທະສາດຊາຍແດນ ລາວ-ໄທ (ເຂດ ບ້ານໂນນດິນຊາຍ-ບ້ານອ່າງຄໍາ, ເມືອງໂພນທອງ) ອີກດ້ວຍ.