(ສພຊ) ຕອນເຊົ້າວັນພະຫັດ ທີ 21 ກຸມພາ  ຜ່ານທີ່ສະພາແຫ່ງຊາດ, ສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ໄດ້ຕ້ອນຮັບການຢ້ຽມຂໍ່ານັບຂອງສະຫາຍ ເກົາ ຢຸນ ຫລົງ (GAO YUNLONG), ຮອງປະທານສະພາທີ່ປຶກສາການເມືອງ ແຫ່ງ ສປຈີນ, ປະທານມູນນິທິຈີນເພື່ອສັນຕິພາບ ແລະ ການພັດທະນາ ພ້ອມດ້ວຍຄະນະ ເນື່ອງໃນໂອກາດຢ້ຽມຢາມ ສປປລາວ ຢ່າງເປັນທາງການ ລະຫວ່າງວັນທີ 19-22 ກຸມພາ 2019.

ໂອກາດດັ່ງກ່າວ, ສະຫາຍ ນາງ ປານີ ຢາທໍ່ຕູ້ ໄດ້ສະແດງຄວາມຍິນດີຕ້ອນຮັບ  ສະຫາຍ ເກົາ ຢຸນ ຫລົງ ດ້ວຍຄວາມຈິງໃຈ ພ້ອມທັງຕີລາຄາສູງຕໍ່ການເດີນທາງມາຢ້ຽມຢາມ ແລະ ເຮັດວຽກຢູ່ ສປປລາວ ໃນຄັ້ງນີ້ ເຊິ່ງເປັນການນໍາເອົາໄມຕີຈິດມິດຕະພາບ, ຄວາມສາມັກຄີ ມາຍັງ ສປປລາວ ທັງເປັນການປະກອບສ່ວນອັນສໍາຄັນເຂົ້າໃນການເສີມສ້າງສາຍພົວພັນມິີດຕະພາບທີ່ເປັນມູນເຊື້ອ ແລະ ການຮ່ວມມື ແບບຄູ່ຮ່ວມມືຍຸດທະສາດຮອບດ້ານ, ໝັ້ນຄົງຍາວນານ ກໍ່ຄືການກໍ່ສ້າງເປັນຄູ່ຮ່ວມສະຕາກໍາສັງຄົມນິຍົມອັນດຽວກັນ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ. ນອກຈາກນັ້ນ, ສະຫາຍປະທານສະພາແຫ່ງຊາດ ຍັງໄດ້ສະເໜີໃຫ້ສະຫາຍຮອງປະທານສະພາທີ່ປຶກສາການເມືອງແຫ່ງ ສປຈີນ ຈົ່ງສືບຕໍ່ຊຸກຍູ້ການຮ່ວມມືຊ່ວຍເຫລືອໃຫ້ຫລາຍຂຶ້ນກວ່າເກົ່າ ເປັນຕົ້ນແມ່ນ ສະເໜີໃຫ້ມີການເພີ່ມການພົບປະແລກປ່ຽນຄະນະຜູ້ແທນໄປມາຢ້ຽມຢາມເຊິ່ງກັນ ແລະ ກັນ ແລະ ສະເໜີໃຫ້ສົ່ງເສີມຊຸກຍູ້ໃຫ້ປະຊາຊົນຈີນມາທ່ອງທ່ຽວຢູ່ ສປປລາວ ໃຫ້ຫລາຍຂຶ້ນ ໂດຍສະເພາະພາຍໃນປີ 2019 ນີ້ ເຊິ່ງເປັນປີທ່ອງທ່ຽວລາວ-ຈີນ.

ໃນການຢ້ຽມຂໍ່ານັບ, ສະຫາຍ ເກົາ ຢຸນ ຫລົງ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ຈາກປະທານສະພາແຫ່ງຊາດລາວ ພ້ອມທັງລາຍງານໂດຍຫຍໍ້ກ່ຽວກັບສິດພາລະບົດບາດຂອງສະພາທີ່ປຶກສາການເມືອງ ແຫ່ງ ສປຈີນ ແລະ ມູນນິທິຈີນ ເພື່ອສັນຕິພາບ ແລະ ການພັດທະນາ ໃຫ້ຮັບຊາບໂດຍສັງເຂບ; ເຊິ່ງການມາຢ້ຽມຢາມລາວໃນຄັ້ງນີ້ ແມ່ນມີຄວາມພາກພູມໃຈຫລາຍ; ປະເທດລາວສວຍງາມ, ປະຊາຊົນລາວເປັນຄົນມີນໍ້າໃຈ. ພ້ອມນັ້ນຍັງສະແດງຄວາມຍິນດີນໍາເອົາຂໍ້ສະເໜີຕ່າງໆໄປພິຈາລະນາ ແລະ ຕອບສະໜອງຕາມຄວາມຕ້ອງການ, ຈະສືບຕໍ່ປະກອບສ່ວນເສີມຂະຫຍາຍສາຍພົວພັນມິດຕະພາບອັນດີງາມລະຫວ່າງສອງປະເທດ ແລະ ຈະເປັນອີກແຮງໜຶ່ງທີ່ຈະກະຕຸກຊຸກຍູ້ໃຫ້ນັກທ່ອງທ່ຽວຈີນ ກໍຄືປະຊາຊົນຈີນ ໃຫ້ມາທ່ອງທ່ຽວ ສປປລາວ ໃຫ້ຫລາຍເທົ່າທີ່ເຮັດໄດ້.

(ສອນສັກ ວັນວິໄຊ)