(ສພຊ) ໃນວັນທີ່ 21 ມັງກອນ 2019 ທີ່ສະພາແຫ່ງຊາດລາວ, ທ່ານ ອິສທວານ ຈໍກອບ (Istvan Jakab) ຮອງປະທານສະພາແຫ່ງຊາດ ແຫ່ງ ສ. ຮົງກາລີ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບທ່ານ ນາງ ປານີ ຢ່າທໍ່ຕູ້ ປະທານສະພາແຫ່ງຊາດ ແຫ່ງ ສປປລາວ.
ທ່ານ ນາງ ປານີ ຢ່າທໍ່ຕູ້ ໄດ້ກ່າວຕ້ອນຮັບ ແລະ ມີຄວາມພູມໃຈ ພ້ອມທັງຕີລາຄາສູງ ຕໍ່ການມາຢ້ຽມຢາມ ແລະ ເຮັດວຽກຢູ່ ສປປລາວ ຂອງທ່ານຮອງປະທານສະພາຮົງກາລີ ພ້ອມດ້ວຍຄະນະໃນຄັ້ງນີ້ ເຊິ່ງເປັນການປະກອບສ່ວນສໍາຄັນເຂົ້າໃນການເສີມຂະຫຍາຍມູນເຊື້ອສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປລາວ ແລະ ສ. ຮົງກາລີ ເວົ້າລວມ, ເວົ້າສະເພາະ ລະຫວ່າງສະພາແຫ່ງຊາດລາວ ແລະ ສະພາແຫ່ງຊາດຮົງກາລີ ໃຫ້ໄດ້ຮັບການເສີມຂະຫຍາຍຍິ່ງໆຂຶ້ນ. ນະໂອກາດນີ້, ທ່ານຍັງໄດ້ຝາກຄວາມຢ້ຽມຢາມຖາມຂ່າວເຖິງ ພະນະທ່ານ ລາຊໂລ ໂກເວີ (Laszlo Kover) ປະທານສະພາແຫ່ງຊາດ ແຫ່ງ ສ. ຮົງກາລີ ເຊິ່ງທ່ານຍັງສະແດງຄວາມປະທັບໃຈ ຕໍ່ການຕ້ອນຮັບຢ່າງສົມກຽດ ແລະ ອົບອຸ່ນ ໃນລະຫວ່າງທີ່ທ່ານ ພ້ອມດ້ວຍຄະນະຜູ້ແທນຂັ້ນສູງຂອງສະພາແຫ່ງຊາດລາວ ໄປຢ້ຽມຢາມສັນຖະວະໄມຕີ ຢູ່ ສ. ຮົງກາລີ ຢ່າງເປັນທາງການ ໃນເດືອນ ກັນຍາ 2018 ຜ່ານມາ ຫວ່າງບໍ່ດົນມານີ້, ໄດ້ຮູ້ໄດ້ເຫັນການດໍາລົງຊີວິດຂອງປະຊາຊົນຮົງກາລີ ແລະ ມູນເຊື້ອອັນດີງາມທີ່ມີຄວາມຮັກປະເທດຊາດ; ສິ່ງດັ່ງກ່າວນີ້ເປັນສິ່ງທີ່ພວກເຮົາຈະໄດ້ຖອດຖອນບົດຮຽນນໍາ ເຊິ່ງທາງຮົງກາລີໄດ້ເອົາໃຈໃສ່ໃນການພັດທະນາຊັບພະຍາກອນມະນຸດ ອັນນີ້ແມ່ນເປັນປັດໃຈ ແລະ ກໍາລັງແຮງທີ່ຈະພັດທະນາເສດຖະກິດ-ສັງຄົມ ສິ່ງສໍາຄັນຂອງການພົບປະແລກຂອງສອງປະເທດ ກໍຄືຜົນທີ່ໄດ້ຮັບເຊິ່ງໄດ້ມີການຈັດສັນຜູ້ປະກອບການ, ນັກທຸລະກິດທີ່ເດີນໄປນໍາໄດ້ປຶກສາຫາລືແລກປ່ຽນ ແລະ ປັດຈຸບັນກໍໄດ້ມີນັກທຸລະກິດຂອງສອງປະເທດມີຄວາມສົນໃຈການໄປລົງທຶນຂອງກັນ ແລະ ກັນ. ສິ່ງທີ່ສໍາຄັນຂອງການເດີນຢ້ຽມຢາມເຊິ່ງກັນ ແລະ ກັນ ກໍຄືທາງລັດຖະບານລາວ ແລະ ປະຊາຊົນລາວ ໄດ້ຮັບການໃຫ້ການຮ່ວມມື ແລະ ສະໜັບສະໜູນ ສປປລາວ ໃນຫລາຍດ້ານ ເຊັ່ນ: ໃນຂະແໜງການກະສິກໍາ, ການຄົ້ນຄ້ວາພັດທະນາແນວພັນ ແລະ ການຜະລິດສັດ; ການປະມົງ ແລະ ຊົນລະປະທານ; ໂຄງການຮ່ວມມືລ້ຽງສັດ; ລ້ຽງປາ; ຜະລິດຕະພັນອິນຊີ. ໃນຂະແໜງການສຶກສາ ໃນປີ 2014, 2015, 2016 ຮົງກາລີ ໄດ້ໃຫ້ທຶນການສຶກສາແກ່ນັກສຶກສາລາວ ຈໍານວນຈາກ 15 ທຶນ, ໃນປັດຈຸບັນ ແມ່ນເພີ່ມຂຶ້ນເປັນ 50 ທຶນ ແລະ ທຶນຕ່າງໆເພື່ອນໍາໃຊ້ເຂົ້າໃນໂຄງການພັດທະນາຂອງ ສປປ ລາວ ເປັນຕົ້ນ ໂຄງການຄຸ້ມຄອງ ແລະ ບຳບັດນ້ຳເສຍໃນນະຄອນຫລວງວຽງຈັນ; ໂຄງການຄຸ້ມຄອງພົນລະເມືອງ; ບັນດາໂຄງການໃນຂະແໜງກະສຶກຳ. ພິເສດ ໃນເຫດການໄພພິບັດຄູກັນນ້ຳ ເຊປ່ຽນ-ເຊນ້ຳນ້ອຍແຕກ ຢູ່ແຂວງອັດຕະປື, ທາງລັດຖະບານຮົງກາຣີ ກໍ່ໄດ້ໃຫ້ການຊ່ວຍເຫລືອ ລວມມູນຄ່າຈຳນວນ 148.000 ໂດລາສະຫະລັດ ແລະ ຫວັງຢ່າງຍິ່ງວ່າສອງປະເທດຄວນສືບຕໍ່ ແລະ ເພີ່ມການພົບປະແລກກປ່ຽນໃຫ້ຫລາຍກວ່ານີ້.
ຫລັງຈາກນັ້ນ, ທ່ານ ອິສທວານ ຈໍຄອບ ກໍໄດ້ກ່າວຂອບໃຈໃນການໃຫ້ການຕ້ອນຮັບຢ່າງອົບອຸ່ນ ແລະ ສົມກຽດ ທ່ານຍັງໄດ້ບອກກ່ຽວກັບຈຸດປະສົງຂອງການເດີນທາງມາຄັ້ງນີ້ ແລະ ຍັງໄດ້ຮັບສົ່ງການຝາກຄວາມຢ້ຽມຢາມຖາມຂ່າວຂອງພະນະທ່ານປະທານສະພາແຫ່ງຊາດຮົງກາລີມາເຖິງທ່ານດ້ວຍ. ເຊິ່ງທ່ານພ້ອມດ້ວຍຄະນະ ໄດ້ມີການຕິດຕາມຢ່າງໃກ້ຊິດກັບບັນດາເຈົ້າໜ້າທີ່ ແລະ ພະນັກງານທີ່ກ່ຽວຂ້ອງທີ່ເຮັດວຽກໃນໂຄງການຮ່ວມມືຕ່າງໆລະຫວ່າງລາວ-ຮົງກາລີ, ຮົງກາລີ-ລາວ ໄດ້ຮັບຊາບກ່ຽວກັບການປະເມີນຕີລາຄາຂອງໂຄງການຕ່າງໆເຊິ່ງໄດ້ຮັບຜົນເປັນຢ່າງດີ ແລະ ຫວັງຢ່າງຍິ່ງວ່າຈະກັບມາຢ້ຽມຢາມ ສປປລາວ ອີກ.
(ທຸງໄຊ ວິໄລພອນ)