(ສພຊ) ຕອນບ່າຍວັນຈັນທີ 7 ມັງກອນ 2019 ທີ່ສະພາແຫ່ງຊາດ, ສະຫາຍ ນາງ ປານີ ຢາທໍ່ຕູ້ ປະທານສະພາແຫ່ງຊາດ ໄດ້ຕ້ອນຮັບການຢ້ຽມຂໍ່ານັບຂອງສະຫາຍ ຈຽງ ຈາຍດອງ (Jiang Zaidong) ເອກອັກຄະລັດຖະທູດ ແຫ່ງ ສາທາລະນະລັດ ປະຊາຊົນຈີນ ປະຈໍາ ສປປລາວ ເພື່ອເຂົ້າລາຍງານຕົວໃນການມາຮັບໜ້າທີ່ເປັນເອກອັກຄະລັດຖະທູດຄົນໃໝ່ ແລະ ປຶກສາຫາລືກ່ຽວກັບການຮ່ວມມືໃນຂອບຂອງສະພາແຫ່ງຊາດ ລາວ-ຈີນ.

ໂອກາດດັ່ງກ່າວ, ສະຫາຍ ນາງ ປານີ ຢາທໍ່ຕູ້ ໄດ້ສະແດງຄວາມຍິນດີຕ້ອນຮັບ  ສະຫາຍ ຈຽງ ຈາຍດອງ ດ້ວຍຄວາມຈິງໃຈ ພ້ອມທັງຊົມເຊີຍທີ່ໄດ້ຮັບຄວາມເຊື່ອໝັ້ນຈາກລັດຖະບານ ແລະ ປະຊາຊົນຈີນ ແຕ່ງຕັ້ງໃຫ້ມາດໍາລົງຕໍາແໜ່ງເອກອັກຄະລັດຖະທູດແຫ່ງ ສປຈີນ ປະຈໍາ ສປປລາວ; ພ້ອມທັງຕີລາຄາສູງການພົວພັນຮ່ວມມື ລາວ-ຈີນ ໃນໄລຍະຜ່ານມາ ເປັນຕົ້ນແມ່ນການຮ່ວມມືສອງຝ່າຍ ລັດຖະບານ ກໍຄືປະຊາຊົນຈີນ ທີ່ໄດ້ສະໜັບສະໜູນທາງດ້ານທຶນຮອນເຕັກນິກວິຊາການ ທີ່ເລັ່ງໃສ່ການພັດທະນາພຶ້ນຖານໂຄງລ່າງຕ່າງໆ ລວມທັງການສະໜັບສະໜູນເຊິ່ງກັນ ແລະ ກັນ ໃນເວທີສາກົນ. ພ້ອມນັ້ນ ສະຫາຍປະທານສະພາແຫ່ງຊາດຍັງໄດ້ສະເໜີ ໃຫ້ສະຫາຍເອກອັກຄະລັດຖະທູດ ຈົ່ງສືບຕໍ່ຮ່ວມມືຊ່ວຍເຫລືອໃຫ້ຫລາຍຂຶ້ນກວ່າເກົ່າ ເປັນຕົ້ນແມ່ນໃຫ້ນໍາເອົາຊ່ຽວຊານວິຊາການຈາກສະພາແຫ່ງຊາດ ສປຈີນ ມາເຝິກອົບຮົມຖອດຖອນບົດຮຽນຄວາມຮູ້ວິຊາການດ້ານການເປັນເສນາທິການໃຫ້ແກ່ສະພາແຫ່ງຊາດ ໃຫ້ພະນັກງານວິຊາການຂອງສະພາແຫ່ງຊາດລາວ ຢູ່ ສປປລາວ, ສະເໜີໃຫ້ເພີ່ມທະວີການພົບປະແລກປ່ຽນຄະນະຜູ້ແທນໄປມາຢ້ຽມຢາມເຊິ່ງກັນ ແລະ ກັນຂອງສອງສະພາແຫ່ງຊາດໃຫ້ແໜ້ນແຟ້ນ ແລະ ຫລາຍຂຶ້ນກວ່າເກົ່າ.

ໃນການຢ້ຽມຂໍ່ານັບ, ສະຫາຍ ຈຽງ ຈາຍດອງ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ຈາກທ່ານປະທານສະພາແຫ່ງຊາດ ພ້ອມທັງກ່າວວ່າຈະນໍາເອົາຂໍ້ສະເໜີຕ່າງໆໄປສະເໜີຕໍ່ລັດຖະບານກໍ່ຄືສະພາແຫ່ງຊາດ ສປຈີນ ໃຫ້ຮັບຊາບທຸກຂໍ້, ຈະສືບຕໍ່ເສີມຂະຫຍາຍສາຍພົວພັນມິດຕະພາບອັນດີງາມລະຫວ່າງສອງປະເທດ ແລະ ຈະປະຕິບັດໜ້າທີ່ເອກອັກຄະລັດຖະທູດໃຫ້ໄດ້ຮັບໝາກຜົນດີຂຶ້ນກວ່າເກົ່າ ແລະ ຈະເປັນອີກແຮງໜຶ່ງທີ່ຈະກະຕຸກຊຸກຍູ້ສາຍພົວພັນຂອງສອງສະພາແຫ່ງຊາດ ລາວ-ຈີນ ໃຫ້ເຂົ້າສູ່ລວງເລິກ.

(ສອນສັກ ວັນວິໄຊ)