(ສພຊ) ວັນທີ 27 ທັນວາ 2018 ທີ່ສະພາແຫ່ງຊາດ, ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ໄດ້ຕ້ອນຮັບທ່ານ ທາເຄໂອະ ຄາວາມຸລະ ປະທານກໍາມາທິການງົບປະມານ ສະພາຕໍ່າຍີ່ປຸ່ນ ທັງເປັນປະທານຄະນະມິດຕະພາບລັດຖະສະພາຢີ່ປຸ່ນ-ລາວ ພ້ອມດ້ວຍຄະນະ ໃນໂອກາດທີ່ເດີນທາງມາຢ້ຽມຢາມ ສປປລາວ ລະຫວ່າງວັນທີ 26-28 ທັນວາ 2018.

ທ່ານ ນາງ ປານີ ຢາທໍ່ຕູ້ ໄດ້ກ່າວສະແດງຄວາມຍິນດີຕ້ອນຮັບຕໍ່ຄະນະຜູ້ແທນສະພາຕໍ່າຢີ່ປຸ່ນ ໃນການເດີນທາງມາຢ້ຽມຢາມໃນຄັ້ງນີ້ ແລະ ຍັງໄດ້ແຈ້ງໃຫ້ຊາບໂດຍຫຍໍ້ກ່ຽວກັບສະພາບລວມຂອງການປະຕິບັດໜ້າທີ່ ແລະ ພາລະບົດບາດຂອງສະພາແຫ່ງຊາດ. ນອກນັ້ນ, ທ່ານ ຍັງໄດ້ແຈ້ງໃຫ້ຊາບກ່ຽວກັບບັນຫາ ແລະ ຂໍ້ຫຍຸ້ງຍາກໃນການປະຕິບັດແຜນພັດທະນາເສດຖະກິດ-ສັງຄົມ ເປັນຕົ້ນທາງດ້ານທຶນເພື່ອເຂົ້າໃຊ້ໃນໂຄງການຕ່າງໆ, ທາງດ້ານຄວາມຮູ້ຄວາມສາມາດຂອງບຸກຄະລາກອນ,ບົດຮຽນຕ່າງໆ ແລະ ທາງດ້ານອື່ນໆອີກ; ທ່ານຍັງໄດ້ສະເໜີໃຫ້ເພີ່ມທະວີການພົບປະແລກປ່ຽນໃຫ້ຫລາຍຂຶ້ນກວ່າເກົ່າ.

ຈາກນັ້ນ, ທ່ານ ທາເຄໂອະ ຄາວາມຸລະ ກໍ່ໄດ້ກ່າວສະແດງຄວາມດີໃຈຕໍ່ການຕ້ອນຮັບຢ່າງອົບອຸ່ນໃນຄັ້ງນີ້ ແລະ ກໍ່ໄດ້ຮັບເອົາຄໍາສະເໜີຕ່າງໆ ແລະ ຜົນຂອງການພົບປະໃນຄັ້ງນີ້ ເພື່ອນຳໄປສະເໜີຕໍ່ອົງການທີ່ກ່ຽວຂ້ອງຂອງຢ່ປຸ່ນ; ໃນການເດີນທາງມາຢ້ຽມຢາມຄັ້ງນີ້, ກໍ່ເພື່ອສືບຕໍ່ສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີງາມທີ່ມີມາແຕ່ດົນນານຂອງສອງປະເທດ ຢີ່ປຸ່ນ-ລາວ ເວົ້າລວມ, ເວົ້າສະເພາະ ແມ່ນລະຫວ່າງສະພາແຫ່ງຊາດຍີ່ປຸ່ນ ແລະ ສະພາແຫ່ງຊາດລາວ; ພ້ອມທັງເປັນການພົບປະແລກປ່ຽນບົດຮຽນໃນການປະຕິບັດວຽກງານຕາມສິດ ແລະ ພາລະບົດບາດ ໃນຂົງເຂດວຽກງານນິຕິບັນຍັດ ລະຫວ່າງສອງຄະນະມິດຕະພາບລັດຖະສະພາ ລາວ-ຢີ່ປຸ່ນ, ຢີ່ປຸ່ນ-ລາວ.

ຄະນະຜູ້ແທນສະພາຕໍ່າຂອງຢີ່ປຸ່ນ ຍັງໄດ້ເຂົ້າຢ້ຽມຂໍ່ານັບພະນະທ່ານ ພັນຄໍາ ວິພາວັນ ຮອງປະທານປະເທດ ແຫ່ງ ສປປລາວ ທີ່ສໍານັກງານປະທານປະເທດ (ຫໍຄໍາ); ເຂົ້າຢ້ຽມຂໍ່ານັບ  ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປລາວ ທີ່ສໍານັກງານນາຍົກລັດຖະມົນຕີ.

(ທຸງໄຊ ວິໄລພອນ)