ໃນລະຫວ່າງວັນທີ 9-11 ມີນາ 2022 ນີ້ ທ່ານ ນາງ ຄໍາເສັງ ທຸມມະວົງສາ ສະມາຊິກສະພາປະຊາຊົນແຂວງ (ສສຂ), ຮອງປະທານ ສະພາປະຊາຊົນແຂວງ, ທ່ານ ພັທ ສີດາວົງ ດວງປານີ ສະມາຊິກສະພາແຫ່ງຊາດ (ສສຊ) ປະຈໍາເຂດທີ 16 ແຂວງ ເຊກອງ ພ້ອມດ້ວຍທ່ານ ແສງລາຕີ ຫຼອມຍະເດດ ສສຂ, ຫົວໜ້າໜ່ວຍເລືອກຕັ້ງ ປະຈໍາເມືອງ ທ່າແຕງ ພ້ອມຄະນະ ໄດ້ລົງເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ IX ແລະສະພາປະຊາຊົນແຂວງ ຊຸດທີ II ຢູ່ເມືອງ ທ່າແຕງ ແຂວງ ເຊກອງ ລວມທັງໝົດ 5 ຈຸດຄື: ຈຸດທີ 1 ຢູ່ບ້ານປະແຫຼງເໜືອ; ຈຸດທີ 2 ຢູ່ບ້ານຫົວເຊໂດນ, ຈຸດທີ 3 ຢູ່ບ້ານຕະກຽວ; ຈຸດທີ 4 ຢູ່ບ້ານ ສະທົວໃຕ້ ແລະ ຈຸດທີ 5 ຢູ່ບ້ານ ຢຶບ ໂດຍມີຄະນະກຸ່ມ, ອໍານາດການປົກຄອງບ້ານ, ພະນັກງານຄູ-ອາຈານ ພ້ອມດ້ວຍພໍ່ແມ່ປະຊາຊົນເຂົ້າຮ່ວມຮັບຟັງ.
ໂອກາດນີ້, ບັນດາຜູ້ເຂົ້າຮ່ວມໄດ້ຮັບຟັງຫຼາຍບັນຫາທີ່ສຳຄັນ ໂດຍສະເພາະແມ່ນ ບັນດາເນື້ອໃນມະຕິຕ່າງໆທີ່ສະພາແຫ່ງຊາດ ແລະ ສະພາປະຊາຊົນແຂວງ ຮັບຮອງໃນກອງປະຊຸມສະໄໝສາມັນເທື່ອທີ 2 ຂອງສະພາ 2 ຂັ້ນ ເຊິ່ງຕິດພັນກັບການເຜີຍແຜ່ເຊື່ອມຊຶມ ແລະ ຜັນຂະຫຍາຍ 2 ວາລະແຫ່ງຊາດ ແລະ ບັນດາປະກົດການຫຍໍ້ທໍ້ຕ່າງໆທີ່ເກີດຂຶ້ນຢູ່ໃນສັງຄົມປະຈຸບັນ.
ພ້ອມນີ້, ຍັງໄດ້ຮັບຟັງກ່ຽວກັບວຽກງານໃນຂົງເຂດວັດທະນະທຳ-ສັງຄົມ ເປັນຕົ້ນວຽກງານສາທາລະນະສຸກ ໂດຍສະເພາະການຄວບຄຸມ, ການຕ້ານ ແລະ ສະກັດກັ້ນ ການແຜ່ລະບາດຂອງພະຍາດອັກເສບປອດ covid-19, ດ້ານສຸຂາອະນາໄມ 3 ສະອາດ, ວຽກງານສຶກສາທິການ ແລະ ກິລາ, ວຽກງານຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ວຽກງານແຮງງານ ແລະ ສະຫວັດດີການສັງຄົມເຫຼົ່ານີ້ເປັນຕົ້ນ. ພ້ອມນັ້ນ, ຍັງໄດ້ເປີດໂອກາດໃຫ້ພໍ່ແມ່ປະຊາຊົນໄດ້ມີການປະກອບຄໍາຄິດຄໍາເຫັນ ແລະ ນຳສະເໜີຫຼາຍບັນຫາ ໂດຍສະເພາະຄວາມຕ້ອງການດ້ານວຽກງານສຶກສາທິການ ແລະ ກິລາ, ວຽກງານສາທາລະນະສຸກ, ວຽກງານຄົມມະນາຄົມ, ໄຟຟ້າ, ນໍ້າປະປາ, ວຽກງານວັດທະນະທຳສັງຄົມ ແລະ ວຽກງານແຮງງານສະຫວັດດິການ-ສັງຄົມ ເພື່ອເປັນຂໍ້ມູນນໍາໄປສະເໜີຕໍ່ຄະນະນໍາຂັ້ນເທິງ ກໍຄືພາກສ່ວນທີ່ກ່ຽວຂ້ອງໄດ້ຄົ້ນຄວ້າ, ພິຈາລະນາ ແລະ ປັບປຸງແກ້ໄຂໃນຕໍ່ໜ້າ.
ຈາກນັ້ນ, ກໍໄດ້ມອບເຄື່ອງຊ່ວຍເຫຼືອຈໍານວນໜຶ່ງ ໃຫ້ແກ່ອໍານາດການປົກຄອງບ້ານ ໄດ້ນໍາໄປມອບຕໍ່ໃຫ້ແກ່ໂຮງຮຽນ ແລະ ຄອບຄົວທີ່ທຸກຍາກຂາດເຂີນ ໃນນັ້ນມີ ໝີ່ໄວໆ, ເກືອ, ແປ້ງນົວ, ເຈວລ້າງມື, ອຸປະກອນການສຶກສາ ແລະ ກິລາຈໍານວນໜຶ່ງ.
#ໂດຍ:ນາລີວັນ