ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

            (ສພຊ) ກອງປະຊຸມປຶກສາຫາລື ແລະ ສະຫລຸບການເຄື່ອນໄຫວວຽກງານຂອງຄະນະສະມາຄົມມິດຕະພາບລາວ-ກຳປູເຈຍ ໄລຍະຜ່ານມາ (2016-2021) ແລະ ວາງທິດທາງແຜນການໃນຕໍ່ໜ້າ (2022-2026) ໄດ້ຈັດຂຶ້ນໃນວັນທີ 5 ເມສາ 2022 ທີ່ສະພາແຫ່ງຊາດ ໂດຍການເປັນປະທານຂອງທ່ານ ຄຳໃບ ດຳລັດ ຮອງປະທານສະພາແຫ່ງຊາດ, ປະທານສະມາຄົມມິດຕະພາບລາວ-ກຳປູເຈຍ, ເຂົ້າຮ່ວມມີຄະນະບໍລິຫານງານສະມາຄົມມິດຕະພາບລາວ-ກຳປູເຈຍ ແລະ ພາກສ່ວນກ່ຽວຂ້ອງ.
​             ກອງປະຊຸມໄດ້ຮັບຟັງການລາຍງານໂດຍຫຍໍ້ ກ່ຽວກັບການເຄື່ອນໄຫວວຽກງານຂອງສະມາຄົມມິດຕະພາບລາວ-ກຳປູເຈຍ ໄລຍະຜ່ານມາ (2016-2021) ແລະ ທິດທາງແຜນການໃນຕໍ່ໜ້າ (2022-2026); ລາຍງານແຜນການເຄື່ອນໄຫວພົບປະແລກປ່ຽນລະຫວ່າງສະມາຄົມມິດຕະພາບລາວ-ກຳປູເຈຍ ແລະ ກຳປູເຈຍ-ລາວ ໃນປີ 2022.
​            ຈາກນັ້ນ, ຜູ້ເຂົ້າຮ່ວມກອງປະຊຸມ ໄດ້ພ້ອມກັນປະກອບຄຳເຫັນຢ່າງກົງໄປກົງມາ ເພື່ອເຮັດໃຫ້ການເຄື່ອນ ໄຫວວຽກງານຂອງສະມາຄົມມີຄວາມສາມັກຄີເປັນເອກະພາບ, ມີຄວາມຮັບຜິດຊອບສູງ ແລະ ຮັບປະກັນປະສິດທິຜົນ.
            ໃນຕອນທ້າຍ, ກອງປະຊຸມໄດ້ສະຫລຸບ ແລະ ເຫັນດີເປັນເອກະພາບກັນດັ່ງນີ້: 1). ມອບໃຫ້ກົມພົວພັນອົງການຈັດຕັ້ງສາກົນ III ຂອງຄະນະພົວພັນຕ່າງປະເທດສູນກາງພັກ ສ້າງຮ່າງນິຕິກໍາກ່ຽວກັບການຈັດຕັ້ງ ແລະ ການ ເຄື່ອນໄຫວຂອງຄະນະສະມາຄົມມິດຕະພາບລາວ-ກໍາປູເຈຍ; 2). ກະກຽມແຜນການຕ້ອນຮັບ ການມາຢ້ຽມຢາມພົບປະ ຂອງສະມາຄົມມິດຕະພາບ ກໍາປູເຈຍ-ລາວ ໃນເດືອນກໍລະກົດ ຫລື ເດືອນສິງຫາ ປີ 2022 ຢູ່ນະຄອນຫລວງວຽງຈັນ ຫລື ແຂວງ ທີ່ຕິດຈອດຊາຍແດນ; 3). ກະກຽມໃນການຢ້ຽມຢາມພົບປະຂອງສະມາຄົມມິດຕະພາບ ລາວ-ກໍາປູເຈຍ ຢູ່ປະເທດກໍາປູເຈຍ ໃນເດືອນທັນວາ 2022; 4). ກອງປະຊຸມ ເຫັນດີຄົ້ນຄວ້າສະເໜີແຕ່ງຕັ້ງຄະນະທີ່ປຶກສາຂອງຄະນະສະມາຄົມມິດຕະພາບລາວ-ກຳປູເຈຍ; 5). ເຫັນດີຊຸກຍູ້ການຄົ້ນຄວ້າສະເໜີສ້າງເຂດເສດຖະກິດຊາຍແດນ (ສາມາດນຳໃຊ້ເງິນສອງສະກຸນໃນການແລກປ່ຽນຊື້-ຂາຍ ກັນໄດ້); 6). ສືບຕໍ່ຕິດຕາມ, ການແຕ່ງຕັ້ງຄະນະສະມາຄົມມິດຕະພາບລາວ-ກໍາປູເຈຍ ຢູ່ຂັ້ນທ້ອງຖິ່ນ (ແຂວງຈຳປາສັກ ແລະ ແຂວງອັດຕະປື); 7). ເຫັນດີສ້າງກອງທຶນຂອງສະມາຄົມ ເພື່ອສ້າງເງື່ອນໄຂປະກອບສ່ວນ ເຮັດໃຫ້ການເຄື່ອນໄຫວວຽກງານຂອງສະມາຄົມ ມີປະສິດທິພາບ, ປະສິດທິຜົນສູງຂຶ້ນ; 8 ). ເຫັນດີສ້າງກາລະນຶກ (ມິດຕະພາບ) ຂອງສະມາຄົມ ແລະ ປຶ້ມບັນທຶກທີ່ມີໂລໂກຂອງສະມາຄົມຂຶ້ນ.
(ພາບ ແລະຂ່າວ: ກົງທະນູຄຳ ພິພັດເສລີ)