1. ສຸມໃສ່ແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ໂດຍສະເພາະການເໜັງຕີງຂອງອັດຕາແລກປ່ຽນ, ການເໜັງຕີງຂອງລາຄາສິນຄ້າ, ບັນຫາເງິນເຟີ້ ແລະ ໜີ້ສິນຕ່າງປະເທດ ດ້ວຍການບັງຄັບໃຊ້ບັນດາມາດຕະ ການທີ່ວາງອອກ ໃຫ້ປາກົດຜົນເປັນຈິງ ແລະ ເປັນຮູບປະທໍາຫຼາຍຂຶ້ນກວ່າເກົ່າ, ໃນນັ້ນ ຈະຄົ້ນຄວ້າປັບປຸງນະໂຍບາຍອັດຕາດອກເບ້ຍເງິນຝາກທີ່ເປັນເງິນກີບ ເພີ່ມຂຶ້ນໃນໄລຍະເວລາໃດໜຶ່ງ ເພື່ອສ້າງຄຸນຄ່າຂອງເງິນກີບໃຫ້ສູງຂຶ້ນ, ສ້າງຄວາມເຊື່ອໝັ້ນໃຫ້ແກ່ສັງຄົມໃນການຖືຄອງເງິນກີບ, ປະຕິບັດການຊຳລະສະສາງຢູ່ພາຍໃນປະເທດດ້ວຍເງິນກີບ ແລະ ປະຕິບັດການລວມສູນເງິນຕາຕ່າງປະເທດຢູ່ທະນາຄານ.

2. ສຸມໃສ່ການເກັບລາຍຮັບງົບປະມານປີ 2024 ໃຫ້ໄດ້ຕາມແຜນ ຫຼື ເກີນແຜນ ໃຫ້ເປັນປີທີ 4 ຕິດຕໍ່ກັນ, ໃນນັ້ນ ສຸມໃສ່ຂະຫຍາຍຖານລາຍຮັບໃໝ່ໃຫ້ເພີ່ມຂຶ້ນ, ເກັບລາຍຮັບຈາກຖານທີ່ມີຢູ່ແລ້ວໃຫ້ຄົບຖ້ວນ, ເລັ່ງຫັນການເກັບລາຍຮັບໃຫ້ເປັນທັນສະໄໝໃຫ້ກວ້າງ ແລະ ກວມເອົາຫຼາຍຂົງເຂດ ໂດຍສະເພາະການເກັບລາຍຮັບຢູ່ດ່ານ, ລາຍຮັບຈາກຄ່າທໍານຽມ, ຄ່າບໍລິການ ແລະ ອື່ນໆ; ສືບຕໍ່ປະຕິບັດລາຍຈ່າຍງົບປະມານຢ່າງຮັດກຸມ, ປະຢັດມັດທະຍັດ ໂດຍໃຫ້ບຸລິມະສິດການເບີກຈ່າຍເງິນເດືອນ, ເງິນອຸດໜູນ, ການຊຳລະໜີ້ສິນຕ່າງປະເທດ, ການເປັນປະທານກອງປະຊຸມອາ ຊຽນ; ສ່ວນການຈັດຊື້ໃໝ່ ຖ້າບໍ່ຈຳເປັນແທ້ໆ ແມ່ນຈະໄດ້ໂຈະໄວ້ກ່ອນ.

3. ສືບຕໍ່ປັບປຸງສະພາບແວດລ້ອມ ແລະ ນະໂຍບາຍສົ່ງເສີມການລົງທຶນ ແລະ ການດໍາເນີນທຸລະກິດ ຢູ່ ສປປ ລາວ ໃຫ້ແຂງແຮງກວ່າເກົ່າ ແລະ ສາມາດຕັດຂັ້ນຂອດທີ່ອຸດຕັນອອກໃຫ້ໄດ້; ສຸມໃສ່ຕິດຕາມກວດກາບັນດາໂຄງການລົງທຶນທີ່ໄດ້ຮັບອະນຸມັດຜ່ານມາ, ໂຄງການໃດທີ່ບໍ່ມີຄວາມຄືບໜ້າ ຫຼື ມີຄວາມຄືບໜ້າຊ້າ ກໍໃຫ້ເຊີນບໍລິສັດມາແຈ້ງເຕືອນ ແລະ ເຮັດບົດບັນທຶກໄວ້ ພ້ອມທັງກຳນົດເວລາໃຫ້ບໍລິສັດໄປແກ້ໄຂ, ຖ້າແກ້ໄຂບໍ່ໄດ້ ແມ່ນຈະໄດ້ກ້າວໄປສູ່ການຍົກເລີກ ຫຼື ແຈ້ງສິ້ນສຸດສັນຍາ ໂດຍສະເພາະໂຄງການກໍ່ສ້າງທາງດ່ວນ, ໂຄງການບໍ່ແຮ່.

4. ສຸມໃສ່ແກ້ໄຂບັນຫາການສະໜອງພະລັງງານໄຟຟ້າບໍ່ພຽງພໍກັບຄວາມຕ້ອງການ ດ້ວຍການເລັ່ງຊຸກຍູ້ບັນດາໂຄງການທີ່ໄດ້ຮັບອະນຸມັດຜ່ານມາ ໃຫ້ກໍ່ສ້າງສໍາເລັດຕາມແຜນ COD ທີ່ໄດ້ກຳນົດໄວ້, ເລັ່ງພັດທະນາພະລັງງານລົມ, ພະລັງງານແສງອາທິດ ທີ່ສາມາດກໍ່ສ້າງໄວ ໂດຍສະເພາະພະລັງງານແສງອາທິດໃນເຂດອ່າງນໍ້າໜ້າເຂື່ອນໄຟຟ້າ, ເຂດທີ່ດິນປອກໂລ້ນ, ດິນຫີນແຮ່ທີ່ບໍ່ເໝາະສົມແກ່ການພັດທະນາກະສິກຳ; ພ້ອມກັນນັ້ນ, ກໍໃຫ້ເລັ່ງກໍ່ສ້າງສາຍສົ່ງໄຟຟ້າ ເພື່ອ ລໍາລຽງເອົາກະແສໄຟຟ້າຈາກບ່ອນທີ່ມີຫຼາຍ ແລະ ເຫຼືອນໍາໃຊ້ ໄປສູ່ບ່ອນຂາດແຄນ ແລະ ເຊື່ອມຕໍ່ກັບປະເທດໃກ້ຄຽງ.

5. ສຸມໃສ່ການຈັດຕັ້ງປະຕິບັດສິນເຊື່ອເພື່ອກະຕຸ້ນເສດຖະກິດ ແລະ ສິນເຊື່ອເພື່ອກະຈາຍລົງສູ່ທ້ອງຖິ່ນ ຕາມຂໍ້ຕົກລົງ 93/ນຍ ໃຫ້ເປັນຮູບປະທຳ, ພ້ອມກັນນັ້ນ ກໍໃຫ້ຮີບຮ້ອນອອກເປັນນິຕິກຳເພື່ອກຳນົດເງື່ອນໄຂໃນການຄັດເລືອກບໍລິສັດ ເພື່ອປະຕິບັດນະໂຍບາຍການສະໜອງທຶນໃນການເກັບຊື້ຜະລິດຕະພັນກະສິກຳ ເພື່ອສົ່ງອອກໄປຕ່າງປະ ເທດ ແລະ ນຳເງິນຕາຕ່າງປະເທດ ມາຂາຍໃຫ້ທະນາຄານຄືນ.

6. ເລັ່ງຫັນໂຄງການທົດລອງແຮ່ທາດ ໄປສູ່ກົນໄກປົກກະຕິຕາມກົດໝາຍກຳນົດ, ຢຸດຕິການອະນຸຍາດໃຫ້ຂຸດຄົ້ນຄໍາຕົກຂ້ອນຢ່າງເດັດຂາດ; ພ້ອມກັນນັ້ນ, ພາຍຫຼັງທີ່ສະພາແຫ່ງຊາດຮັບຮອງເອົາຜົນການປະເມີນຄືນບັນດາໂຄງການບໍ່ແຮ່ແລ້ວ, ລັດຖະບານຈະໄດ້ຮີບຮ້ອນປະຕິບັດມາດຕະການຕ່າງໆຢ່າງເຂັ້ມງວດ ໂດຍສະເພາະແມ່ນໂຄງການທີ່ຖືກຈັດໃນປະເພດອ່ອນ ແລະ ອ່ອນຫຼາຍ (C+ ແລະ C) ພ້ອມກັນນັ້ນ ຈະໄດ້ສຸມໃສ່ມາດຕະການຄຸ້ມຄອງການຂຸດຄົ້ນ ແລະ ປຸງແຕ່ງແຮ່ຄໍາ, ແຮ່ຫາຍາກ ແລະ ອື່ນໆ ທັງຈະໄດ້ຮີບຮ້ອນຄົ້ນຄວ້ານະໂຍບາຍຕົວຈິງຈຳນວນໜຶ່ງເພື່ອໃຫ້ມີການສ້າງໂຮງງານປຸງແຕ່ງແຮ່ສໍາເລັດຮູບຢູ່ລາວ.

7. ເລັ່ງປັບປຸງຂັ້ນຂອດການບໍລິການຂົນສົ່ງສິນຄ້າຜ່ານດ່ານຊາຍແດນ ແລະ ບັນດາທ່າບົກ ໃຫ້ງ່າຍດາຍ, ວ່ອງ ໄວ, ສະດວກກວ່າເກົ່າ ແລະ ຫຼຸດຄ່າໃຊ້ຈ່າຍທີ່ບໍ່ຈໍາເປັນ ເພື່ອສາມາດແຂ່ງຂັນໃນການເຊື່ອມຈອດ ແລະ ເຊື່ອມໂຍງກັບສາກົນ ໂດຍເລັ່ງຄົ້ນຄວ້າການເກັບຄ່າບໍລິການຜ່ານທ່າບົກ, ການຂົນສົ່ງສິນຄ້າຜ່ານທາງລົດໄຟ, ລົດບັນທຸກຂົນສົ່ງສິນຄ້າ, ຄ່າທໍານຽມ, ຄ່າບໍລິການຜ່ານດ່ານ ໃຫ້ເໝາະສົມ ແລະ ເປັນເອກະພາບກັນ.

8. ສຸມໃສ່ຍູ້ແຮງການສົ່ງເສີມການຜະລິດກະສິກຳ ເພື່ອຄໍ້າປະກັນສະບຽງອາຫານ, ທົດແທນການນໍາເຂົ້າ ແລະເປັນສິນຄ້າສົ່ງອອກໃຫ້ຫຼາຍ; ສືບຕໍ່ສົ່ງເສີມຈຸນລະວິສາຫະກິດ ແລະ ວິສາຫະກິດຂະໜາດນ້ອຍ ແລະ ຂະໜາດກາງ ໃຫ້ແຂງແຮງກວ່າເກົ່າ ແລະ ສືບຕໍ່ປະຕິຮູບລັດວິສາຫະກິດໃຫຍ່ ໃຫ້ສຳເລັດຕາມແຜນການທີ່ວາງໄວ້.