ຄະນະກໍາມະການລະດັບຊາດ ປັບປຸງລັດຖະທຳມະນູນແຫ່ງ ສປປ ລາວ ຈັດກອງປະ ຊຸມປະເມີນຜົນການຈັດຕັ້ງປະຕິບັດລັດຖະທຳມະນູນ ແຫ່ງ ສປປ ລາວ ສະບັບປີ 2015 ຢູ່ທີ່ສະໂມສອນແຂວງຫລວງນ້ຳທາ ໃນວັນທີ 23 ກໍລະກົດ 2024 ໂດຍການເປັນປະທານຂອງ ທ່ານ ຄຳໄຫລ ສີປະເສີດ ກຳມະການສູນກາງພັກ ຮອງປະທານສູນກາງແນວລາວສ້າງຊາດ ກຳມະການຂອງຄະນະກຳມະການລະດັບຊາດ, ມີກຳມະການປະຈຳພັກແຂວງ,ກຳມະການປະຈຳສະພາປະຊາຊົນແຂວງ,ຮອງເຈົ້າແຂວງ, ເຈົ້າເມືອງ,ບັນດາທ່ານ ສສຊ, ສສຂ ແລະ ພະແນກການກ່ຽວຂ້ອງຂອງແຂວງເຂົ້າຮ່ວມ.

ເພື່ອພ້ອມກັນ ສະຫລຸບຕີລາຄາການຈັດຕັ້ງປະຕິບັດລັດຖະທຳມະນູນ ໃນໄລຍະ 9 ປີ ທີ່ຜ່ານມາໃນທົ່ວປະເທດ ເວົ້າລວມ ເວົ້າສະເພາະ ກໍ່ຄືທົ່ວແຂວງຫລວງນ້ຳທາໃຫ້ເຫັນໄດ້ຂໍ້ສະດວກ, ຂໍ້ຫຍຸ້ງຍາກ, ຜົນສຳເລັດ, ບັນຫາຄົງຄ້າງ ແລະ ສາເຫດ ທີ່ສອດຄ່ອງ ຫລື ບໍ່ສອດຄ່ອງ ເພື່ອເປັນຂໍ້ມູນໃຫ້ແກ່ການຄົ້ນຄວ້າ, ປັບປຸງເນື້ອໃນຂອງລັດຖະທໍາມະນູນສະບັບປີ 2015 ໃຫ້ຖືກຕ້ອງ, ຄົບຖ້ວນ, ສອດຄ່ອງ, ຮັດກຸມ ແລະ ສາມາດຈັດຕັ້ງປະຕິບັດໃຫ້ປະກົດຜົນເປັນຈິງໄດ້, ໃນວາລະກອງປະຊຸມ ທ່ານ ພົຕ ວົງສັກ ພັນທະວົງ ປະທານກຳມາທິການປ້ອງກັນຊາດ-ປ້ອງກັນຄວາມສະຫງົບ, ຮອງຫົວໜ້າອຸນະກໍາມະການເນື້ອໃນ, ຮອງຫົວໜ້າຄະນະຮັບຜິດຊອບກອງປະຊຸມ ໄດ້ຜ່ານຮ່າງບົດປະເມີນຜົນການຈັດຕັ້ງປະຕິບັດລັດຖະທຳມະນູນ ແຫ່ງ ສປປ ລາວ ສະບັບປີ 2015 ເຊິ່ງໄດ້ຍົກໃຫ້ຫລາຍບັນຫາສຳຄັນ ໂດຍສະເພາະຄວາມສຳຄັນ ແລະ ຄວາມຈຳເປັນ ໃນການປັບປຸງລັດຖະທຳມະນູນ ສະບັບ ປີ 2015 ເຊິ່ງການປັບປຸງລັດຖະທໍາມະນູນໃນຄັ້ງນີ້, ແມ່ນສຸມໃສ່ຄົ້ນຄວ້າ ແລະ ປັບປຸງ ບາງໝວດ, ບາງມາດຕາ ທີ່ຈຳເປັນເປັນຕົ້ນ ໝວດກ່ຽວກັບການປົກຄອງທ້ອງຖິ່ນ ແລະ ອາດຈະຄົ້ນຄວ້າສະເໜີເພີ່ມບາງມາດຕາ ຫລື ບາງຂໍ້ບັນຍັດໃໝ່ ທີ່ເຫັນວ່າມີຄວາມສຳຄັນ ແລະ ຈຳເປັນ ເພື່ອໃຫ້ມີເນື້ອໃນທີ່ຖືກຕ້ອງ,ຄົບຖ້ວນ, ສອດຄ່ອງກັບໜ້າທີ່ການເມືອງ ຂອງພັກ ແລະ ລັດໃນໄລຍະໃໝ່ ໃຫ້ກາຍເປັນກົດໝາຍ ພື້ນຖານສຳຄັນຂອງປະເທດຊາດ, ທັງເປັນບ່ອນອີງໃຫ້ແກ່ການສ້າງ ແລະປັບ ປຸງບັນດາກົດໝາຍ ໃຫ້ຖືກຕ້ອງ, ສອດຄ່ອງຕາມແນວທາງປ່ຽນແປງໃໝ່ຢ່າງຮອບດ້ານ ມີຫລັກການຂອງພັກ, ເປັນຂໍ້ບັນຍັດຂອງລັດຖະທຳມະນູນ ແຫ່ງສປປ ລາວ ສະບັບໃໝ່  ເປັນຕົ້ນມະຕິຄະນະບໍລິຫານງານສູນກາງພັກ ວ່າດ້ວຍການສືບຕໍ່ຍູ້ແຮງການຜັນຂະຫຍາຍແນວທາງປ່ຽນແປງໃໝ່ສູ່ລວງເລິກ, ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ໃນການ ນຳພາຂອງພັກ, ເປັນບ່ອນອີງພື້ນຖານຮັບປະກັນໃຫ້ແກ່ການສ້າງ ແລະ ປັບປຸງກົດໝາຍໃນຕໍ່ໜ້າ ໃຫ້ເປັນລະບົບຄົບຊຸດ, ຮັດກຸມ ແລະ ສາມາດຈັດຕັ້ງປະຕິບັດໄດ້. ຈາກນັ້ນຜູ້ແທນເຂົ້າຮ່ວມກອງປະຊຸມ ກໍ່ໄດ້ມີຄໍາເຫັນສະເໜີບົດປະກອບຄຳຄິດຄຳເຫັນວ່າ: ກອງປະຊຸມປະເມີນຜົນການຈັດຕັ້ງປະຕິບັດລັດຖະທຳມະນູນຄັ້ງນີ້, ມີຄວາມໝາຍສຳຄັນຫລາຍ ເນື່ອງຈາກວ່າ ການປະເມີນຜົນການຈັດຕັ້ງປະຕິບັດລັດ ຖະທຳມະນູນ ແມ່ນການປະເມີນຜົນການຈັດຕັ້ງປະຕິບັດນິຕິກຳສູງສຸດຂອງລັດເຮົາ ທີ່ເປັນກົດໝາຍພື້ນຖານຂອງຊາດ ເຊິ່ງລັດຖະທໍາມະນູນ ສະບັບທໍາອິດຂອງ ສປປ ລາວໄດ້ຖືກຮັບຮອງ ແລະ ປະກາດໃຊ້ຢ່າງເປັນທາງການ ໃນປີ1991, ມາຮອດປັດຈຸບັນ ເປັນເວລາ 33 ປີ, ໃນໄລຍະຜ່ານມາກໍ່ໄດ້ມີການປັບປຸງຫລາຍຄັ້ງ ລັດຖະທຳມະນູນ ສະບັບປີ 2015 ມາຮອດປັດຈຸເປັນເວລາ 9 ປີ ເຊິ່ງເປັນກົດໝາຍພື້ນຖານສໍາຄັນຂອງປະເທດຊາດ,ເປັນບ່ອນອີງໃຫ້ແກ່ການສ້າງ ແລະ ປັບປຸງກົດໝາຍ ເພື່ອເປັນເຄື່ອງມືຂອງລັດ ໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ດ້ວຍກົດໝາຍ ແລະ ສ້າງເງື່ອນໄຂພື້ນຖານໃຫ້ແກ່ການສ້າງລັດປະຊາທິປະໄຕ ປະຊາຊົນ ຂອງພວກເຮົາໃຫ້ເປັນລັດທີ່ປົກຄອງດ້ວຍກົດໝາຍດີຂຶ້ນເທື່ອລະກ້າວ. ແຕ່ຜ່ານການປະຕິບັດ, ກໍ່ມີບາງບົດບັນຍັດຂອງລັດຖະທຳມະນູນ ບໍ່ສອດຄ່ອງກັບໜ້າທີ່ການເມືອງຂອງພັກ ແລະ ສະພາບການພັດທະນາເສດຖະກິດ-ສັງຄົມ ໃນປັດຈຸບັນ ແລະ ອື່ນໆ. ສະນັ້ນ, ລັດເຮົາຈິ່ງຕ້ອງໄດ້ມີການປັບປຸງລັດຖະທໍາມະນູນ ສະບັບປີ 2015 ໃຫ້ສອດຄ່ອງກັບໜ້າທີ່ການເມືອງຂອງພັກ ແລະ ລັດໃນໄລຍະໃໝ່. ສະເພາະ ຢູ່ຂັ້ນສູນກາງ ໄດ້ຈັດກອງປະຊຸມປະເມີນ ຢູ່ 4 ຈຸດ ຕາມຂົງເຂດວຽກງານ ຄື: ຂົງເຂດອົງການຈັດຕັ້ງພັກ, ແນວລາວສ້າງຊາດ, ສະຫະພັນນັກຮົບເກົ່າແລະ ອົງການມະຫາຊົນ; ຂົງເຂດເສດຖະກິດ-ສັງຄົມ; ຂົງເຂດການປົກຄອງ ແລະ ຍຸຕິທຳ ຫລື ອຳນາດລັດ; ຂົງເຂດປ້ອງກັນຊາດ-ປ້ອງກັນຄວາມສະຫງົບ ແລະ ການຕ່າງປະເທດ ເຊິ່ງການປະເມີນຜົນຢູ່ 4 ຈຸດດັ່ງກ່າວ, ແມ່ນໄດ້ສຳເລັດຜົນ ນອກຈາກນີ້, ຍັງຈະໄດ້ດຳເນີນການປະເມີນຜົນການປະຕິບັດລັດຖະທໍາມະນູນໃນຮູບແບບທາບທາມຄວາມເຫັນທົ່ວໄປ ລວມທັງຜ່ານສື່ມວຊົນຕ່າງໆ; ພ້ອມດຽວກັນ ຜູ້ແທນເຂົ້າຮ່ວມກອງປະຊຸມຍັງໄດ້ປະກອບຄໍາຄິດເຫັນຕໍ່ການຈັດຕັ້ງປະຕິບັດລັດຖະທຳມະນູນແຫ່ງ ສປປ ລາວ ສະບັບປັບປຸງປີ 2015  ຢ່າງມີຈຸດສຸມ ເພື່ອເຮັດໃຫ້ການປັບປຸງລັດຖະທຳມະນູນ ມີປະສິດທິພາບ ແທດເໝາະກັບສະພາບຄວາມເປັນຈິງ.