ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

        (ສພຊ) ໃນວັນທີ 25 ພະຈິກ 2021 ຄະນະສະ​ເພາະ​ກິດສະພາແຫ່ງຊາດ (ສພຊ) ໄດ້ຈັດກອງປະຊຸມແບບທາງໄກເພື່ອສະຫລຸບຕີລາຄາ, ຖອດຖອນບົດຮຽນໃນການປະຕິບັດວຽກງານໄລຍະຜ່ານມາ ແລະແຜນການໃນຕໍ່ໜ້າ ໂດຍການເປັນປະທານຂອງທ່ານ ນາງ ປິ່ງຄໍາ ລາຊະສິມມາ ເລຂາທິການສະພາແຫ່ງຊາດ, ຮອງຫົວໜ້າຄະນະຊີ້ນໍາລວມຄະນະສະເພາະກິດ ສພຊ; ເຂົ້າຮ່ວມມີທ່ານ ນາງ ທຸມມາລີ ວົງພະຈັນ ປະທານກໍາມາທິການວັດທະນະທໍາ-ສັງຄົມ, ຄະນະຊີ້ນໍາລວມຄະນະສະເພາະກິດ ສພຊ; ມີຄະນະໜ່ວຍງານສະເພາະກິດ ພ້ອມດ້ວຍກອງເລຂາຊ່ວຍວຽກ.

         ຈຸດປະສົງ​ຂອງກອງ​ປະຊຸມ​​ຄັ້ງນີ້ ​ເພື່ອປຶກສາ​ຫາລື, ສະຫລຸບຕີລາຄາ ແລະ ປະກອບຄໍາຄິດຄຳເຫັນ ຕໍ່​ກັບການຈັດຕັ້ງປະຕິບັດວຽກງານຂອງຄະນະສະເພາະກິດ ສພຊ ໃນໄລຍະຜ່ານມາ ແລະ ການຮັບໃຊ້ວຽກງານສະເພາະກິດ ສພຊ ໃຫ້ແກ່ກອງປະຊຸມສຳມະນາ ແລະ ກອງປະຊຸມສະໄໝສາມັນເທື່ອທີ 2 ສະພາແຫ່ງຊາດຊຸດທີ IX.

         ກອງປະຊຸມ ໄດ້ຮັບຟັງການລາຍງານກ່ຽວກັບສະ​ພາບ​ການເຄື່ອນໄຫວຂອງໜ່ວຍງານສະເພາະກິດ ໃນ ສພຊ ໄລຍະຜ່ານມາ ເຖິງປັດຈຸບັນຈາກທ່ານ ບຸນລ້ອມ ແກ້ວບົວໂຮມ ຮອງປະທານກໍາມາທິການວັດທະນະທໍາ-ສັງຄົມ, ຫົວໜ້າໜ່ວຍງານສະເພາະກິດ ສພຊ ເຊິ່ງທ່ານໄດ້ຍົກໃຫ້ເຫັນການ​ຈັດຕັ້ງປະຕິບັດວຽກງານໃນການຕິດ​ຕາມ​ເຝົ້າ​ລະ​ວັງ​ການ​ແຜ່​ລະບາດຂອງພະຍາດໂຄວິດ-19 ວ່າ: ພາຍຫລັງໄດ້ຮັບມະຕິຂອງຄະນະປະຈຳສະພາແຫ່ງຊາດ ເລກທີ106/ຄປຈ,ລົງວັນທີ 04 ພຶດສະພາ 2021ແລະ ພາຍຫລັງກອງປະຊຸມຂອງຄະນະຊີ້ນຳລວມ ໂດຍການເປັນປະທານຂອງທ່ານ ຄຳໃບ ດຳລັດ ຮອງປະທານສະພາແຫ່ງຊາດ,ຫົວໜ້າຄະນະຊີ້ນໍາລວມຄະນະສະເພາະກິດ ສພຊ, ຈາກນັ້ນຄະນະໜ່ວຍງານສະເພາະກິດໄດ້ນຳເອົາຈິດໃຈດັ່ງກ່າວ ມາຜັນຂະຫຍາຍເປັນວຽກລະອຽດເພື່ອນຳໄປຈັດຕັ້ງປະຕິບັດ ໂດຍສະເພາະ ໄດ້ຮ່າງແຜນການເຄື່ອນໄຫວ ແລະ ແບ່ງຄວາມຮັບຜິດຊອບເຂົ້າໃນວຽກງານຂອງແຕ່ລະພາກສ່ວນ ໂດຍສະເພາະໃນຄະນະໜ່ວຍງານສະເພາະກິດແມ່ນປະຕິບັດໜ້າທີ່ໄປຕາມພາລະບົດບາດຂອງບັນດາກົມທີ່ກ່ຽວຂ້ອງ ໃນການປະຕິບັດໜ້າທີ່ເປັນເສນາທິການໃຫ້ແກ່ຄະນະຊີ້ນຳລວມແລະ ໄດ້ປະກອບສ່ວນເຄື່ອນໄຫວ ດ້ວຍຄວາມຮັບຜິດຊອບຕາມພາລະບົດບາດໜ້າທີ່ທີ່ຖືກມອບໝາຍ ເຊິ່ງສະແດງອອກໂດຍສະເພາະເປັນເສນາທິການໃນການຮ່າງນິຕິກຳ ຄໍາແນະນຳ, ແຈ້ງການ ຂອງຄະນະປະຈຳ, ຄະນະເລຂາທິການ ຈຳນວນ 14 ສະບັບ; ຕິດຕາມຂໍ້ມູນ-ຂ່າວສານ ເປັນຕົ້ນ ເອກະສານນິຕິກຳຂອງທ່ານນາຍົກລັດຖະມົນຕີ, ແຈ້ງການຂອງສຳນັກງານນາຍົກລັດຖະມົນຕີ; ບົດລາຍງານປະຈຳວັນຂອງໜ່ວຍງານສະເພາະກິດລະດັບຊາດ ຈໍານວນຫລາຍກວ່າ 55 ສະບັບ. ປະສານສົມທົບກັບບັນດາເຂດເລືອກຕັ້ງກ່ຽວກັບການລາຍງານສະພາບຂອງ ການແຜ່ລະບາດພາຍໃນແຂວງ; ປະສານສົມທົບກັບໜ່ວຍງານສະເພາະກິດລະດັບຊາດ, ກະຊວງສາທາລະນະສຸກ ໃນການອະເຊື້ອສະຖານທີ່,ການສັກວັກຊີນ, ການເກັບຕົວຢ່າງກວດຫາເຊື້ອ, ປະສານງານກັບພາກສ່ວນທີ່ກ່ຽວຂ້ອງໃນການອຳນວຍຄວາມສະດວກໃຫ້ແກ່ພະນັກງານ-ລັດຖະກອນ ທີ່ມີຈຸດປະສົງເຂົ້າກັກບໍລິເວນ, ເຂົ້າຮັກສາປິ່ນປົວສຸຂະພາບກັບໂຮງໝໍ ສະຖານທີ່ທີ່ກ່ຽວຂ້ອງໃນການຄວບຄຸມ ແກ້ໄຂການແຜ່ລະບາດ; ມີຄວາມເຫັນໃຫ້ການຢັ້ງຢືນໃນການໄປເຄື່ອນໄຫວຂອງອ້າຍນ້ອງພະນັກງານທີ່ຕ້ອງການເດີນທາງໄປທຳການຜະລິດຈຳນວນໜຶ່ງ; ປະຕິບັດໜ້າທີ່ໃນການເຂົ້າຮ່ວມພິທີການມອບ-ຮັບເຄື່ອງຊ່ວຍເຫລືອຈາກບໍລິສັດ, ອົງການຈັດຕັ້ງຈຳນວນໜຶ່ງ ທີ່ທາງຄະນະຊີ້ນຳລວມໄດ້ລະດົມເຄື່ອງອຸປະໂພກ, ບໍລິໂພກ, ເຄື່ອງໃຊ້ສອຍ, ເຄື່ອງບ່ອນນອນ ແລະຢາປົວພະຍາດ ມີ 8 ບໍລິສັດແລະ 3 ອົງການສາສະໜາມອບໃຫ້ສະພາແຫ່ງຊາດ. ໄລຍະເດືອນເມສາ 2021​ ເປັນຕົ້ນມາ ໄດ້ມອບເຄື່ອງທີ່ລະດົມໄດ້ຄື: ຢາ, ອຸປະກອນການແພດ, ນໍ້າດື່ມ, ອາຫານແຫ້ງ,ອາຫານສຸກ, ເຄື່ອງບ່ອນນອນໃຫ້ໂຮງໝໍມິດຕະພາບ ມູນຄ່າ 81 ລ້ານກວ່າກີບ, ໂຮງໝໍເສດຖາທິລາດ ມູນຄ່າ 81 ລ້ານກວ່າກີບ, ໂຮງໝໍພາກສະໜາມຫລັກ 27 ມູນຄ່າ 99 ລ້ານກວ່າກີບ, ສະພາປະຊາຊົນແຂວງສະຫວັນນະເຂດ 65 ລ້ານກີບ, ສະພາປະຊາຊົນແຂວງຈໍາປາສັກ 65 ລ້ານກີບ ແລະ ມອບໃຫ້ສະພາປະຊາຊົນແຂວງ ໃນທົ່ວປະເທດ ແລະ ເມືອງສັງທອງ ນະຄອນຫລວງວຽງຈັນ; ພ້ອມດຽວກັນນັ້ນ, ກໍໄດ້ປຸກລະດົມຂົນຂວາຍປັດໄຈ ແລະ ອຸປະກອນຕ່າງໆ ເປັນຕົ້ນແມ່ນຜ້າປິດປາກ-ດັງ, ນໍ້າຢາຂ້າເຊື້ອເຈວ, ເຫລົ້າ 90 ແລະ ອື່ນໆເພື່ອແບ່ງປັນໄປໃຫ້ບັນດາເຂດເລືອກຕັ້ງທີ່ມີການແຜ່ລະບາດຕາມຄວາມເໝາະສົມ.

        ໂອກາດດັ່ງກ່າວ ປະທານກອງປະຊຸມ ໄດ້ມີຄໍາເຫັນຕໍ່ກອງປະຊຸມ  ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຄະນະສະເພາະກິດ ສພຊ ທີ່ໄດ້ເອົາໃຈໃສ່ປະຕິບັດໜ້າທີ່ດ້ວຍຄວາມຮັບຜິດຊອບສູງ ແລະ ສະເໜີໃຫ້ປັບປຸງຄືນບົດລາຍງານການຈັດຕັ້ງປະຕິບັດວຽກງານຂອງຄະນະສະເພາະກິດສພຊ ໃນໄລຍະຜ່ານມາ ແລະການຮັບໃຊ້ວຽກງານສະເພາະກິດ ໃຫ້ແກ່ກອງປະຊຸມສຳມະນາ ແລະ ກອງປະຊຸມສະໄໝສາມັນເທື່ອທີ 2 ສະພາແຫ່ງຊາດ ຊຸດທີ IX; ສືບຕໍ່ສັງລວມເຄື່ອງຊ່ວຍເຫລືອ; ປັບປຸງຄະນະກອງເລຂາສະເພາະກິດ ຕາມມະຕິຂອງຄະນະປະຈໍາ ສພຊ ເລກທີ 106/ຄປຈ, ລົງວັນທີ 04/05/2021; ຄົ້ນຄວ້າຫາປຶ້ມຄູ່ມືເພື່ອແນະນຳການປ້ອງກັນການແຜ່ລະບາດ ຂອງພະຍາດໂຄວິດ-19 ພາຍໃນ ສພຊ.

(ນາງ ສຸມົນທາ ງາໄຊ)