(ສພຂ) ໃນວັນທີ 26 ມັງກອນ 2024 ທ່ານ ບຸນມີ ພິມມະສອນ ຮອງເລຂາພັກແຂວງ ປະທານສະພາປະຊາຊົນແຂວງຄໍາມ່ວນ ໄດ້ກ່າວສູນທອນພົດປິດ ກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງຄໍາມ່ວນ ຊຸດທີ II ຢ່າງເປັນທາງການ ໂດຍມີທ່ານ ວັນໄຊ ພອງສະຫວັນ ກຳມະການສູນກາງພັກ ເລຂາພັກແຂວງ ເຈົ້າແຂວງໆຄໍາມ່ວນ ; ມີບັນດາຄະນະປະຈຳພັກແຂວງ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 12 ແຂວງຄໍາມ່ວນ, ບັນດາທ່ານສະມາຊິກສະພາປະຊາຊົນຂັ້ນແຂວງຈາກ 10 ເຂດເລືອກຕັ້ງທົ່ວແຂວງຄໍາມ່ວນ, ຫົວໜ້າພະແນກການ, ເຈົ້າເມືອງ, ມີບັນດາທ່ານ ອາດີດການນໍາຂັ້ນສູງຂອງແຂວງ ແລະ ແຂກຖືກເຊີນ. ເຂົ້າຮ່ວມ.

ກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງຄໍາມ່ວນ ຊຸດທີ II ໄດ້ຕີລາຄາສູງ ທີ່ສະມາຊິກສະພາປະຊາຊົນຂັ້ນແຂວງ, ສະມາຊິກອົງການປົກຄອງແຂວງ, ຜູ້ແທນກອງປະຊຸມຈາກພາກສ່ວນທີ່ກ່ຽວຂ້ອງ ໄດ້ພ້ອມກັນທຸ້ມເທເຫື່ອແຮງ, ສະຕິປັນຍາ ແລະ ເສີມຂະຫຍາຍສິດປະຊາທິປະໄຕ ເຂົ້າໃສ່ການຄົ້ນຄວ້າ, ພິຈາລະນາບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ ແລະ ບັນຫາສໍາຄັນພື້ນຖານຂອງທ້ອງຖິ່ນພາຍໃນແຂວງ ເຊິ່ງເປັນການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫ່ຍ ຄັ້ງທີ X ຂອງອົງຄະນະພັກແຂວງຄໍາມ່ວນ ເຂົ້າສູ່ວຽກງານຕົວຈິງຂອງລັດເພື່ອນໍາພາປະເທດຊາດ ກໍ່ຄືຂອງແຂວງຄໍາມ່ວນ ໃຫ້ສືບຕໍ່ມີສະຖຽນລະພາບທາງການເມືອງທີ່ໜັກແໜ້ນ, ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ, ພ້ອມກັນສຸມໃສ່ປະຕິບັດ 2 ວາລະແຫ່ງຊາດນັ້ນຄື: ບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ບັນຫາຢາເສບຕິດ ເຊິ່ງໄດ້ມີຜົນສໍາເລັດພົ້ນເດັ່ນຈໍານວນໜຶ່ງ ເຮັດໃຫ້ເສດຖະກິດສືບຕໍ່ຂະຫຍາຍຕົວໃນທາງບວກ, ສາມາດປະຄັບປະຄອງບໍ່ໃຫ້ເສດຖະກິດຕົກໃນຄວາມຫຍຸ້ງຍາກໄປກວ່ານີ້, ຮັບປະກັນການດໍາລົງຊີວິດຂອງປະຊາຊົນ ເຖິງຈະປະເຊີນກັບຄວາມຫຍຸ້ງຍາກ ແຕ່ກໍສາມາດຜ່ານຜ່າໄດ້.

ກອງປະຊຸມ ໄດ້ພິຈາລະນາ, ຮັບຮອງເອົາເອກະສານສໍາຄັນຈໍານວນໜຶ່ງດັ່ງນີ້:

1)ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ, ແຜນງົບປະມານແຫ່ງລັດຂອງແຂວງ ປະຈໍາປີ 2023, ທິດທາງແຜນການ ປະຈໍາປີ 2024; ກອງປະຊຸມສະແດງຄວາມຍ້ອງຍໍຊົມເຊີຍຕໍ່ ຄວາມພະຍາຍາມຂອງອົງການປົກຄອງ ໃນການບໍລິຫານ, ບັນຊາການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ ດ້ວຍການວາງມາດຕະການຮອບດ້ານ ເຮັດໃຫ້ເສດຖະກິດສາມາດຂະຫຍາຍຕົວໃນລະດັບ 5,88%, ໄດ້ສົ່ງເສີມຜະລິດກະສິກຳ ເພື່ອຊົມໃຊ້ພາຍໃນ ແລະ ເປັນສິນຄ້າສົ່ງອອກ ແລະ ມີມາດຕະການປົກປ້ອງການຜະລິດພາຍໃນແຂວງໃຈນຳນວນໜຶ່ງ, ຍ້ອນມີການຫັນປ່ຽນເປັນທັນສະໄໝເຮັດໃຫ້ການຈັດເກັບລາຍຮັບມີການເພີ່ມຂື້ນ, ຫຼຸດຜ່ອນການຮົ່ວໄຫຼ ແລະ ການຄຸ້ມຄອງລາຍຈ່າຍ ຕາມທິດປະຢັດມັດທະຍັດ, ໄດ້ດຳເນີນການປະຕິຮູບລັດວິສາຫະກິດຈຳນວນໜຶ່ງເພື່ອຮັບປະກັນການເຄື່ອນໄຫວດຳເນີນທຸລະກິດ ມີປະສິດທິພາບ, ປະສິດທິຜົນ; ການຊຳລະສະສາງໜີ້ສິນໂຄງການລົງທຶນຂອງລັດ ໄດ້ຮັບການເອົາໃຈໃສ່ແກ້ໄຂ ໃຫ້ຜ່ອນຄາຍໄປເທື່ອລະກ້າວ, ສືບຕໍ່ປະຕິບັດນະໂຍບາຍຕໍ່ຜູ້ທີ່ມີຄຸນງາມຄວາມດີຕໍ່ປະເທດຊາດກໍ່ຄືແຂວງຂອງພວກເຮົາ; ໄດ້ເອົາໃຈໃສ່ປຶກສາ ແລະ ຕົກລົງເປັນເອກະພາບໃນການສ້າງແຜນການລົງທຶນຂອງລັດ ປີ 2024 ເພື່ອໃຫ້ສາມາດຈັດຕັ້ງປະຕິບັດ ໃນເດືອນກຸມພາ 2024;

ພ້ອມດຽວກັນນັ້ນ ກອງປະຊຸມສະເໜີໃຫ້ອົງການປົກຄອງແຂວງ ເພີ່ມທະວີເອົາໃຈໃສ່ ໃນການແກ້ໄຂບັນຫາທີ່ສັງຄົມເປັນຫວ່ງຫຼາຍ ເຊັ່ນ: ການແກ້ໄຂບັນຫາເງິນເຟີ້ທີ່ສູງ, ອັດຕາແລກປ່ຽນເໜັງຕີງແຮງ, ຄ່າຄອງຊີບສູງ ເຊິ່ງຍັງສືບຕໍ່ສົ່ງຜົນກະທົບໂດຍກົງຕໍ່ຊີວິດການເປັນຢູ່ຂອງພະນັກງານ, ທະຫານ, ຕຳຫຼວດ ກໍ່ຄືປະຊາຊົນບັນດາເຜົ່າ, ການແກ້ໄຂບັນຫາຂອງຄູອາຈານ, ແພດອາສາສະໝັກ, ບັນຫາຄຸນນະພາບການສຶກສາ, ສາທາລະນະສຸກ, ບັນຫາສະຫວັດດີການສັງຄົມ, ບັນຫາແຮງງານ, ການເລັ່ງທວງຄືນໜີ້ສິນຂອງລັດ ແລະ ການຊຸກຍູ້ການພັດທະນາການທ່ອງທ່ຽວພາຍໃນແຂວງຂອງພວກເຮົາ;

2)ກອງປະຊຸມໄດ້ພິຈາລະນາ ແລະ ຮັບຮອງເອົາບົດສະຫຼບຕີລາຄາການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ – ການເງິນ ແລະ ການແກ້ໄຂບັນຫາຢາເສບຕິດ ໃນໄລຍະ 3 ປີຜ່ານມາ (2021 – 2023) ກອງປະຊຸມຕີລາຄາ ເຫັນວ່າ ດ້ວຍຄວາມບຸກບືນ, ສູ້ຊົນຂອງອົງການປົກຄອງ ເຮັດໃຫ້ການຈັດຕັ້ງປະຕິບັດ 2 ວາລະແຫ່ງຊາດ ໄດ້ຮັບຜົນສຳເລັດຫຼາຍດ້ານ ແລະ ຫັນປ່ຽນທີ່ດີຂື້ນຈຳນວນໜຶ່ງ. ແຕ່ພ້ອມດຽວກັນນັ້ນ, ກອງປະຊຸມສະເໜີໃຫ້ອົງການປົກຄອງ ເພີ່ມທະວີການຄຸ້ມຄອງ ການຂຸດຄົ້ນທ່າແຮງບົ່ມຊ້ອນທາງດ້ານເສດຖະກິດ ຢ່າງສົມເຫດສົມຜົນ, ປະຢັດ, ມີປະສິດທິພາບ, ປະສິດທິຜົນ ແລະ ເຂັ້ມງວດຕາມກົດໝາຍ, ປັບປຸງແກ້ໄຂໂຄງການເຮັດທົດລອງການຂຸດຄົ້ນແຮ່ທາດໂດຍໄວ ແນ່ໃສ່ຮັບປະກັນຜົນປະໂຫຍດລວມຂອງຊາດກໍ່ຄືຂອງແຂວງ; ເອົາໃຈໃສ່ການຫັນປ່ຽນເປັນທັນສະໄໝໃຫ້ແຂງແຮງໃນການຈັດເກັບລາຍຮັບ, ການສ້າງຖານລາຍຮັບໃໝ່, ຄວບຄຸມອັດຕາເງິນເຟີ້ ແລະ ເອົາໃຈໃສ່ປັບປຸງຊີວິດການເປັນຢູ່ຂອງປະຊາຊົນບັນດາເຜົ່າໃຫ້ນັບມື້ດີຂື້ນ.

ສຳລັບວຽກງານແກ້ໄຂບັນຫາຢາເສບຕິດ ກໍ່ມີຜົນສຳເລັດຫຼາຍດ້ານ ໂດຍໄດ້ສ້າງນິຕິກຳທີ່ກ່ຽວຂ້ອງຫຼາຍສົມຄວນ, ໄດ້ໂຄສະນາເຜີຍແຜ່ມະຕິ, ຄຳສັ່ງ ແລະ ນິຕິກຳໃຕ້ກົດໝາຍ ໃນຖັນແຖວປະຊາຊົນຢ່າງກວ້າງຂວາງ, ລະດົມໃຫ້ປະຊາຊົນ ເຂົ້າຮ່ວມຢ່າງຕັ້ງໜ້າ ເພື່ອລຸດຜ່ອນປະກົດການຫຍໍ້ທໍ້ຢູ່ໃນສັງຄົມ ຍ້ອນບັນຫາຢາເສບຕິດ.

3)ກອງປະຊຸມໄດ້ພິຈາລະນາ ແລະ ຮັບຮອງເອົາ ບົດລາຍງານ ການເຄື່ອນໄຫວວຽກງານ ປະຈໍາປີ 2023 ແລະ ທິດທາງແຜນການ ປະຈໍາປີ 2024, ບົດລາຍງານຜົນການກວດກາ ຕາມຜົນການກວດສອບ ປະຈໍາປີ 2021 ແລະ ແຜນການກວດກາຕາມຜົນການກວດສອບ ປະຈໍາປີ 2022 ຂອງອົງການກວດກາລັດແຂວງ; ບົດລາຍງານ ການເຄື່ອນໄຫວວຽກງານ ປະຈໍາປີ 2023 ແລະ ທິດທາງແຜນການເຄື່ອນໄຫວວຽກງານປະຈໍາປີ 2024, ບົດລາຍງານຜົນການກວດສອບຄືນບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ຂອງແຂວງ ປະຈໍາປີ 2022 ແລະ ແຜນການກວດສອບຄືນບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ຂອງແຂວງຄໍາມວ່ນ ປະຈໍາປີ 2023 ຂອງອົງການກວດສອບ ປະຈໍາພາກກາງ 2;

ກອງປະຊຸມສະແດງຄວາມຍ້ອງຍໍຊົມເຊີຍ ຕໍ່ສອງອົງການດັ່ງກ່າວ ທີ່ສູ້ຊົນຈັດຕັ້ງປະຕິບັດໜ້າທີ່ວຽກງານຂອງຕົນ ດ້ວຍຄວາມບຸກບືນຫ້າວຫັນ ເຮັດໃຫ້ການຈັດຕັ້ງປະຕິບັດແຜນການ ໄດ້ຮັບຜົນສຳເລັດຫຼາຍດ້ານ, ສາມາດກວດເຫັນໄດ້ການກະທຳຜິດກົດໝາຍ, ການລະເມີດວິໄນແຜນການ – ການເງິນ ທີ່ພົວພັນກັບການນຳໃຊ້ງົບປະມານຂອງລັດ, ການຈັດຕັ້ງປະຕິບັດໂຄງການລົງທຶນຂອງລັດ ເປັນບັນຫາທີ່ຊ້ຳເຮື້ອມາຫຼາຍປີ, ມີລັກສະນະຫຼາຍຮູບແບບທີ່ສະຫຼັບສັບຊ້ອນ, ເລິກແລບ ແລະ ມູນຄ່າເສຍຫາຍມີທ່າອ່ຽງສູງຂື້ນ; ແຕ່ດ້ວຍຄວາມເປັນເຈົ້າການນຳພາການແກ້ໄຂຜົນການກວດກາ ແລະ ຜົນການກວດສອບ ຈຶ່ງສາມາດນຳເອົາເງິນຄຳ, ຊັບສິນຂອງລັດ ກັບຄືນມາເປັນລາຍຮັບເຂົ້າງົບປະມານແຫ່ງລັດໄດ້ຈຳນວນໜຶ່ງ ແລະ ນຳເອົາຜູ້ກະທຳຜິດມາລົງໂທດ ເພື່ອບໍ່ໃຫ້ເປັນແບບຢ່າງທີ່ບໍ່ດີໃຫ້ແກ່ສັງຄົມ. ກອງປະຊຸມສະເໜີໃຫ້ອົງການກວດກາລັດ ແລະ ອົງການກວດສອບ ຈົ່ງສືບຕໍ່ນຳເອົາຜົນການກວດກາ ແລະ ກວດສອບມາແກ້ໄຂຢ່າງເຂັ້ມງວດຕາມກົດໝາຍ.

4)ກອງປະຊຸມໄດ້ພິຈາລະນາ ແລະ ຮັບຮອເອົາບົດລາຍງານ ການເຄື່ອນໄຫວວຽກງານ ປະຈຳປີ 2023 ແລະ ທິດທາງແຜນການເຄື່ອນໄຫວວຽກງານ ປະຈໍາປີ 2024 ຂອງສານປະຊາຊົນ ແລະ ອົງການໄອຍະການປະຊາຊົນແຂວງ ເຊິ່ງກອງປະຊຸມໄດ້ຕີລາສູງຕໍ່ສອງອົງການ ໄດ້ມີຄວາມພະຍາຍາມປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ດ້ວຍຄວາມຮັບຜິດຊອບສູງ, ໄດ້ຍົກສູງຄຸນນະພາບໃນການດຳເນີນຄະດີຕາມຂະບວນການຍຸຕິທຳ ນັບມື້ມີຄຸນນະພາບສູງຂື້ນ ເອົາໃຈໃສ່ຜັນຂະຫຍາຍມະຕິ, ຄຳສັ່ງ ເຂົ້າໃນການສ້າງ ແລະ ປັບປຸງນິຕິກຳໃຕ້ກົດໝາຍຫຼາຍຂື້ນ;

ກອງປະຊຸມສະເໜີໃຫ້ສານປະຊາຊົນ ແລະ ອົງການໄອຍະການປະຊາຊົນ ມີມາດຕະການປັບປຸງ ແລະ ແກ້ໄຂບັນດາຈຸດອ່ອນ, ຂໍ້ຄົງຄ້າງ ຊ່ອງວ່າງຂອງກົດໝາຍ, ເອົາໃຈໃສ່ໃຫ້ມີຄູ່ກໍລະນີ ແລະ ທະນາຍຄວາມໄດ້ເຂົ້າຮ່ວມການໂຕ້ແຍ້ງ, ໂຕ້ຖຽງ ໃນກອງປະຊຸມສານ ເພື່ອໃຫ້ການຕັດສິນຄະດີ ຖືກຕ້ອງຕາມກົດໝາຍ ແລະ ຖືກກັບຄວາມເປັນຈິງ, ຮັບປະກັນຄວາມຍຸຕິທຳຫຼາຍຂື້ນຕື່ມ;

5)ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານ ການເຄື່ອນໄຫວວຽກງານ ຂອງສະພາປະຊາຊົນແຂວງຄໍາມ່ວນ ປະຈຳປີ 2023 ແລະ ທິດທາງແຜນການເຄື່ອນໄຫວປີ 2024 ຂອງສະພາປະຊາຊົນແຂວງຄຳມ່ວນ ຊຸດທີ II; ກອງປະຊຸມຕີລາຄາວ່າ, ໃນໄລຍະ 1 ປີຜ່ານມາ ດ້ວຍຄວາມເອົາໃຈໃສ່ນຳພາ – ຊີ້ນຳຂອງຄະນະປະຈຳ ສະພາແຫ່ງຊາດ, ຄະນະປະຈຳພັກແຂວງ, ຄະນະປະຈຳ ສະພາປະຊາຊົນຂັ້ນແຂວງ, ຄວາມເປັນເຈົ້າການຂອງກົງຈັກເສນາທິການ ຂອງສະພາປະຊາຊົນຂັ້ນແຂວງ ກໍ່ຄືບັນດາທ່ານ ສະມາຊິກສະພາປະຊາຊົນຂັ້ນແຂວງ ໄດ້ເຮັດໃຫ້ການຜັນຂະຫຍາຍແນວທາງນະໂຍບາຍຂອງພັກ, ລັດຖະທຳມະນູນ, ກົດໝາຍ ເຂົ້າໃນການເຄື່ອນໄຫວຂອງສະພາປະຊາຊົນຂັ້ນແຂວງ ໄດ້ຮັບການເຊີດຊູນັບມື້ສູງຂຶ້ນ, ໄດ້ຮັບຄວາມເຊື່ອໝັ້ນຈາກອົງການຈັດຕັ້ງລັດຂັ້ນຕ່າງໆ ແລະ ປະຊາຊົນຜູ້ມີສິດເລືອກຕັ້ງ ນັບມື້ນັບກວ້າງຂວາງ. ກອງປະຊຸມສະເໜີໃຫ້ເອົາໃຈໃສ່ຊຸກຍູ້ໃຫ້ອົງການປົກຄອງ ການສ້າງ ແລະ ປັບປຸງກົດນິຕິກຳໃຕ້ກົດໝາຍ ສອດຄ່ອງກັບຄວາມຮຽກຮ້ອງຕ້ອງການ ໃນການຄຸ້ມຄອງລັດ – ສັງຄົມໃນແຕ່ລະໄລຍະ, ເອົາໃຈໃສ່ການທາບທາມຮ່າງນິຕິກຳໃຕ້ກົດໝາຍ, ການປະເມີນການປະຕິບັດນິຕິກໍາໃຕ້ກົດໝາຍ ເພື່ອຮັບປະກັນໃຫ້ນິຕິກໍາມີຄວາມສອດຄ່ອງກັບສະພາບການພັດທະນາທາງດ້ານເສດຖະກິດ – ສັງຄົມໃນແຕ່ລະໄລຍະ ແລະ ມີຄວາມສັກສິດຫຼາຍຂຶ້ນ; ເພີ່ມທະວີການປະຕິບັດພາລະບົດບາດຕິດຕາມກວດກາຢ່າງມີຈຸດສຸມ, ຮ່ວມກັບອົງການປົກຄອງແກ້ໄຂບັນຫາຕ່າງໆຢ່າງທັນການ ລວມທັງການນໍາເອົາຜົນສຳເລັດຂອງກອງປະຊຸມສະພາປະຊາຊົນແຂວງຄຳມ່ວນ ກໍຄືນະໂຍບາຍ, ມະຕິ, ຄໍາສັ່ງຂອງພັກ, ລັດ ໄປເຜີຍແຜ່ໃຫ້ຜູ້ມີສິດເລືອກຕັ້ງທົ່ວແຂວງຮັບຮູ້ ແລະ ເຂົ້າໃຈຢ່າງກວ້າງຂວາງ;

6) ກອງປະຊຸມໄດ້ ພິຈາລະນາ ນິຕິກໍາໃຕ້ກົດໝາຍ ຂອງອົງການປົກຄອງແຂວງ ຈໍານວນ 3 ສະບັບ ຄື: (1) ຮ່າງຂໍ້ຕົກລົງ ວ່າດ້ວຍມາດຕະການຫຼຸດຜ່ອນອຸປະຕິເຫດ ແລະ ການຮັກສາຄວາມປອດໄພຕາມທ້ອງຖະໜົນຫຼວງ ພາຍໃນແຂວງຄຳມ່ວນ; (2) ຮ່າງຂໍ້ຕົກລົງ ວ່າດ້ວຍການຄຸ້ມຄອງຂໍ້ມູນຂ່າວສານຜ່ານອິນເຕີເນັດ ແລະ ການຕ້ານ, ສະກັດກັ້ນອາຊະຍາກຳທາງລະບົບຄອມພິວເຕີ ຢູ່ແຂວງຄຳມ່ວນ; (3) ຮ່າງຂໍ້ຕົກລົງ ວ່າດ້ວຍການຄຸ້ມຄອງ ແລະ ການພັດທະນາທີ່ດິນປ່າໄມ້ ທົ່ວແຂວງຄຳມ່ວນ; ເຊິ່ງເນື້ອແທ້ກໍແມ່ນຄວາມພະຍາຍາມ ໃນການຈັດຕັ້ງຜັນຂະຫຍາຍແນວທາງນະໂຍບາຍຂອງພັກ ໃຫ້ເປັນອັນລະອຽດ ທັງເປັນການປະກອບສ່ວນສໍາຄັນເຂົ້າໃນການຈັດຕັ້ງປະຕິບັດ 2 ວາລະແຫ່ງຊາດ, ທັງເປັນການປັບປຸງ ແລະ ເພີ່ມທະວີພາຫະນະ, ເຄື່ອງມືຄຸ້ມຄອງລັດ – ສັງຄົມ ດ້ວຍກົດໝາຍ ເພື່ອຮັບປະກັນການປົກປ້ອງສິດ ແລະ ຜົນປະໂຫຍດຂອງຊາດ, ຂອງລັດ, ລວມໝູ່, ນິຕິບຸກຄົນ ແລະ ປະຊາຊົນລາວບັນດາເຜົ່າຊາວແຂວງຄຳມ່ວນຂອງພວກເຮົາ, ຮັບປະກັນໃຫ້ແກ່ສ້າງລັດປະຊາທິປະໄຕປະຊາຊົນຂອງພວກເຮົາ ໃຫ້ເປັນລັດ ຂອງປະຊາຊົນ ໂດຍປະຊາຊົນ ແລະ ເພື່ອປະຊາຊົນ.

ນອກນັ້ນ, ກອງປະຊຸມກໍ່ໄດ້ປະເມີນໃຫ້ຄະແນນຕໍ່ບຸກຄະລາກອນ ທີ່ຂື້ນລາຍງານ ແລະ ຊີ້ແຈງໃນກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງຄໍາມ່ວນ ຊຸດທີ II.

ບັນດາທ່ານຜູ້ແທນກອງປະຊຸມ ທີ່ຮັກແພງ

ຜົນສໍາເລັດຂອງກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງຄໍາມ່ວນ ຊຸດທີ II ຄັ້ງນີ້ ເປັນການຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງຄໍາມ່ວນ ເຂົ້າສູ່ຊີວິດຕົວຈິງ, ແມ່ນໝາກຜົນແຫ່ງສະຕິປັນຍາ, ການຍົກສູງຄວາມຮັບຜິດຊອບການເມືອງ ຂອງບັນດາທ່ານ ສະມາຊິກ ສະພາປະຊາຊົນຂັ້ນແຂວງ, ຄວາມຕັດສິນໃຈ ຂອງອົງການປົກຄອງແຂວງ, ອົງການທີ່ກ່ຽວຂ້ອງ ໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ – ການເງິນ ໃຫ້ຕົກໄປເທື່ອລະກ້າວ ເພື່ອພັດທະນາປະເທດຊາດກໍ່ຄືແຂວງຄຳມ່ວນຂອງພວກເຮົາ ໃຫ້ມີຄວາມໜັກແໜ້ນຂື້ນໄປເລື້ອຍໆ.

ກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງຄຳມ່ວນ ຊຸດທີ II ໄດ້ຮັບຜົນສໍາເລັດຢ່າງຈົບງາມ ກໍຍ້ອນມີການຊີ້ນໍາຢ່າງໃກ້ຊິດ ຈາກຄະນະປະຈຳ ສະພາແຫ່ງຊາດ, ຄະນະປະຈຳພັກແຂວງຄຳມ່ວນ ແລະ ຄະນະປະຈຳ ສະພາປະຊາຊົນຂັ້ນແຂວງ, ຍ້ອນຄວາມຮັບຜິດຊອບສູງຂອງອົງການປົກຄອງແຂວງ, ບັນດາອົງການທີ່ກ່ຽວຂ້ອງ ໃຫ້ຄວາມຮ່ວມມື ແລະ ສະໜັບສະໜູນ.

ຕາງໜ້າ ຄະນະປະຈໍາ ສະພາປະຊາຊົນຂັ້ນແຂວງ, ສະມາຊິກ ສະພາປະຊາຊົນຂັ້ນແຂວງ ຂໍສະແດງຄວາມຂອບໃຈເປັນຢ່າງສູງ ມາຍັງຄະນະປະຈຳ ສະພາແຫ່ງຊາດ ແລະ ຄະນະປະຈຳພັກແຂວງຄຳມ່ວນ ທີ່ຍາມໃດກໍໄດ້ໃຫ້ການຊີ້ນໍາຢ່າງໃກ້ຊິດຕິດແທດຕໍ່ ສະພາປະຊາຊົນຂັ້ນແຂວງ ໂດຍຕະຫລອດມາ, ຂໍສະແດງຄວາມຂອບໃຈ ເປັນຢ່າງຍິ່ງມາຍັງບັນດາທ່ານການນໍາພັກ – ລັດ, ແນວລາວສ້າງຊາດ, ສະຫະພັນນັກຮົບເກົ່າ ແລະ ອົງການຈັດຕັ້ງມະຫາຊົນ ທີ່ໄດ້ໃຫ້ກຽດເຂົ້າຮ່ວມ ແລະ ປະຊາຊົນລາວບັນດາເຜົ່າຊາວແຂວງຄຳມ່ວນ ທີ່ໄດ້ຕິດຕາມກອງປະຊຸມຂອງພວກເຮົາໃນຄັ້ງນີ້ ຢ່າງຈົດຈໍ່ ແລະ ມີການສົ່ງຄໍາຄິດເຫັນຜ່ານໂທລະສັບສາຍດ່ວນ 051 156 ມາຍັງກອງປະຊຸມ.

ຂໍສະແດງຄວາມຂອບໃຈ ຕໍ່ທຸກພາກສ່ວນກ່ຽວຂ້ອງ ທີ່ໄດ້ປະກອບສ່ວນເຂົ້າໃນຜົນສໍາເລັດຂອງກອງປະຊຸມຄັ້ງນີ້ ເປັນຕົ້ນ ກອງເລຂາກອງປະຊຸມ, ກໍາລັງປ້ອງກັນຊາດ – ປ້ອງກັນຄວາມສະຫງົບ, ທີມແພດ ທີ່ຮັບໃຊ້ກອງປະຊຸມສະໄໝສາມັນເທື່ອນີ້ຢ່າງຫ້າວຫັນ, ຂໍສະແດງຄວາມຂອບໃຈຕໍ່ສື່ມວນຊົນ ທີ່ໄດ້ນໍາສະເໜີຂ່າວສານຜ່ານວິທະຍຸ, ໂທລະພາບ ແລະ ສື່ເອເລັກໂຕຣນິກ ເຊີ່ງອໍານວຍຄວາມສະດວກໃນການຕິດຕາມ ການດໍາເນີນກອງປະຊຸມໄດ້ທັນສະພາບການແທດຕົວຈິງ ແລະ ຕໍ່ເນື່ອງ.

ສຸດທ້າຍນີ້, ຕາງໜ້າໃຫ້ກອງປະຊຸມ ຂ້າພະເຈົ້າຂໍອວຍພອນໄຊອັນປະເສີດມາຍັງ ທ່ານ ວັນໄຊ ພອງສະຫວັນ ກຳມະການສູນກາງພັກ ເລຂາພັກແຂວງ ເຈົ້າແຂວງຄໍາມ່ວນ ຈົ່ງມີພາລະນາໄມສົມບູນ, ມີຄວາມຜາສຸກໃນຊີວິດຄອບຄົວ, ມີຜົນສໍາເລັດໃໝ່ໃຫຍ່ຫຼວງກວ່າເກົ່າໃນພາລະກິດແຫ່ງການຊີ້ນໍາ – ນໍາພາປະເທດຊາດ ກໍ່ຄືແຂວງຄໍາມ່ວນ ຂອງພວກເຮົາໃຫ້ຈະເລີນກ້າວຂຶ້ນຢ່າງໜັກແໜ້ນ.

ຂໍອວຍພອນໃຫ້ບັນດາທ່ານການນໍາພັກ – ລັດ, ພະນັກງານປະຕິວັດອາວຸໂສບຳນານ, ພະນັກງານ, ທະຫານ, ຕຳຫລວດ ແລະ ປະຊາຊົນລາວບັນດາເຜົ່າໃນທົ່ວແຂວງຄຳມ່ວນ ຈົ່ງມີສຸຂະພາບເຂັ້ມແຂງ, ມີຄວາມສຸກໃນຄອບຄົວ ແລະ ປະສົບຜົນສໍາເລັດໃນໜ້າທີ່ວຽກງານອັນມີກຽດຂອງທຸກໆທ່ານ.

ໃນໂອກາດອັນສະຫງ່າລາສີນີ້, ຂ້າພະເຈົ້າ ຂໍປະກາດ ປິດກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງຄຳມ່ວນ ຊຸດທີ II ຢ່າງເປັນທາງການນັບແຕ່ເວລານີ້ ເປັນຕົ້ນໄປ.

ໂດຍ: ເອື້ອ ມະໂນສິງ