ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນ ນະຄອນຫຼວງວຽງຈັນ ໄດ້ອັດລົງດ້ວຍຜົນສຳເລັດອັນຈົບງາມ ໃນວັນທີ 26 ກໍລະກົດ 2022 ທີ່ຫ້ອງປະຊຸມສຳນັກງານອົງການປົກຄອງນະຄອນຫຼວງ ໂດຍການເປັນປະທານຂອງທ່ານ ອານຸພາບ ຕຸນາລົມ ຄະນະເລຂາທິການສູນກາງພັກ, ເລຂາຄະນະພັກ ນະຄອນຫຼວງ, ປະທານ ສະພາປະຊາຊົນ ນະຄອນຫຼວງວຽງຈັນ ເຂົ້າຮ່ວມໂດຍ ທ່ານ ປອ. ອາດສະພັງທອງ ສີພັນດອນ ຮອງເລຂາຄະນະພັກ, ເຈົ້າຄອງ ນະຄອນຫຼວງວຽງຈັນ ມີບັນດາທ່ານການນຳນະຄອນຫຼວງ, ສະມາຊິກ ສະພາແຫ່ງຊາດ ປະຈຳເຂດເລືອກຕັ້ງທີ 1, ສະມາຊິກ ສະພາປະຊາຊົນ ນະຄອນຫຼວງ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ອານຸພາບ ຕຸນາລົມ ໄດ້ກ່າວວ່າ: ກອງປະຊຸມຄັ້ງນີ້ ໄດ້ດໍາເນີນມາ ເປັນເວລາ 04 ວັນ, ເຊິ່ງເຕັມໄປດ້ວຍບັນຍາກາດອັນຟົດຟື້ນ ແຫ່ງການເສີມຂະຫຍາຍສິດປະຊາທິປະໄຕ ໃນການຄົ້ນຄວ້າ ແລະ ປະກອບຄໍາຄິດຄໍາເຫັນ ຢ່າງມີເຫດຜົນ, ມີເນື້ອໃນທີ່ເລິກເຊິ່ງ, ລະອຽດຖີ່ຖ້ວນ ມີຄວາມເປັນເອກະພາບສູງ ຂອງບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ນະຄອນຫຼວງ ໃນຖານະເປັນຕົວແທນ ຂອງປະຊາຊົນ ຊາວນະຄອນຫຼວງ ໃນການຄົ້ນຄວ້າ, ພິຈາລະນາ ແລະ ຮັບຮອງເອົາບັນຫາສໍາຄັນຕ່າງໆ ຂອງນະຄອນ ຫຼວງ ດັ່ງນີ້:
1. ຮັບຮອງເອົາບົດລາຍງານ ຂອງທ່ານເຈົ້າຄອງ ນະຄອນຫຼວງວຽງຈັນ ກ່ຽວກັບຜົນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ 2022 ເຊິ່ງໄດ້ຕີລາຄາສູງຕໍ່ຄວາມພະຍາຍາມ ຂອງອົງການປົກຄອງນະຄອນຫຼວງວຽງຈັນ ທີ່ໄດ້ມີຄວາມພະຍາຍາມ ແລະ ເອົາໃຈໃສ່ສູ້ຊົນຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 06 ເດືອນຕົ້ນປີ 2022 ດ້ວຍຄວາມຮັບຜິດ ຊອບສູງ ໃນສະພາບທີ່ມີຄວາມຫຍຸ້ງຍາກທາງດ້ານເສດຖະກິດ-ການເງິນ, ການແຜ່ລະບາດ ຂອງພະຍາດໂຄວິດ-19, ການອ່ອນຄ່າຂອງເງິນກີບ, ລາຄາສິນຄ້າ ແລະ ຄ່າຄອງຊີບເພີ່ມສູງຂຶ້ນ, ການສະໜອງນໍ້າມັນເຊື້ອໄຟມີຄວາມຈໍາກັດ ເຊິ່ງໄດ້ສົ່ງຜົນກະທົບ ຕໍ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ. ເຖິງຢ່າງໃດກໍຕາມ ອົງການປົກຄອງ ນະຄອນຫຼວງ ໄດ້ມີຄວາມພະຍາຍາມຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ເຊິ່ງສາມາດ ຮັກສາໄດ້ສະ ຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ, ເສດຖະກິດ ສືບຕໍ່ເຕີບໂຕ ແລະ ສາມາດປະຄັບປະຄອງເສດຖະກິດ ບໍ່ໃຫ້ເຂົ້າສູ່ວິກິດທີ່ໜັກໜ່ວງ, ສະພາບການພັດທະນາເສດຖະກິດ-ສັງຄົມ ຄ່ອຍໆຟື້ນຕົວດີຂຶ້ນ ເທື່ອລະກ້າວ;
2. ຮັບຮອງເອົາດ້ານຫຼັກການກ່ຽວກັບ ຮ່າງ ແຜນຈັດສັນທີ່ດິນ, ຄຸ້ມຄອງຊັບພະຍາກອນທໍາມະຊາດ ແລະ ສິ່ງແວດລ້ອມແບບຮອບດ້ານ ຂອງນະຄອນຫຼວງວຽງຈັນ. ກອງປະຊຸມມອບໃຫ້ອົງການປົກຄອງ ໄດ້ສືບຕໍ່ປັບປຸງຕາມ ການປະກອບຄໍາເຫັນຂອງກອງປະຊຸມ, ຫຼັງຈາກນັ້ນ, ໃຫ້ນໍາເອົາຮ່າງແຜນດັ່ງກ່າວສະເໜີຕໍ່ກະຊວງກ່ຽວຂ້ອງ ແລະ ລັດຖະບານ ເພື່ອພິຈາລະນາຕົກລົງແລ້ວຈຶ່ງສືບຕໍ່ຄົ້ນຄວ້າເປັນຂໍ້ຕົກລົງ ຫຼື ນິຕິກໍາຂອງ ອົງການປົກຄອງ ເພື່ອສະເໜີ ສະພາປະຊາຊົນ ນະຄອນຫຼວງວຽງຈັນ ນໍາເຂົ້າພິຈາລະນາໃນກອງປະຊຸມຄັ້ງຕໍ່ໄປ;
3. ຮັບຮອງເອົາບົດລາຍງານຜົນການຈັດຕັ້ງປະຕິບັດ ແຜນການເຄື່ອນໄຫວວຽກງານ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ 2022 ຂອງສະພາປະຊາຊົນ ນະຄອນຫຼວງວຽງຈັນ. ກອງປະຊຸມສະແດງຄວາມ ຊົມເຊີຍ ແລະ ເປັນເອກະພາບ ກັບບັນດາຜົນງານ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ທີ່ໄດ້ລາຍງານຕໍ່ກອງ ປະຊຸມ. ກອງປະຊຸມຮຽກຮ້ອງໃຫ້ຄະນະປະຈໍາ ສະພາປະຊາຊົນ, ຄະນະກໍາມະການ ແລະ ສະມາຊິກສະພາປະຊາຊົນ ຈົ່ງໄດ້ສືບຕໍ່ເປັນເຈົ້າການຈັດຕັ້ງຜັນຂະຫຍາຍແຜນການ 06 ເດືອນທ້າຍປີ 2022 ໃຫ້ບັນລຸຄາດໝາຍຕ່າງໆ ໂດຍສະ ເພາະ 3 ພາລະບົດບາດຕົ້ນຕໍ ຂອງສະພາປະຊາຊົນ ເພື່ອຍົກສູງຄຸນນະພາບ ແລະ ສ້າງຄວາມເຊື່ອໝັ້ນ ຕໍ່ການຈັດຕັ້ງ ປະຕິບັດພາລະບົດບາດ ຂອງສະພາປະຊາຊົນ ໃຫ້ນັບມື້ນັບພົ້ນເດັ່ນສູງຂຶ້ນ;
4. ຮັບຮອງເອົາ ການສະເໜີແຕ່ງຕັ້ງ ທ່ານ ສົມບູນ ອາຄະວົງສາ ເປັນຫົວໜ້າຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ ແລະ ທ່ານ ວົງໄຊ ພົມມີໄຊ ເປັນຫົວໜ້າພະແນກການຕ່າງປະເທດ ນະຄອນຫຼວງວຽງຈັນ.
5. ຮັບຟັງການລາຍງານ, ຊີ້ແຈງ ບາງວຽກງານສໍາຄັນພື້ນຖານ ຂອງນະຄອນຫຼວງວຽງຈັນ ດັ່ງນີ້:
1) ບັນຫາການຄວບຄຸມລາຄາສິນຄ້າ, ແຜນການຄຸ້ມຄອງລາຄາສິນຄ້າໃນອະນາຄົດ ແລະ ການສົ່ງເສີມ ການຜະລິດ ເປັນສິນຄ້າພາຍໃນ;
2) ບັນຫາຄວາມຊັກຊ້າ ການຈັດຕັ້ງປະຕິບັດໂຄງການ ກໍ່ສ້າງເສັ້ນທາງແຕ່ບ້ານດອນນົກຂຸ້ມ ຫາ ບ້ານສ້າງ ເຫວີຍ ແລະ ບ້ານດົງສະຫວາດ;
3) ບັນຫານໍ້າຖ້ວມຂັງ ຈາກໂຄງການກໍ່ສ້າງເສັ້ນທາງເລກທີ 13 ເໜືອ, ໂຄງການກໍ່ສ້າງເສັ້ນທາງດ່ວນ ວຽງຈັນ-ວັງວຽງ ແລະ ໂຄງການທາງລົດໄຟລາວ-ຈີນ ໃນຂອບເຂດເມືອງນາຊາຍທອງ;
4) ບັນຫາການຊົດເຊີຍທີ່ດິນ ໃຫ້ແກ່ຜູ້ຖືກຜົນກະທົບ ຈາກໂຄງການທ່າບົກ-ທ່ານາແລ້ງ ແລະ ເຂດໂລຈິສຕິກ;
5) ບັນຫາການຈັດຕັ້ງປະຕິບັດ ໂຄງການນໍ້າເປື້ອນນະຄອນຫຼວງວຽງຈັນ ພາຍໃຕ້ເງິນກູ້ລັດຖະບານຮົງກາລີ;
6) ບັນຫາການແກ້ໄຂ ການອອກໃບຕາດິນຊັກຊ້າ ຕາມຫາງສຽງຂອງປະຊາຊົນ;
7) ບັນຫາການລົບລ້າງໃບຕາດິນ ຈໍານວນ 17 ຕອນບຶງສາລາຄໍາ, ເຂດສໍາປະທານຂອງບໍລິສັດມິດຕະ ພາບການກະເສດ;
8 ) ຮັບຟັງການລາຍງານ ຂອງກອງບັນຊາການປ້ອງກັນຄວາມສະຫງົບ ກ່ຽວກັບການຈັດຕັ້ງປະຕິບັດ ວາ ລະແຫ່ງຊາດ ກ່ຽວກັບການແກ້ໄຂບັນຫາຢາເສບຕິດ ຕາມຂໍ້ຕົກລົງ ຂອງທ່ານເຈົ້າຄອງນະຄອນຫຼວງ ວຽງຈັນ ສະບັບເລກທີ 841/ຈນວ, ລົງວັນທີ 25 ຕຸລາ 2021, ໂດຍລົງເລິກ 6 ວຽກຈຸດສຸມຕາມສິດ ແລະ ໜ້າທີ່ຂອງຕົນ ແລະ ການດໍາເນີນຄະດີຢາເສບຕິດ; ບັນຫາກ່ຽວກັບການແກ້ໄຂບັນຫາກອງ ທຶນຢາເສບຕິດ ນະຄອນຫຼວງວຽງຈັນ; ບັນຫາການຄຸ້ມຄອງຄົນຕ່າງປະເທດ ຢູ່ນະຄອນຫຼວງວຽງຈັນ;
9) ຮັບຟັງການລາຍງານ ການຕິດຕາມກວດກາການນໍາໃຊ້ 07 ມາດຕະການສະກັດກັ້ນ ຂອງອົງການສືບ ສວນ-ສອບສວນ ຕາມທີ່ໄດ້ກໍານົດໄວ້ໃນມາດຕາ 136 ຂອງກົດໝາຍວ່າດ້ວຍ ການດໍາເນີນຄະດີ ອາຍາ ໂດຍສະເພາະການແກ້ໄຂການລະເມີດກົດໝາຍໃນການພາງຕົວ, ກັກຕົວ ແລະ ການກັກຂັງພາງ ທີ່ບໍ່ຖືກຕ້ອງຕາມກົດໝາຍ ໃນໄລຍະ 06 ເດືອນຕົ້ນປີ 2022 ຂອງອົງການໄອຍະການປະຊາຊົນ ນະຄອນຫຼວງ;
10) ຮັບຟັງການລາຍງານ ຂອງອົງການໄອຍະການປະຊາຊົນ ນະຄອນຫຼວງ ກ່ຽວກັບການຈັດຕັ້ງ ປະຕິບັດ ວາລະແຫ່ງຊາດ ກ່ຽວກັບການແກ້ໄຂບັນຫາຢາເສບຕິດ ຕາມຂໍ້ຕົກລົງ ຂອງເຈົ້າຄອງນະ ຄອນຫຼວງ ວຽງຈັນ ສະບັບເລກທີ 841/ຈນວ, ລົງວັນທີ 25 ຕຸລາ 2021. ໂດຍລົງເລິກການດໍາເນີນຄະດີຢາ ເສບຕິດ ຢູ່ນະຄອນຫຼວງ;
11) ຮັບຟັງການລາຍງານ ຂອງສານປະຊາຊົນ ນະຄອນຫຼວງ ກ່ຽວກັບການຈັດຕັ້ງປະຕິບັດວາລະແຫ່ງຊາດ ກ່ຽວກັບການແກ້ໄຂບັນຫາຢາເສບຕິດ ຕາມຂໍ້ຕົກລົງ ຂອງທ່ານເຈົ້າຄອງ ນະຄອນຫຼວງວຽງຈັນ ສະບັບເລກທີ 841/ຈນວ, ລົງວັນທີ 25 ຕຸລາ 2021, ໂດຍລົງເລິກການພິຈາລະນາຕັດສິນຄະດີ ຢາເສບຕິດ;
12) ຮັບຟັງການລາຍງານ ຂອງພະແນກຍຸຕິທໍາ ກ່ຽວກັບການຈັດຕັ້ງປະຕິບັດ ວາລະແຫ່ງຊາດ ກ່ຽວກັບ ການແກ້ໄຂບັນຫາຢາເສບຕິດ ຕາມຂໍ້ຕົກລົງ ຂອງທ່ານເຈົ້າຄອງນະຄອນຫຼວງວຽງຈັນ ສະບັບເລກທີ 841/ຈນວ, ລົງວັນທີ 25 ຕຸລາ 2021 ລົງເລິກການຈັດຕັ້ງປະຕິບັດຄໍາຕັດສິນຂອງສານ ທີ່ກ່ຽວຂ້ອງ ກັບຢາເສບຕິດ.
ຕໍ່ບັນຫາທີ່ໄດ້ມີການລາຍງານ ແລະ ຊີ້ແຈງ ທີ່ກ່າວມາຂ້າງເທິງນັ້ນ, ກອງປະຊຸມຮຽກຮ້ອງໃຫ້ອົງການປົກຄອງ ນະຄອນຫຼວງວຽງຈັນ, ພະແນກການ, ສານປະຊາຊົນ, ອົງການໄອຍະການປະຊາຊົນ ແລະ ບັນດາພາກສ່ວນທີ່ກ່ຽວ ຂ້ອງເອົາໃຈໃສ່ສືບຕໍ່ຈັດຕັ້ງປະຕິບັດ ບັນດາເນື້ອໃນວິທີການ, ມາດຕະການໃນການຈັດຕັ້ງປະຕິບັດ ແລະ ແກ້ໄຂບັນ ດາບັນຫາຕ່າງໆທີ່ໄດ້ລາຍງານ, ຊີ້ແຈງແຕ່ລະຫົວຂໍ້ ແລະ ໃຫ້ຄໍາໝັ້ນສັນຍາ ໃນກອງປະຊຸມຄັ້ງນີ້ ໃຫ້ມີປະສິດທິຜົນ ແລະ ມີຜົນສັກສິດ.