(ສພຊ) – ກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານໄລຍະຜ່ານມາຂອງໜ່ວຍແມ່ຍິງກົມຈັດຕັ້ງ-ພະນັກງານ ໄດ້ດໍາເນີນຢ່າງເປັນທາງການໃນວັນຈັນທີ 5 ສິງຫາ 2024 ພາຍໃຕ້ການເປັນປະທານຂອງສະຫາຍ ນາງ ເພັດສາຄອນ ອຸ່ນມີໄຊ ຫົວໜ້າໜ່ວຍແມ່ຍິງກົມຈັດຕັ້ງ-ພະນັກງານ; ມີສະຫາຍ ແສງແກ້ວ ວົງນະລາດ ຄະນະພັກຮາກຖານຄະນະເລຂາທິການສະພາແຫ່ງຊາດ (ຄລສ), ເລຂາໜ່ວຍພັກກົມຈັດຕັ້ງ-ພະນັກງານ, ສະຫາຍ ນາງ ອຸດນາລີ ໄຊຍະສັກ ຄະນະບໍລິຫານງານສະຫະພັນແມ່ຍິງສະພາແຫ່ງຊາດ ພ້ອມດ້ວຍຕາງໜ້າອົງການຈັດຕັ້ງມະຫາຊົນພາຍໃນກົມ, ບັນດາສະຫາຍຄະນະໜ່ວຍແມ່ຍິງທີ່ຂຶ້ນກັບ ຄລສ, ສະມາຊິກແມ່ຍິງພາຍໃນໜ່ວຍ ແລະ ແຂກຖືກເຊີນ.

ສະມາຊິກແມ່ຍິງພາຍໃນໜ່ວຍ 8 ສະຫາຍ ໄດ້ເອກະພາບກັນຢ່າງສູງ ໃນການພິຈາລະນາ ແລະ ຮັບຮອງເອົາບັນດາເນື້ອໃນສຳ ຄັນຄື: ບົດສະຫຼຸບການເຄື່ອນໄຫວວຽກງານໄລຍະຜ່ານມາ (2018-2024) ແລະ ທິດທາງແຜນການ 5 ປີຕໍ່ໜ້າ ຂອງໜ່ວຍແມ່ຍິງກົມຈັດຕັ້ງ-ພະນັກງານ, ບົດສະຫຼຸບ 5 ປີຂອງຄະນະໜ່ວຍແມ່ຍິງກົມຈັດຕັ້ງ-ພະນັກງານ; ພ້ອມນັ້ນ, ກອງປະຊຸມຍັງໄດ້ຜ່ານຂໍ້ຕົກລົງຮັບຮອງເອົາການແຕ່ງຕັ້ງຄະນະໜ່ວຍແມ່ຍິງກົມຈັດຕັ້ງ-ພະນັກງານ ຊຸດໃໝ່ ໂດຍແຕ່ງຕັ້ງສະຫາຍ ນາງ ເພັດສາຄອນ ອຸ່ນມີໄຊ ເປັນຫົວໜ້າ ແລະ ສະຫາຍ ນາງ ມ້ວຍ ແສນແກ້ວດວງຕາ ເປັນຮອງຫົວໜ້າ.

ໃນໂອກາດນີ້, ສະຫາຍ ແສງແກ້ວ ວົງນະລາດ ມີຄຳເຫັນໂອ້ລົມຕໍ່ກອງປະຊຸມ ເຊິ່ງໄດ້ສະແດງຄວາມຍ້ອງຍໍຊົມ ເຊີຍຕໍ່ຜົນງານຂອງໜ່ວຍແມ່ຍິງກົມຈັດຕັ້ງ-ພະນັກງານໃນໄລຍະຜ່ານມາ ແລະ ມີຄຳເຫັນເນັ້ນໜັກໃຫ້ຄະນະໜ່ວຍ ພ້ອມດ້ວຍສະມາຊິກທຸກສະຫາຍ ສືບຕໍ່ເສີມຂະຫຍາຍດ້ານດີ, ປະຕິບັດຕາມມະຕິ, ຄຳສັ່ງ, ກົດລະບຽບຕ່າງໆ ທີ່ສະຫະ ພັນແມ່ຍິງລາວວາງອອກ ຢ່າງມີປະສິດທິຜົນສູງ; ເອົາໃຈໃສ່ເຕົ້າໂຮມຄວາມສາມັກຄີ, ເຂົ້າຮ່ວມຂະບວນການຂອງອົງການຈັດຕັ້ງຢ່າງເປັນເຈົ້າການ; ດໍາເນີນຊີວິດການເມືອງເປັນປົກກະຕິ ໂດຍຖືເອົາການຕໍານິຕິຊົມຕົນເອງ, ການຕິຊົມເຊິ່ງກັນແລະກັນ ເປັນປັດໄຈສໍາຄັນ; ຕັ້ງໜ້າເຄື່ອນໄຫວປະຕິບັດຂໍ້ແຂ່ງຂັນ 3 ດີ ຂອງແມ່ຍິງລາວ ຕິດພັນກັບຂໍ້ແຂ່ງຂັນ “ຮັກຊາດ ແລະ ພັດທະນາ” ໃຫ້ສາມາດຍາດໄດ້ຜົນງານທີ່ດີເດັ່ນຂື້ນກວ່າເກົ່າ; ພ້ອມກັນນັ້ນ, ກໍຕ້ອງເອົາໃຈໃສ່ປະຕິບັດເນື້ອໃນຂໍ້ແຂ່ງຂັນ 3 ດີ ຂອງແມ່ຍິງລາວ ໃຫ້ເປັນຂະບວນຟົດຟື້ນ, ເຮັດລ້ອນໜ້າທີ່ເປັນເສນາທິການໃຫ້ແກ່ການນໍາ ກໍຄືກົມຈັດຕັ້ງ-ພະນັກງານ ໃຫ້ມີໝາກຜົນສຳເລັດອັນຈົບງາມ.

(ຂ່າວ: ນາງ ປາກາລັກ ພົມມີໄຊ, ພາບ: ອານຸສອນ ພູມມີທອນ)