ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ຕອນເຊົ້າຂອງວັນອັງຄານ, ວັນທີ 23 ສິງຫາ 2022 ຢູ່ທີ່ຫ້ອງປະຊຸມສະພາປະຊາຊົນແຂວງ, ໜ່ວຍພັກຮາກຖານສະພາປະຊາຊົນແຂວງ ໄດ້ດຳເນີນຊີວິດປະຈໍາເດືອນ ສິງຫາ 2022, ໂດຍການເປັນປະທານຂອງສະຫາຍ ທອງຄານ ວັດສະດາກອນ ເລຂາໜ່ວຍພັກ ສພຂ, ມີສະຫາຍ ຄໍາດີ ວົງລ້ອມ ຮອງເລຂາພັກແຂວງ, ປະທານ ສພຂ, ມີຄະນະໜ່ວຍພັກ, ສະມາຊິກພັກສົມບູນ ແລະ ສຳຮອງພາຍໃນໜ່ວຍພັກຮາກຖານ ສພຂ ເຂົ້າຮ່ວມຢ່າງພ້ອມພຽງ.
 
ການດຳເນີນຊີວິດພັກໃນຄັ້ງນີ້, ຄະນະພັກໄດ້ຜ່ານບົດສະຫລຸບຕີລາຄາການນໍາພາ-ຊີ້ນໍາ ຂອງຄະນະໜ່ວຍພັກປະຈໍາເດືອນ ສິງຫາ ແລະ ວາງທິດທາງແຜນການເດືອນ ກັນຍາ 2022, ເຊິ່ງຜ່ານການເຄື່ອນໄຫວໃນໄລຍະ 1 ເດືອນຜ່ານມາ, ທາງຄະນພັກໄດ້ເອົາໃຈໃສສຶກສາອົບຮົມການເມືອງ-ແນວຄິດ, ໄດ້ເອົາໃຈໃສ່ນໍາພາ-ຊີ້ນໍາ ການເຄື່ອນໄຫວວຽກງານດ້ານວິຊາສະເພາະ, ພ້ອມທັງການປະສານສົມທົບກັບພາກສ່ວນກ່ຽວຂ້ອງກະກຽມບັນດາເນື້ອໃນຕ່າງໆ ເຮັດໃຫ້ການດຳເນີນກອງປະຊຸມສະໄໝສາມັນເທື່ອ 3 ຂອງສະພາປະຊາຊົນແຂວງ ຊຸດທີ II ສໍາເລັດຕາມລະດັບຄາດໝາຍ ແລະ ໄດ້ຕ້ອນຮັບການຢ້ຽມຢາມເຮັດວຽກຂອງທ່ານ ປອ ໄຊສົມພອນ ພົມວິຫານ ປະທານສະພາແຫ່ງຊາດ.
ຫລັງຈາກນັ້ນ, ບັນດາທ່ານສະມາຊິກພັກໄດ້ປະກອບຄໍາຄິດຄໍາເຫັນ, ຕໍານິສົ່ງຂ່າວເຊິ່ງກັນ ແລະ ກັນ ພາຍໃນໜ່ວຍພັກ ຢ່າງເປັນປົກກະຕິ ເພື່ອແນ່ໃສ່ເຮັດໃຫ້ບົດສະຫລຸບຄົບຖ້ວນສົມບູນ ແລະ ເພື່ອເຮັດໃຫ້ ສະມາຊິກພັກ, ພະນັກງານ-ລັດຖະກອນ ສພຂ ມີທັດສະນະຫຼັກໝັ້ນ, ການເມືອງໜັກແໜ້ນ, ເຊື່ອໝັ້ນຕໍ່ອຸດົມການນຳພາຂອງພັກ, ປະຕິບັດລະບຽບພັກ, ກົດໝາຍຂອງລັດຢ່າງເຂັ້ມງວດ.
ການດໍາເນີນຊີວິດພັກຄັ້ງນີ້, ຍັງໄດ້ຟັງການຜ່ານໃບສໍາຫຼວດ ຂອງສະມາຊິກພັກສໍາຮອງທີ່ຈະຂະຫຍາຍເຂົ້າພັກສົມບູນຈໍານວນ 1 ສະຫາຍ. ຈາກນັ້ນ, ສະມາຊິກພັກສົມບູນ ແລະ ສະມາຊິກພັກທີ່ໄດ້ຮັບການມອບໝາຍຕິດຕາມກໍ່ໄດ້ພັດປ່ຽນກັນປະກອບຄໍາຄິດເຫັນ ແລະ ຍົກມືຮັບຮອງເອົາດ້ວຍຄະແນນສຽງເປັນເອກະສັນ.
ພ້ອມນັ້ນ, ຍັງໄດ້ຮັບຟັງການເຜີຍແຜ່ເອກະສານວັນລັດຖະທໍາມະນູນແຫ່ງ ສປປ ລາວ ຄົບຮອບ 31 ປີ(15/8/1991-15/8/2022) ແລະ ເອກະສານສໍາຄັນອີກຈໍານວນໜຶ່ງ.
 📸✍🏻: ແສງພອນ ອິນນະລົງ.