ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ຕອນເຊົ້າວັນອັງຄານທີ 22 ມີນາ 2022 ຢູ່ທີ່ຫ້ອງປະຊຸມ ສພຂ, ໜ່ວຍພັກສະພາປະຊາຊົນແຂວງ ໄດ້ດຳເນີນຊີວິດປະຈໍາເດືອນ ມີນາ 2022, ໂດຍການເປັນປະທານຂອງສະຫາຍ ທອງຄານ ວັດສະດາກອນ ເລຂາໜ່ວຍພັກ ສພຂ, ໃຫ້ກຽດເຂົ້າຮ່ວມມີສະຫາຍ ຄໍາດີ ວົງລ້ອມ ຮອງເລຂາພັກແຂວງ, ປະທານ ສພຂ, ມີຄະນະໜ່ວຍພັກ, ສະມາຊິກພັກສົມບູນ ແລະ ສຳຮອງພາຍໃນໜ່ວຍພັກ ສພຂ ເຂົ້າຮ່ວມ.

                      ການດຳເນີນຊີວິດພັກໃນຄັ້ງນີ້ ສະຫາຍເລຂາໜ່ວຍພັກ ໄດ້ຜ່ານບົດສະຫລຸບການເຄື່ອນໄຫວວຽກງານປະຈໍາເດືອນ ມີນາ 2022 ເຊິ່ງສະແດງໃຫ້ເຫັນຜົນສຳເລັດໃນຫລາຍດ້ານ, ເຊິ່ງທາງຄະນະພັກໄດ້ເອົາໃຈໃສ່ນໍາພາ-ຊີ້ນຳ ການ ເຄື່ອນໄຫວວຽກງານວິຊາສະເພາະເປັນປົກກະຕິ, ໂດຍປະຕິບັດຕາມ 3 ພາລະບົດບາດຂອງ ສພຂ ສະແດງອອກບັນຫາທີ່ພົ້ນເດັ່ນດັ່ງນີ້: ສຳເລັດຈັດກອງປະຊຸມເຜີຍແຜ່, ແນະນຳວຽກງານ ສພຂ ໃຫ້ສະມາຊິກ ສພຂ ແລະ ພະນັກງານຜູ້ຊ່ວຍວຽກປະຈຳເຂດເລືອກຕັ້ງເມືອງ ໄດ້ 1 ຄັ້ງ; ຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ສພຂ ໄດ້ເຂົ້າຮ່ວມຕິດຕາມກວດກາຮ່ວມກັບ ກຳມາທິກາວັດທະນະທຳ-ສັງຄົມ ສພຊ ຢູ່ 2 ເມືອງຄື: ເມືອງໄຊ ແລະ ເມືອງ ຫຼາ; ໄດ້ຮັບຄໍາຮ້ອງຂໍຄວາມເປັນທຳ 3 ເລື່ອງ, ຕ້ອນຮັບການເຂົ້າພົບຂອງພົນລະເມືອງ 3 ຄັ້ງ, ປະສານພາກສ່ວນທີ່ກ່ຽວຂ້ອງແກ້ໄຂຄໍາຮ້ອງຂໍຄວາມເປັນທຳ, ຕິດຕາມກວດກາການປະຕີບັດລັດຖະທຳມະນູນ ແລະ ກົດໝາຍ, ການຈັດຕັ້ງປະຕີບັດແຜນພັດ ທະນາເສດຖະກິດ-ສັງຄົມ, ແຜນງົບປະມານແຫ່ງລັດປະຈຳໄຕມາດ 1 ປີ 2022; ຄະນະປະຈຳ ສພຂ ລົງພົບປະພໍ່ແມ່ປະຊາຊົນຜູ້ທີ່ໄດ້ຮັບຜົນກະທົບທາງກົງ ແລະ ທາງອ້ອມຈາກບໍລິສັດຂຸດຄົ້ນແຮ່ຄຳເມືອງປາກແບງ ແລະ ວຽກງານອື່ນໆ , ພ້ອມທັງວາງທິດທາງແຜນການປະຈໍາເດືອນ ເມສາ ປີ 2022.

ຫລັງຈາກນັ້ນ, ບັນດາທ່ານສະມາຊິກພັກໄດ້ປະກອບຄໍາຄິດຄໍາເຫັນ, ຕໍານິສົ່ງຂ່າວເຊິ່ງກັນ ແລະ ກັນ ພາຍໃນໜ່ວຍພັກ ຢ່າງເປັນປົກກະຕິ.

ພາບ, ຂ່າວ: ແສງພອນ ອິນນະລົງ.