ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

                ໃນຕອນເຊົ້າວັນທີ 24 ມິຖຸນາ 2022 ຜ່ານມານີ້, ຢູ່ທີ່ສະໂມສອນສະພາປະຊາຊົນແຂວງ ເຊກອງ ໄດ້ມີກອງປະຊຸມຜ່ານຮ່າງແຜນການເຄື່ອນໄຫວ 5 ປີ (2021-2025), ທິດທາງແຜນການປີ 2022 ແລະ ແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2022 ຂອງໜ່ວຍພັກຄະນະເລຂາທິການ ສະພາປະຊາຊົນ ແຂວງ ເຊກອງ ໃຫ້ກຽດເຂົ້າຮ່ວມເປັນປະທານຂອງທ່ານ ນາງ ຄໍາເສັງ ທຸມມະວົງສາ ກໍາມະການພັກແຂວງ, ເລຂາຄະນະພັກຮາກຖານ ສພຂ ແລະ ທ່ານ ນາງ ຄໍາໄພ ວິລະສານ ເລຂາໜ່ວຍພັກຄະນະເລຂາທິການ ສະພາປະຊາຊົນແຂວງ, ມີບັນດາທ່ານຄະນະໜ່ວຍພັກອ້ອມຂ້າງ, 3 ອົງການຈັດຕັ້ງມະຫາຊົນ, ຫົວໜ້າຈຸ-ຮອງຈຸ ພ້ອມດ້ວຍສະມາຊິກພັກສົມບູນ-ສໍາຮອງພາຍໃນໜ່ວຍພັກ ຄະນະເລຂາທິການ ສະພາປະຊາຊົນແຂວງ ເຂົ້າຮ່ວມ.            ໃນກອງປະຊຸມໄດ້ຮັບຟັງການຜ່ານຮ່າງແຜນການເຄື່ອນໄຫວ 5 ປີ (2021-2025), ທິດທາງແຜນການ 1 ປີ 2022 ແລະ ແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2022 ຂອງໜ່ວຍພັກຄະນະເລຂາທິການ ສະພາປະຊາຊົນ ແຂວງ ເຊກອງ. ພ້ອມນັ້ນ, ຍັງໄດ້ມີການສົນທະນາແລກປ່ຽນ, ປະກອບຄໍາຄິດຄໍາເຫັນໃສ່ຮ່າງແຜນການດັ່ງກ່າວຢ່າງມີຈຸດສຸມ.          ເພື່ອເຮັດໃຫ້ແຜນການດັ່ງກ່າວມີຄວາມສົມບູນ ແລະ ສາມາດຍາດໄດ້ຜົນສໍາເລັດດັ່ງກ່າວນັ້ນ ສະຫາຍ ນາງ ຄໍາເສັງ ທຸມມະວົງສາ ກໍໄດ້ໃຫ້ກຽດໂອ້ລົມຕໍ່ກອງປະຊຸມ ເຊິ່ງສະຫາຍ ໄດ້ຮຽກຮ້ອງໃຫ້ຄະນະໜ່ວຍພັກ, ສະມາຊິກພັກ, ພະນັກງານ-ລັດຖະກອນ ຕ້ອງຄົ້ນຄ້ວາ, ເຊື່ອມຊຶມກໍາແໜ້ນຄໍາສັ່ງຂອງກົມການເມືອງສູນກາງພັກ, ບັນດາແຈ້ງການແນະນໍາຂອງຄະນະຈັດຕັ້ງສູນກາງພັກ ແລະ ມະຕິຕົກລົງຂອງຄະນະປະຈໍາພັກແຂວງ ວ່າດ້ວຍການເພີ່ມທະວີກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນໃຫ້ເລິກເຊິງເຖິງຖອງ ແລະ ເພີ່ມທະວີກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂອງຄະນະໜ່ວຍພັກ, ສະມາຊິກພັກສູງກ່ວາເກົ່າ, ທຸກສະຫາຍ ຕ້ອງເປັນເຈົ້າການເຊື່ອມຊຶມ, ຈັດຕັ້ງປະຕິບັດແຜນການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ເກີດດອກອອກຜົນຕົວຈິງ, ສະມາຊິກພັກຕ້ອງຍົກສູງຄວາມຮັບຜິດຊອບ ໃນການຝືກຝົນຫຼໍຫຼອມຕົນເອງ ເພື່ອກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນພາຍໃນໜ່ວຍພັກໃຫ້ໄດ້ຮັບຄຸນນະພາບ.                                               #ໂດຍ:ນັກຂ່າວສະພາເຂດທີ 16.