ກອງປະຊຸມໃຫຍ່ ສະມາຊິກພັກ ຄັ້ງທີ II ຂອງໜ່ວຍພັກຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ສະພາປະຊາຊົນແຂວງສະຫວັນນະເຂດ ໄດ້ໄຂຂຶ້ນຢ່າງເປັນທາງການ ໃນຕອນເຊົ້າວັນທີ 11 ມີນາ 2022 ທີ່ສະພາປະຊາຊົນແຂວງ ດັ່ງກ່າວ ໂດຍເປັນກຽດເຂົ້າຮ່ວມໃນພິທີຂອງ ສະຫາຍ ຄໍາຜັນ ຄູນສະຫວັນ ຄະນະປະຈໍາພັກແຂວງ, ຮອງເລຂາຄະນະພັກຮາກຖານ, ຮອງປະທານສະພາປະຊາຊົນແຂວງ, ສະຫາຍ ທອງໃສ ອິນທິແສງ ເລຂາໜ່ວຍພັກຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ສພຂ, ນອກຈາກນັ້ນຍັງມີຕາງໜ້າຈາກຄະນະ ຈັດຕັ້ງແຂວງ; ຄະນະກວດກາແຂວງ, ຄະນະພັກຮາກຖານ, ບັນດາໜ່ວຍພັກພາຍໃນ ສພຂ ແລະ ຜູ້ແທນສົມບູນພາຍໃນໜ່ວຍພັກເຂົ້າຮ່ວມຢ່າງພ້ອມພຽງ.
ໃນວາລະປະຊຸມ ສະຫາຍ ທອງໃສ ອິນທິແສງ ເລຂາໜ່ວຍພັກຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ໄດ້ຂຶ້ນກ່າວໄຂກອງປະຊຸມ ພ້ອມທັງຜ່ານບົດລາຍງານການເມືອງ ພາກ I,II,III ເປັນຕົ້ນແມ່ນວຽກງານດ້ານການເມືອງແນວຄິດ, ແບບແຜນການນໍາພາ, ການເຮັດໜ້າທີ່ຊີ້ນໍາ-ນໍາພາການປະຕິບັດໜ້າທີ່ເບື້ອງລັດໃນການຕິດຕາມຊຸກຍູ້ການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ, ການຮັບຄໍາຮ້ອງຂໍຄວາມເປັນທໍາຂອງພົນລະເມືອງ, ຕິດຕາມຊຸກຍູ້ວຽກງານໃນຂົງເຂດ ປ້ອງກັນຊາດ-ປ້ອງກັນຄວາມສະຫງົບ, ວຽກງານກໍ່ສ້າງພັກ ພະນັກງານ, ຕີລາຄາ ດ້ານດີ, ດ້ານອ່ອນ, ຂໍ້ຄົງຄ້າງ ບົດຮຽນທີ່ຖອດຖອນໄດ້ ໃນການເຄື່ອນໄຫວ ຊີ້ນໍາ-ນໍາພາ ການຈັດຕັ້ງປະຕິບັດໜ້າທີ່ວຽກງານ ໃນໄລຍະຜ່ານມາ.
ຈາາກນັ້ນ, ບັນດາຜູ້ແທນ ສົມບູນໄດ້ໃຊ້ສິດປະຊາທິປະໄຕ ຂອງຕົນປ່ອນບັດຄັດເລືອກເອົາ ຄະນະໜ່ວຍພັກຊຸດໃໝ່ຂັ້ນຂອງຕົນ, ກອງປະຊຸມໄດ້ເລືອກເອົາ ສະຫາຍ ທອງໃສ ອິນທິແສງ ເລຂາໜ່ວຍພັກ ແລະ ສະຫາຍ ພັນໂທ ພູມີດາວວອນ ອາດສະຜັນທອງ ເປັນຮອງເລຂາ ແລະ ທັງເປັນຜູ້ກວດກາໜ່ວຍພັກ.
ຕອນທ້າຍນີ້ ສະຫາຍ ຄໍາຜັນ ຄູນສະຫວັນ ຄະນະປະຈໍາພັກແຂວງ, ຮອງເລຂາຄະນະພັກຮາກຖານ, ຮອງປະທານສະພາປະຊາຊົນແຂວງ ກໍ່ໄດ້ມີຄຳເຫັນໂອ້ລົມຕໍ່ກອງປະຊຸມ ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການຈັດຕັ້ງຈັດຕັ້ງປະຕິບັດວຽກງານ ໃນໄລຍະ 5 ປີຜ່ານມາ ພ້ອມທັງໄດ້ເນັ້ນໜັກໃຫ້ ຄະນະພັກຊຸດໃໝ່ ໃຫ້ເຄື່ອນໄຫວຊີ້ນໍາ-ນໍາພາ, ເພີ່ມທະວີວຽກງານແນວຄິດການເມືອງໃຫ້ແກ່ສະມະຊິກພັກບໍ່ໃຫ້ມີປະກົດການຫຍໍ້ທໍ້ໂດຍສະເພາະຊື່ອອນໄລຕ່າງໆທີ່ມີຢູ່ໃນສັງຄົມ, ຕັ້ງໜ້າເຊື່ອມຊຶມຜັນຂະຫຍາຍກົດລະບຽບຂອງພັກຢ່າງຕໍ່ເນື່ອງ, ພ້ອມທັງເອົາໃຈໃສ່ວຽກງານປ້ອງກັນຄວາມສະຫງົບພາຍໃນ ແລະ ພາຍນອກໃຫ້ມີການສົມທົບ ເຄື່ອນໄຫວໃຫ້ມີຄວາມສະຫງົບຮອບດ້ານ, ນອກຈາາກນີ້ບັນຫາສໍາຄັນແມ່ນການປະສານສົມທົບກັບອົງການປົກຄອງແຂວງ ເພື່ອກະກຽມບັນດານິຕິກໍາທີ່ຈະນໍາເຂົ້າພິຈາລະນາໃນກອງປະຊຸມ ສະໄໝສາມັນຊຸດທີ 3 ໃຫ້ທ່ວງທັນ ແລະ ມີເນື້ອໃນເລີກເຊິ່ງ, ເພື່ອຜັນຂະຫຍາຍແຜນພັດທະນາເສດຖະກິດ ແລະ ສັງຄົມ ໃນໄລຍະປີ 2021-2025 ໃຫ້ປະກົດຜົນເປັນຈິງ.