ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ວັນທີ 3 ທັນວາ 2021 ທີ່ສະພາແຫ່ງຊາດ, ກອງປະຊຸມໃຫຍ່ຄັ້ງທີ I ຂອງໜ່ວຍພັກກົມບໍລິຫານ-ພິທີການ ຄະນະເລຂາທິການສະພາແຫ່ງຊາດ ໄດ້ໄຂຂຶ້ນ ແລະ ສໍາເລັດລົງດ້ວຍຜົນສຳເລັດອັນຈົບງາມ ພາຍໃຕ້ການເປັນປະທານຂອງສະຫາຍ ອາລຸນຍາເດດ ຣາຊະພົນ ຮັກສາການເລຂາໜ່ວຍພັກກົມບໍລິຫານ-ພິທີການ, ໂດຍການເຂົ້າຮ່ວມຂອງສະຫາຍ ນາງ ປິ່ງຄຳ ລາຊະສິມມາ ກໍາມະການສູນກາງພັກ, ກຳມະການຄະນະບໍລິຫານງານພັກສະພາແຫ່ງຊາດ, ເລຂາຄະນະພັກຮາກຖານຄະນະເລຂາທິການສະພາແຫ່ງຊາດ; ມີບັນດາຄະນະໜ່ວຍພັກທີ່ຂຶ້ນກັບຄະນະເລຂາທິການສະພາແຫ່ງຊາດ, ຜູ້ຕາງໜ້າຄະນະຊ່ວຍວຽກຄະນະພັກສະພາແຫ່ງຊາດ, ສະມາຊິກພັກສົມບູນ-ສຳຮອງ ແລະ ແຂກຖືກເຊີນ.

ກອງປະຊຸມໃຫຍ່ຄັ້ງທີ I ຂອງໜ່ວຍກົມບໍລິຫານ ໄດ້ດຳເນີນໄປດ້ວຍຄວາມຮັບຜິດຊອບສູງຂອງບັນດາຜູ້​ແທນສົມບູນທີ່ເຂົ້າຮ່ວມກອງປະຊຸມ​ ໄດ້ເຫັນ​ດີ​ເປັນ​ເອກພາບ​ໃນການຄົ້ນຄວ້າພິຈາລະນາ ແລະ ຮັບຮອງເອົາເນື້ອໃນທີ່ສຳຄັນຄື: ຮັບຮອງເອົາບົດລາຍງານການເມືອງ ຂອງໜ່ວຍພັກກົມບໍລິຫານ-ພິທີການ ແລະ ສະແດງຄວາມເຫັນດີເຫັນພ້ອມຕໍ່ບົດສະຫລຸບຕີລາຄາ ຜົນງານຂອງໜ່ວຍພັກ ທີ່ຍາດມາໄດ້ ໃນໄລຍະຜ່ານມາ; ຮັບຮອງເອົາບົດສໍາຫລວດການນໍາພາລວມຂອງໜ່ວຍພັກ ໃນໄລຍະຜ່ານມາ ເຊິ່ງໄດ້ຕີລາດ້ານດີ, ດ້ານອ່ອນ ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ຈຳນວນໜຶ່ງ ທີ່ຄະນະໜ່ວຍພັກ ຊຸດທີ I ຈະໄດ້ປັບປຸງແກ້ໄຂຂໍ້ບົກຜ່ອງ ແລະ ເສີມຂະຫຍາຍດ້ານຕັ້ງໜ້າ ຢ່າງແຂງແຮງ. ຈາກນັ້ນ, ຜູ້​ແທນ​ສົມບູນກອງ​ປະຊຸມ​ໃຫຍ່ ​ໄດ້​​ໃຊ້​ສິດ​ປະຊາທິປະ​ໄຕ​ຂອງ​ຕົນ​ປ່ອນ​ບັດ​​ເລືອກຕັ້ງ​ເອົາ​ຄະນະໜ່ວຍ​​ພັກກົມບໍລິຫານ-ພິທີການ ສະ​​ໄໝ​ທີ I ບົນ​ພື້ນຖານ​ຫລັກການລວມສູນ​ປະຊາທິປະ​ໄຕ​ ທັງ​ຖືກຕ້ອງ​ສອດຄ່ອງ​ກັບ​ມາດຖານ​ເງື່ອນ​ໄຂ​ທີ່​ໄດ້​ກຳນົດ​ໄວ້   ເຊິ່​ງມີ​ຜູ້ອອກຮັບ​ສະໝັກ​ເລືອກ​ຕັ້ງ 5 ສະຫາຍ ຍິງ 1 ສະຫາຍ; ເລືອກໄດ້ຄະນະໜ່ວຍພັກຊຸດໃໝ່​ 3 ສະຫາຍ ແລະ ໄດ້ເປີດກອງປະຊຸມຄັ້ງປະຖົມມະລືກຄົບຄະນະໜ່ວຍພັກ ໄດ້ເປັນເອກະພາບກັນເລືອກ​ເອົາ​ສະຫາຍ ອາລຸນຍາເດດ ຣາຊະພົນ ເປັນເລຂາໜ່ວຍພັກ, ສະຫາຍ ຂັນທອງ ເພັງລາສີ ເປັນຮອງເລຂາໜ່ວຍພັກ ແລະ ສະຫາຍ ຂັນທອງ ແພງສີໃຈ ເປັນກຳມະການ ແລະ ຜູ້ກວດກາໜ່ວຍພັກ.

ໂອກາດດັ່ງກ່າວ, ກອງປະຊຸມໄດ້ຮັບຟັງການໂອ້ລົມ ຈາກສະຫາຍ ນາງ ປິ່ງຄຳ ລາຊະສິມມາ ເຊິ່ງສະຫາຍ ໄດ້ຕີລາຄາສູງ ຕໍ່ຜົນງານການຊີ້ນຳ-ນຳພາຂອງໜ່ວຍພັກ ໃນການປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ໃນໄລຍະຜ່ານມາ, ຍົກໃຫ້ເຫັນບາງບັນຫາຈຸດອ່ອນ ຂໍ້ຄົງຄ້າງທີ່ຈະໄດ້ສືບຕໍ່ແກ້ໄຂ ແລະ ໃຫ້ທິດຊີ້ນຳແກ່ຄະນະໜ່ວຍພັກຊຸດໃໝ່ ໃນການສືບຕໍ່ນໍາພາ ແລະ ຈັດຕັ້ງປະຕິບັດວຽກງານ ຕາມພາລະບົດບາດ ແລະ ຄວາມຮັບຜິດຊອບ ຂອງໜ່ວຍພັກ ເປັນຕົ້ນ: ການນໍາພາກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ຕາມ 5 ຫລັກການ, 3 ທິດນຳຂອງພັກ, ປັບປຸງກົນໄກການປະສານງານໃຫ້ມີຄຸນນະພາບດີຂຶ້ນ. ພ້ອມນັ້ນ, ຍັງໄດ້ເນັ້ນບາງຈຸດໃຫ້ຄະນະໜວ່ຍພັກຊຸດໃໝ່ ກໍຄື ພະນັກງານ-ສະມາຊິກພັກ ນຳໄປຄົ້ນຄວ້າປັບປຸງໃນຕໍ່ໜ້າ ຄື: ອອກແຮງເຊື່ອມຊຶມແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດ, ບັນດາມະຕິ, ຄຳສັ່ງຕ່າງໆຂອງຂັ້ນເທິງ,  ເພີ່ມຄວາມເປັນເຈົ້າການໃນການປະຕິບັດແນວທາງ, ນະໂຍບາຍ, ມະຕິ, ຄຳສັ່ງ, ກົດລະບຽບ ຂອງພັກຢ່າງເຂັ້ມງວດ, ເພີ່ມທະວີຄວາມສາມັກຄີເປັນເອກະພາບພາຍໃນພັກ, ເຊີດຊູນໍ້າໃຈຮັກຊາດ ຄວາມເປັນເອກະລາດ ເປັນເຈົ້າຕົນເອງ, ສຸມທຸກເຫື່ອແຮງ ແລະ ສະຕິປັນຍາ ເພື່ອເຮັດສຳເລັດໜ້າທີ່ ທີ່ພັກມອບໝາຍໃຫ້;  ສຶກສາອົບຮົມການເມືອງ-ແນວຄິດ ໃຫ້ແກ່ພະນັກງານ; ຍົກສູງວຽກງານກໍ່ສ້າງພັກ-ພະນັກງານ ພ້ອມທັງເປັນເສນາທິການໃຫ້ແກ່ຄະນະພັກຂັ້ນເທິງ; ປັບປຸງແບບແຜນວິທີເຮັດວຽກຄືນໃໝ່ ໃຫ້ໄປຕາມຫລັກການຂອງພັກ;  ເພີ່ມທະວີບົດ ບາດໃນການນຳພາ ບັນດາອົງການຈັດຕັ້ງມະຫາຊົນ, ຖືມະຫາຊົນເປັນກຳລັງແຮງໃນການສຶກສາອົບຮົມ ກໍ່ສ້າງ ແລະ ຂະຫຍາຍພັກ.

(ສອນສັກ ວັນວິໄຊ)