ວັນທີ 13 ມິຖຸນາ 2022. ໜ່ວຍຊາວໜຸ່ມຮາກຖານ ສະພາປະຊາຊົນແຂວງ (ສພຂ) ຈັດກອງປະຊຸມສະຫຼຸບການເຄື່ອນໄຫວວຽກງານ 6 ເດືອນຕົ້ນປີ ແລະ ວາງແຜນທິດທາງ 6 ເດືອນທ້າຍປີ 2022. ທີ່ຫ້ອງປະຊຸມນ້ອຍ ສພຂ, ໂດຍການເຂົ້າຮ່ວມຂອງສະຫາຍ ແຫວນຄຳ ປະທຸມມະແສງ ເລຂາໜ່ວຍພັກ ສພຂ,ມີສະຫາຍ ວິລະພັນ ອິນທະວົງສາ ເລຂາໜ່ວຍຊາວໜຸ່ມຮາກຖານ ສພຂ, ມີຮອງເລຂາ ໜ່ວຍຊາວໜຸ່ມຮາກຖານ ສພຂ ແລະ ສະມາຊິກຊາວໜຸ່ມຮາກຖານ ສພຂ ເຂົ້າຮ່ວມທັງໝົດ 18 ສະຫາຍ.
ກອງປະຊຸມ, ໄດ້ ທົບທວນຄືນກ່ຽວກັບວຽກງານ 4ບຸກ ປະຈໍາປີ2021 ແລະ ທິດທາງແຜນການປີ 2022, ຜ່ານຂໍ້ຕົກລົງ ຄະນະຊາວໜຸ່ມປະຊາຊົນປະຕິວັດລາວ ແຂວງ ສະບັບເລກທີ 59/ຄຊປປລ, ລົງວັນທີ 22 ມີນາ 2022 ວ່າດ້ວຍການລາອອກຈາກການເປັນສະມາຊິກຊາວໜຸ່ມປະຊາຊົນ ປະຕິວັດລາວ ເຊິ່ງມີຈຳນວນ 2 ສະຫາຍ,ຍິງ 1 ສະຫາຍ ຈາກນັ້ນ, ໄດ້ປະເມີນ ແລະ ທາບທາມ ມະຫາຊົນກ້າວໜ້າເພື່ອນຳສະເໜີຄະນະພັກ(ເຂົ້າຮຽນສະໜັບສະໜູນ).
ໃນໂອກາດນີ້, ສະຫາຍ ແຫວນຄຳ ປະທຸມມະແສງ ໄດ້ມີຄຳເຫັນໂອ້ລົມຕໍ່ກອງປະຊຸມ ເຊິ່ງໄດ້ເນັ້ນໃຫ້ໜ່ວຍຊາວໜຸ່ມຮາກຖານ ສພຂ ເພີ່ມທະວີການສຶກສາອົບຮົມການເມືອງ-ແນວຄິດ ໃຫ້ສະມາຊິກຊາວໜຸ່ມ ໂດຍຈັດຕັ້ງການເຊື່ອມຊຶມນິຕິກຳ ຂອງພັກ-ລັດ ແລະ ວຽກງານຊາວໜຸ່ມ ໃຫ້ເປັນປົກກະຕິ ມີເນື້ອໃນເລິກເຊິ່ງຕິດແທດກັບຕົວຈິງ; ໃຫ້ບັນດາສະຫາຍສະມາຊິກຊາວໜຸ່ມ ສພຂ ເປັນເຈົ້າການຈັດຕັ້ງຜັນຂະຫຍາຍບັນດາມະຕິ, ຄຳສັ່ງ, ນິຕິກຳທີ່ກ່ຽວຂ້ອງ ເປັນແຜນການ, ແຜນງານ, ໂຄງການ ພ້ອມທັງຕິດຕາມ, ກວດກາ, ກະຕຸກຊຸກຍູ້ ແລະ ປະເມີນຜົນການຈັດຕັ້ງປະຕິບັດ ແລະ ຂໍທິດຊີ້ນຳຈາກຄະນະພັກ, ໃຫ້ເປັນປົກກະຕິ; ສ້າງຂະບວນການແຂ່ງຂັນ ປະຕິບັດວຽກງານວິຊາສະເພາະ ຕິດພັນກັບຂໍ້ແຂ່ງຂັນຮັກຊາດ ພັດທະນາ ແລະ ຂໍ້ແຂ່ງຂັນ 4 ບຸກ ພ້ອມທັງສະຫຼຸບຖອດຖອນບົດຮຽນເປັນປະຈໍາ; ຝຶກຝົນຫຼໍ່ຫຼອມຕົນເອງ ດ້ວຍການຄົ້ນຄວ້າເຊື່ອມຊຶມ ແລະ ຮໍ່າຮຽນເອົາຄຸນສົມບັດ, ສິນທຳປະຕິວັດ, ເອົາໃຈໃສ່ຫາງສຽງປາກົດການຫຍໍ້ທໍ້ທີ່ເກີດຂຶ້ນໃນຖັນແຖວຊາວໜຸ່ມ ເພື່ອແກ້ໄຂໃຫ້ທັນເວລາ ລວມທັງການປະຕິບັດນະໂຍບາຍດ້ານຕ່າງໆ ແລະ ປົກປ້ອງຜົນປະໂຫຍດອັນຊອບທຳຂອງສະມາຊິກຊາວໜຸ່ມ.
(ພາບ ແລະ ຂ່າວ: ວິນັດ ສພຂ)