ໃນການເຂົ້າຮ່ວມຄັ້ງນີ້, ຄະນະຜູ້ແທນໄດ້ຮ່ວມກັນແລກປ່ຽນຂໍ້ມູນຂ່າວສານ ແລະ ຮຽນຮູ້ກ່ຽວກັບວຽກງານລັດຖະສະພາ ທີ່ນຳໃຊ້ລະບົບເຕັກໂນໂລຊີທັນສະໄໝ ແລະ ນະວັດຕະກຳອັດສະລິຍະ ໃນການປະຕິບັດພາລະບົດບາດດ້ານນິຕິບັນຍັດ, ການສ້າງ ແລະ ປັບປຸງກົດໝາຍ, ການພິຈາລະນາ ແລະ ຮັບຮອງກົດໝາຍຢູ່ໃນກອງປະຊຸມ, ການຮ່າງບົດບັນທຶກລາຍງານຜົນຂອງກອງປະຊຸມ, ການຕັ້ງຄຳຊັກຖາມຕໍ່ລັດຖະບານຢູ່ກອງປະຊຸມ, ການຮັບ ຄົ້ນຄວ້າ ແລະ ແກ້ໄຂຄຳຮ້ອງຂໍຄວາມເປັນທຳ, ການພົວພັນປະສານງານລະຫວ່າງລັດຖະສະພາກັບອົງການປົກຄອງຂັ້ນສູນກາງ ແລະ ທ້ອງ ຖິ່ນ, ການຄຸ້ມຄອງ-ບໍລິຫານ ແລະ ການສະໜອງຂໍ້ມູນຂ່າວສານ ທີ່ນຳໃຊ້ລະບົບຖານຂໍ້ມູນລັດຖະສະພາແບບເປີດ (Open Parliament), ວຽກງານສື່ມວນຊົນທີ່ນຳໃຊ້ຊ່ອງທາງການສື່ສານແບບມວນຊົນ, ວຽກງານຄຸ້ມຄອງ-ພັດທະນາບຸກຄະລາກອນ, ວຽກງານພະລາທິການ, ບໍລິຫານ-ການຄຸ້ມຄອງ, ການເງິນ-ງົບປະມານ ແລະ ອື່ນໆ; ພ້ອມກັນນີ້, ຄະ ນະຜູ້ແທນຍັງໄດ້ເຂົ້າສັງເກດການ ແລະ ທັດສະນະເບິ່ງຕົວຈິງການດຳເນີນກອງປະຊຸມລັດຖະສະພາ, ການເຮັດບົດບັນທຶກລາຍງານກອງປະຊຸມ, ການເກັບຮັກສາ-ວາງສະ ແດງຊັບສົມບັດອັນລ້ຳຄ່າ, ບັນດາຕຶກອາຄານທີ່ເຕັມໄປດ້ວຍສະຖາປັດຕະຍະກຳອັນເກົ່າແກ່ ແລະ ສວຍງາມ, ຫ້ອງສະໝຸດ, ຫໍມູນເຊື້ອ, ຫ້ອງຖ່າຍທຳລາຍການໂທລະພາບຂອງລັດຖະສະພາ, ບັນດາຖານຂໍ້ມູນທາງອອນລາຍ ລວມທັງການນຳໃຊ້ແອັບປລິເຄຊັນ ແລະ ອື່ນໆ.

ໃນໂອກາດເຂົ້າຮ່ວມການເຄື່ອນໄຫວຢ້ຽມຢາມ ແລະ ທັດສະນະສຶກສາຄັ້ງນີ້, ຄະນະຜູ້ແທນສະພາແຫ່ງຊາດລາວ ກໍໄດ້ແລກປ່ຽນຂໍ້ມູນຂ່າວສານກ່ຽວຂ້ອງກັບວຽກງານທີ່ກ່າວມາຂ້າງເທິງ ໂດຍການຍົກໃຫ້ເຫັນການນຳໃຊ້ເຕັກນິກທັນສະໄໝ, ການນຳໃຊ້ພາຫະນະສື່ສານແບບອອນລາຍ ເຂົ້າໃນການປະຕິບັດພາລະບົດບາດຂອງອົງການນິຕິບັນຍັດ, ວຽກງານສື່ມວນຊົນ, ການສະໜອງຂໍ້ມູນຂ່າວສານ ແລະ ວຽກງານການພົວພັນປະສານງານຂອງສະພາແຫ່ງຊາດລາວ; ພ້ອມກັນນີ້, ຍັງໄດ້ຮ່ວມກັນປຶກສາຫາລືຊອກຫາຊ່ອງທາງໃນການຮ່ວມມື, ການສະໜັບສະໜູນ ແລະ ການຊ່ວຍເຫຼືອ ເຊິ່ງກັນ ແລະກັນ ໃນວຽກງານການແລກປ່ຽນ, ການສ້າງລະບົບນຳໃຊ້ຖານຂໍ້ມູນຂ່າວສານຂອງລັດຖະສະພາໃນຕໍ່ໜ້າອີກດ້ວຍ.