ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR


​(ສ​ພ​ຊ) ລະ​ຫວ່າງວັນ​ທີ 14-15 ກໍລະ​ກົດ 2022 ທີ່​ນະ​ຄອນ​ໄກ​ສອນ​ພົມ​ວິ​ຫານ, ແຂວງ​ສະ​ຫວັນ​ນະ​ເຂດ ກຳ​ມາ​ທິ​ການ​ວຽກ​ງານສະ​ມາ​ຊິກ​ສະ​ພາ​ແຫ່ງ​ຊາດ ໄດ້​ຈັດ​ກອງ​ປະ​ຊຸມ​ແລກ​ປ່ຽນ​ບົດ​ຮຽນ​ການ​ເຄື່ອນ​ໄຫວ​ວຽກ​ງານ​ລະ​ຫວ່າງ​ຄະ​ນະ​ສະ​ມາ​ຊິກ​ສະ​ພາ​ແຫ່ງ​ຊາດ​ປະ​ຈຳ​ເຂດ​ເລືອກ​ຕັ້ງ ແລະ ສະ​ພາ​ປະ​ຊາ​ຊົນ​ຂັ້ນ​ແຂວງ (ພາກ​ກາງ ແລະ ໃຕ້) ໂດຍ​ການ​ເປັນ​ປະ​ທານ​​ຂອງ​ທ່ານ ສຸ​ບັນ ສະ​ວະ​ບຸດ ຄະ​ນະ​ປະ​ຈຳ​ສະ​ພາ​ແຫ່ງ​ຊາດ, ປະ​ທານ​ກຳ​ມາ​ທິ​ການ​ວຽກ​ງານ​ສະ​ມາ​ຊິກ​ສະ​ພາ​ແຫ່ງ​ຊາດ, ເຂົ້າ​ຮ່ວມ​ໂດຍ​ທ່ານ ຄຳ​ໃບ ດຳ​ລັດ ຮອງ​ປະ​ທານ​ສະ​ພາ​ແຫ່ງ​ຊາດ ທັງເປັນຜູ້​ຊີ້​ນຳ​ວຽກ​ງານ​ກຳ​ມາ​ທິ​ການ​ວຽກ​ງານ​ສະ​ມາ​ຊິກ​ສະ​ພາ​ແຫ່ງ​ຊາດ, ມີປະ​ທານ-ຮອງ​ປະ​ທານ​ຄະ​ນະ​ສະ​ມາ​ຊິກ​ສະ​ພາ​ແຫ່ງ​ຊາດ​ປະ​ຈຳ​ເຂດ​ເລືອກ​ຕັ້ງ, ສະ​ພາ​ປະ​ຊາ​ຊົນ​ຂັ້ນ​ແຂວງ, ບັນ​ດາ​ທ່ານ​ຫົວ​ໜ້າ​ຄະ​ນະ​ສະ​ມາ​ຊິກ​ສະ​ພາ​ປະ​ຊາ​ຊົນ​ແຂວງ, ປະ​ຈຳ​ເຂດ​ເລືອກ​ຕັ້ງ​ຂັ້ນ​ເມືອງ ແລະ ແຂກ​ທີ່​ຖືກ​ເຊີນ​ເຂົ້າ​ຮ່ວມ.
​ຈຸດ​ປະ​ສົງ​ຂອງ​ກອງ​ປະ​ຊຸມ​​ຄັ້ງ​ນີ້ ​ເພື່ອ​ເປັນ​ການແລກ​ປ່ຽນ, ຖອດ​ຖອນ​ບົດ​ຮຽນ​ເຊິ່ງ​ກັນ ແລະ ກັນ ລະ​ຫວ່າງ​ຄະ​ນະ​ສະ​ມາ​ຊິກ​ສະ​ພາ​ແຫ່ງ​ຊາດ​ປະ​ຈຳ​ເຂດ​ເລືອກ​ຕັ້ງ ແລະ ສະ​ພາ​ປະ​ຊາ​ຊົນ​ຂັ້ນ​ແຂວງ ​ໃນ​ການ​ປະ​ສານ​ສົມ​ທົບ ແລະ ການ​ແກ້​ໄຂວຽກ​ງານ​ຮ່ວມ​ກັນ​ຕາມ​ພາ​ລະ​ບົດ​ບາດ ໃຫ້​ມີ​ຄວາມ​ເປັນ​ເອ​ກະ​ພາບ ແລະ ຄຸນ​ນະ​ພາບ​ດີ​ຂຶ້ນ ແລະ ເພື່ອ​ຍົກ​ສູງ​ຄຸນ​ນະ​ພາບ​ໃນ​ການ​ປະ​ຕິ​ບັດ​ພາ​ລະ​ບົດ​ບາດ, ສິດ ແລະ ໜ້າ​ທີ່​ຂອງ​ກຳ​ມາ​ທິ​ການ​ວຽກ​ງານ​ສະ​ມາ​ຊິກ​ສະ​ພາ​ແຫ່ງ​ຊາດ, ຄະ​ນະ​ສະ​ມາ​ຊິກ​ສະ​ພາ​ແຫ່ງ​ຊາດ ປະ​ຈຳ​ເຂດ​ເລືອກ​ຕັ້ງ ແລະ ສະ​ພາ​ປະ​ຊາ​ຊົນ​ຂັ້ນ​ແຂວງ ​ໃຫ້​ມີ​ປະ​ສິດ​ທິ​ພາບ ແລະ ປະ​ສິດ​ທິ​ຜົນ.
​ ກອງ​ປະ​ຊຸມ​ໄດ້​ຮັບ​ຟັງ​ການ​ສະ​ເໜີ​ບົດ​ກ່ຽວ​ກັບ​ການ​ພົວ​ພັນ​ປະ​ສານ​ງານ​ລະ​ຫວ່າງ​ຄະ​ນະ​ປະ​ຈຳ​ສະ​ພາ​ແຫ່ງ​ຊາດ​ ກັບ​ຄະ​ນະ​ປະ​ຈໍ​າ​ສະ​ພາ​ປະ​ຊາ​ຊົນ​ຂັ້ນ​ແຂວງ; ການ​ສະ​ເໜີ​ບົດ​ກ່ຽວ​ກັບ​ການ​ພົບ​ປະ​ປະ​ຊາ​ຊົນ​ຂອງ​ສະ​ມາ​ຊິ​ກ​ສະ​ພາ​ແຫ່ງ​ຊາດ; ບົດ​ກ່ຽວ​ກັບ​ພາ​ລະ​ບົດ​ບາດ​ຂອງ​ກຳ​ມາ​ທິ​ການ​ວຽກ​ງານ​ສະ​ມາ​ຊິກ​ສະ​ພາ​ແຫ່ງ​ຊາດ ແລະ ຄະ​ນະ​ສະ​ມາ​ຊິກ​ສະ​ພາ​ແຫ່ງ​ຊາດ ແລະ ຄະ​ນະ​ສະ​ມາ​ຊິກ​ສະ​ພາ​ແຫ່ງ​ຊາດປະ​ຈຳ​ເຂດ​ເລືອກ​ຕັ້ງ; ບົດ​ປະ​ກອບ​ຄຳ​ຄິດ​ຄຳ​ເຫັນ​ກ່ຽວ​ກັບ​ວຽກ​ງານ​ຈັດ​ຕັ້ງ​ປະ​ຕິ​ບັດ​ພາ​ລະ​ບົດ​ບາດ, ສິດ ແລະ ໜ້າ​ທີ່​ຂອງ​ສະ​ມາ​ຊິກ​ສະ​ພາ​ແຫ່ງ​ຊາດ​ປະ​ຈຳ​ເຂດ​ເລືອກ​ຕັ້ງ ແລະ ສະ​ພາ​ປະ​ຊາ​ຊົນ​ນະ​ຄອນ​ຫລວງວຽງ​ຈັນ, ສະ​ພາ​ປະ​ຊາ​ຊົນ​ແຂວງ​ສະ​ຫວັນ​ນະ​ເຂດ, ບົດ​ລາຍ​ງານ​ຫຍໍ້​ກ່ຽວ​ກັບ​ການ​ຈັດ​ຕັ້ງ​ເຄື່ອນ​ໄຫວ​ວຽກ​ງານ​ຂອງ​ຄະ​ນະ​ສະ​ມາ​ຊິກ​ສະ​ພາ​ປະ​ຊາ​ຊົນ​ແຂວງ ປະ​ຈຳ​ເຂດ​ເລືອກ​ຕັ້ງ​ເມືອງ​ທ່າ​ພະ​ບາດ ແຂວງບໍ​ລິ​ຄຳ​ໄຊ, ​ເມືອງ​ຕະ​ໂອ້ຍ ​ແຂວງສາ​ລະ​ວັນ ແລະ ​ເມືອງ​ໄຊ​ຊະ​ນະ​ສົມ​ບູນ​​​ ແຂວງ​ຈຳ​ປາ​ສັກ. ຈາກນັ້ນ, ​ຜູ້​ເຂົ້າ​ຮ່ວມກອງ​ປະ​ຊຸມ ​ໄດ້​​ຜັດ​ປ່ຽນກັນ​ປະ​ກອບ​ຄຳ​ຄິດ​ຄຳ​ເຫັນ​ໃສ່​ບົດ​ສະ​ເໜີ​ດັ່ງ​ກ່າວ ແລະ ຮັບ​ຟັງ​ບົດ​ຄຳ​ເຫັນ​ຂອງ​ທ່ານ​ຜູ້​ຕາງ​ໜ້າ​ຈາກ​ຈາກ​ໂຄງ​ການ​ເຮວ​ວີ​ຕັດ.
​ ໂອ​ກາດ​ດັ່ງ​ກ່າວ, ກອງ​ປະ​ຊຸມ​ຍັງ​ໄດ້ຮັບ​ຟັງ​ການ​ໂອ້​ລົມ​ໃຫ້​ທິດ​ຊີ້​ນຳ​ຕໍ່​ກອງ​ປະ​ຊຸມ​​ຈາກທ່ານ ຄຳ​ໃບ ດຳ​ລັດ ເຊິ່ງທ່ານໄດ້​ເນັ້ນໃຫ້​ເອົາ​ໃຈ​ໃສ່​ບາງ​ບັນ​ຫາ​ເປັນ​ຕົ້ນ​ແມ່ນ ​ເພີ່ມທະວີຄວາມເປັນ​ເຈົ້າ​ການ​ແຕ່​ຫົວ​ທີ ໃນການ​ປະສານ​ສົມທົບ​ກັບ​ຄະນະ​ປະ​ຈໍາ​ສະພາ​ປະຊາຊົນ​ຂັ້ນ​ແຂວງໃນ​ການຈັດຕັ້ງການ​ທາ​ບທາມ​ຮ່າງກົດໝາຍຕ່າງໆ ຕາມ​ແຜນການ​ທີ່​ຄະນະ​ປະຈໍ​າສະພາ​ແຫ່ງ​ຊາດ ວາງ​ອອກໃນແຕ່ລະໄລຍະ, ໃຫ້ເປັນປົກກະຕິ ແລະ ຮັບປະກັນປະສິດທິພາບ-ປະສິດທິຜົນສູງຂຶ້ນກວ່າເກົ່າ; ເອົາໃຈໃສ່ປະສານ​ສົມທົບ​ກັບຄະນະ​ປະ​ຈໍາ​ສະພາ​ປະຊາຊົນ​ຂັ້ນ​ແຂວງ ​ແລະ ພາກສ່ວນ​ທີ່​ກ່ຽວຂ້ອງ ​ໃນການ​ກະກຽມ, ​ໂຄສະນາ, ​ເຜີຍ​ແຜ່ ​ແນວທາງ​ນະ​ໂຍບາຍ, ລັດຖະທຳ​ມະນູນ, ກົດໝາຍ​, ມະຕິ​ກອງ​ປະຊຸມ​ສະພາ​ແຫ່ງ​ຊາດ ​ແລະ ສະພາ​ປະຊາຊົນ​ຂັ້ນ​ແຂວງ, ແຜນ​ພັດທະນາ​ເສດຖະກິດ-ສັງຄົມ ​ແລະ ​ແຜນ​ງົບປະມານ​ແຫ່ງ​ລັດ​ຂັ້ນ​ທ້ອງ​ຖິ່ນ ໃນແຕ່ລະໄລຍະ ໃຫ້ປະຊາຊົນບັນດາ​ເຜົ່າ ​​ຮັບ​ຮູ້, ​ເຂົ້າ​ໃຈ ຢ່າງທົ່ວເຖິງ, ເລິກເຊິ່ງຫຼາຍກວ່າເກົ່າ ພ້ອມທັງປຸກລະດົມຄວາມເປັນເຈົ້າການເຂົ້າ​ຮ່ວມ​ຈັດຕັ້ງປະຕິບັດ; ປະສານ​ສົມທົບ​ກັບ​ຄະນະ​ປະ​ຈໍາ​ສະພາ​ປະຊາຊົນ​ຂັ້ນ​ແຂວງ ​ໃນ​ການ​ຄົ້ນຄວ້າ, ປະກອບ​ຄໍາ​ເຫັນ ຕໍ່​ບັນດາ​ຮ່າງ​ນິຕິ​ກໍາ​ທີ່​ສໍາຄັນ​ຂອງ​ທ້ອງ​ຖິ່ນ; ພ້ອມ​ເຂົ້າ​ຮ່ວມການ​ໂຄສະນາ​ເຜີຍ​ແຜ່ ບັນດາ​ນິຕິ​ກໍາ​ ທີ່​ສະພາ​ປະຊາຊົນ​ຂັ້ນ​ແຂວງ, ອົງການ​ປົກຄອງ​ແຂວງ ແລະ ອົງການ​ອື່ນ​ໆທີ່​ກ່ຽວຂ້ອງ ຂອງ​ທ້ອງ​ຖິ່ນ​ຈັດ​ຂຶ້ນ ຢ່າງເປັນປົກກະຕິ; ສືບຕໍ່ປະສານ​ສົມທົບ​ກັບ​ຄະນະ​ປະ​ຈໍາ​ສະພາ​ປະຊາຊົນ​ຂັ້ນ​ແຂວງ ​ເປັນ​ເຈົ້າ​ການ​ແຕ່​ຫົວ​ທີ ​ໃນ​ການ​ເກັບ​ກໍາ​ຂໍ້​ມູນ ຕໍ່​ບັນຫາ​ສຳຄັນ​ຕ່າງໆ ​ເພື່ອ​ເປັນ​ບ່ອນ​ອີງ​ໃນ​ການ​ຊຸກຍູ້, ສົ່ງ​ເສີມ​ພາກສ່ວນ​ກ່ຽວຂ້ອງ​ປະຕິບັດ​ໃຫ້​ຖືກຕ້ອງ ​ແລະ ​ເຮັດ​ໃຫ້ການ​ພິຈາລະນາ​ໃນ​ກອງ​ປະຊຸມ​ສະພາ​ແຫ່ງ​ຊາດ ມີ​ປະສິດທິ​ຜົນສູງ; ເຂົ້າ​ຮ່ວມ, ຄົ້ນຄວ້າ ​ແລ​ະ ກະກຽມ​ເນື້ອ​ໃນ​ຕ່າງໆ ​ເພື່ອ​ປະກອບ​ຄໍາ​ເຫັນ,​ ຕັ້ງ​ຄໍາ​ຊັກ​ຖາມ​ຕໍ່​ບັນດາ​ເນື້ອ​ໃນ ຂອງ​ກອງ​ປະຊຸມ​ສະພາ​ປະຊາຊົນ​ຂັ້ນ​ແຂວງ ​ໂດຍ​ການ​ສະໜອງ​ຂໍ້​ມູນ​ຈາກ​ໝູ່​ຄະນະ ​ແລ​ະ ມອບ​ໝາຍ​ໃຫ້​ຮອງ​ປະທານ ຫຼື ສະມາຊິກສະພາແຫ່ງຊາດ ທ່ານ​ໃດ​ໜຶ່ງ ​ເປັນ​ຕົວ​ແທນ​ໃນ​ການ​ປະກອບຄໍາ​ເຫັນ; ເອົາ​ໃຈ​ໃສ່ເຂົ້າ​ຮ່ວມ​ກັບ​ຄະນະ​ປະ​ຈໍາ​ສະພາ​ປະຊາຊົນ​ຂັ້ນ​ແຂວງ ຕິດຕາມ​ກວດກາ​ບັນດາ​ອົງການ​ລັດ​ຂັ້ນ​ທ້ອງ​ຖິ່ນ​ຂອງ​ຕົນ ​ໃນ​ການຈັດ​ຕັ້ງ​ປະຕິບັດ​ລັດຖະທໍາ​ມະນູນ, ກົດໝາຍ, ມະຕິ​ກອງ​ປະຊຸມ​ສະພາ​​ແຫ່ງ​ຊາດ, ມະຕິກອງ​ປະຊຸມ​ຄະນະ​ປະ​ຈໍາ​ສະພາ​ແຫ່ງ​ຊາດ, ມະຕິກອງ​ປະຊຸມ​ສະພາ​ປະຊາຊົນ​ຂັ້ນ​ແຂວງ, ມະຕິຂອງ​ຄະນະ​ປະ​ຈໍາ​ສະພາ​ປະຊາຊົນ​ຂັ້ນ​ແຂວງ​ ແລະ ບັນດາ​ນິຕິ​ກໍາ​ໃຕ້​ກົດໝາຍ​ຂອງ​ສູນ​ກາງ ​ແລະ ທ້ອງ​ຖິ່ນ ໃຫ້ທົ່ວເຖິງ, ເຂັ້ມຂຸ້ນຂຶ້ນກວ່າເກົ່າ ປະສານ​ສົມທົບ​ກັບ​ຄະນະ​ປະ​ຈໍາ​ສະພາ​ປະຊາຊົນ​ຂັ້ນ​ແຂວງ ຕິດຕາມກວດກາ ການ​ອອກ​ນິຕິ​ກໍາ ​ແລະ ການຈັດ​ຕັ້ງ​ປະຕິບັດ​ວຽກ​ງານ​ຂອງ​ອົງການ​ປົກຄອງ​ທ້ອງ​ຖິ່ນ ​ເພື່ອ​ໃຫ້​ສອດຄ່ອງ​ກັບ​ລັດຖະທໍາ​ມະນູນ, ກົດໝາຍ ​ແລະ ນິຕິ​ກໍາ​ຂອງ​ອົງການ​ລັດ​ຂັ້ນ​ເທິງ; ລາຍ​ຮັບ-ລາຍ​ຈ່າຍ​ງົບປະມານ ຂັ້ນ​ທ້ອງ​ຖິ່ນ ແລະ ເອົາໃຈໃສ່ເຂົ້າ​ຮ່ວມ​ກັບ​ຄະນະ​ປະ​ຈໍາ​ສະພາ​ປະຊາຊົນ​ຂັ້ນ​ແຂວງ ​ໃນ​ການ​ພິຈາລະນາ​ແກ້​ໄຂ​ຄໍາ​ຮ້ອງ​ຂໍ​ຄວາມ​ເປັນ​ທໍາ ຂອງ​ບຸກຄົນ ຫລື ການຈັດ​ຕັ້ງ ໃຫ້ມີຄວາມວ່ອງໄວ, ຄ່ອງແຄ້ວ, ຍຸຕິ​ທໍາ ແລະ ມີປະສິດທິຜົນ.
​ ກອງປະຊຸມຄັ້ງນີ້ ​ໄດ້​ຮັບ​ການ​ສະ​ໜັບ​ສະ​ໜູນ​ທຶນ​ຈາກ​ອົງ​ການ​ເຮ​ວ​ວີ​ຕັດ.
(ພາບ ແລະ ຂ່າວ: ສອນ​ສັກ​ ວັນ​ວິ​ໄຊ)