ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

           (ສພຊ) ໃນໂອກາດເຂົ້າຮ່ວມກອງປະຊຸມພົບປະສອງຝ່າຍ ລາວ-ຫວຽດນາມ ໃນວັນທີ 16 ພຶດສະພາຜ່ານມາ, ທີ່ສະພາແຫ່ງຊາດ ສະຫາຍ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ແຫ່ງ ສປປລາວ ໄດ້ມີຄໍາເຫັນກ່າວເປີດກອງປະຊຸມສໍາມະນາແລກປ່ຽນບົດຮຽນກ່ຽວກັບວຽກງານຂອງສະພາແຫ່ງຊາດວ່າ: ໃນນາມສະພາແຫ່ງຊາດ ແຫ່ງ ສປປລາວ, ມີຄວາມພາກພູມໃຈເປັນຢ່າງຍິ່ງ ທີ່ໄດ້ຈັດກອງປະ ຊຸມສໍາມະນາແລກປ່ຽນບົດຮຽນ ກ່ຽວກັບວຽກງານສະພາແຫ່ງຊາດ ພາຍໃຕ້ຫົວຂໍ້: ກົນໄກ, ນະໂຍບາຍ ເພື່ອຟື້ນຟູ ແລະ ພັດທະນາເສດຖະກິດ-ສັງຄົມ ພາຍຫຼັງການແຜ່ລະບາດຂອງພະຍາດໂຄວິດ-19 ຢູ່ ສປປລາວ ແລະ ສສ. ຫວຽດນາມ ເຊິ່ງຫົວຂໍ້ດັ່ງກ່າວ ມີຄວາມສຳຄັນຍິ່ງ ເພາະທັງ 2 ປະເທດ ລ້ວນແຕ່ໄດ້ຮັບຜົນກະທົບຢ່າງໜັກໜ່ວງ ຈາກການແຜ່ລະບາດຂອງພະຍາດໂຄວິດ-19 ເປັນເວລາ 2 ປີຜ່ານມາ; ການຈັດສໍາມະນາໃນມື້ນີ້, ເປັນການຜັນຂະຫຍາຍ ເນື້ອໃນຈິດໃຈຂອງບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ລະຫວ່າງ ສອງສະພາແຫ່ງຊາດ ແລະ ພິເສດ ແມ່ນໃນທ່າມກາງບັນຍາແຫ່ງການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ ປີ 2022 ຄື: ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ (5/9/1962-5/9/2022) ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລະຫວ່າງ ລາວ-ຫວຽດນາມ (18/7/1977-18/7/2022) ດ້ວຍຮູບການ ແລະ ເນື້ອໃນ ທີ່ແທດຕົວຈິງ.
          ກອງປະຊຸມສໍາມະນາຄັ້ງນີ້ ເປັນໂອກາດທີ່ດີ ໃຫ້ແກ່ ສອງສະພາແຫ່ງຊາດພວກເຮົາ ຈະໄດ້ແລກປ່ຽນບົດຮຽນ ການຈັດຕັ້ງປະຕິບັດພາລະບົດບາດຂອງອົງການນິຕິບັນຍັດ ກ່ຽວກັບວຽກງານນະໂຍບາຍ ແລະ ອອກກົດໝາຍ ແນໃສ່ກະຕຸກຊຸກຍູ້ ການຟື້ນຟູ ແລະ ການພັດທະນາ ເສດຖະກິດ-ສັງຄົມ ແຫ່ງຊາດ ພາຍຫຼັງໄດ້ຮັບຜົນກະທົບຈາກພະຍາດໂຄວິດ-19 ຕາມສະພາບ ແລະ ເງື່ອນໄຂຕົວຈິງຂອງແຕ່ລະປະເທດ.
            ​ບົນຈິດໃຈ ເພື່ອນມິດຍຸທະສາດອັນສະໜິດສະໜົມ, ຮຽກຮ້ອງໃຫ້ບັນດາຜູ້ແທນ ທີ່ເຂົ້າຮ່ວມກອງປະຊຸມສຳມະນາ ທັງຝ່າຍຫວຽດນາມ ແລະ ລາວ ຈົ່ງພ້ອມກັນຕັ້ງໜ້າຄົ້ນຄວ້າລົງເລິກບັນຫາຕ່າງໆ ຢ່າງກົງໄປກົງມາ ດ້ວຍຄວາມຮັບຜິດຊອບສູງ ແນໃສ່ຍົກສູງຄຸນນະພາບ ແລະ ຮັບປະກັນຂໍ້ມູນທີ່ດີ ເພື່ອຕອບສະໜອງກັບຄວາມຮຽກຮ້ອງຕ້ອງການໜ້າທີ່ການເມືອງ ຂອງສອງສະພາແຫ່ງຊາດ ໃນໄລຍະໃໝ່.
​            ເຊື່ອໝັ້ນວ່າ ດ້ວຍການປະກອບສ່ວນຢ່າງຕັ້ງໜ້າ ແລະ ດ້ວຍຄວາມຮັບຜິດຊອບສູງ ຂອງທັງສອງຝ່າຍ, ກອງປະຊຸມສໍາມະນາ ໃນຄັ້ງນີ້ ຈະປະສົບຜົນສໍາເລັດຢ່າງຈົບງາມ.