ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ຕອນເຊົ້າວັນທີ 3 ທັນວາ 2021 ທີ່ຫ້ອງປະຊຸມຄະນະປະຈໍາສະພາແຫ່ງຊາດ, ໄດ້ມີກອງປະຊຸມແລກປ່ຽນບົດຮຽນກ່ຽວກັບການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ໂດຍການເປັນປະທານຮ່ວມຂອງທ່ານ  ໄຊສົມພອນ ພົມວິຫານ ປະທານສະພາແຫ່ງຊາດ ແລະ ທ່ານ ນາງ ປານີ ຢາທໍ່ຕູ້ ຮອງປະທານປະເທດ, ເຂົ້າຮ່ວມມີທ່ານ ອານຸພາບ ຕຸນາລົມ ປະທານສະພາປະຊາຊົນນະຄອນຫລວງວຽງຈັນ, ມີປະທານກຳມາທິການວັດທະນະທຳ-ສັງຄົມ ສະພາແຫ່ງຊາດ, ລັດຖະມົນຕີກະຊວງສາທາລະນະສຸກ ແລະ ພາກສ່ວນທີ່ກ່ຽວຂ້ອງ.

ກອງປະຊຸມຄັ້ງນີ້ ມີຈຸດປະສົງເພື່ອເປັນການປະກອບສ່ວນເຂົ້າໃນການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ປະເທດເຮົາໃຫ້ບັນລຸຄາດໝາຍທີ່ວ່າ: ໃຫ້ມີຜູ້ຕິດເຊື້ອໜ້ອຍທີ່ສຸດ, ເສຍຊີວິດໜ້ອຍທີ່ສຸດ ແລະ ເພື່ອໃຫ້ທຸກຄົນໃນສັງຄົມໄດ້ກັບມາດຳລົງຊີວິດປົກກະຕິ, ເສດຖະກິດ-ສັງຄົມໄດ້ຮັບການຟື້ນຟູກັບສູ່ສະພາບປົກກະຕິໂດຍໄວ. ດັ່ງນັ້ນ, ຄະນະສະເພາະກິດພາຍໃນສະພາແຫ່ງຊາດ ຈຶ່ງໄດ້ເຊີນບັນດາທ່ານການນຳຂັ້ນສູງພັກ-ລັດ ແລະ ບັນດາທ່ານສາສະດາຈານ, ຮອງສາສະດາຈານ, ຜູ້ອາວຸໂສ, ຊ່ຽວຊານ, ນັກວິຊາການຜູ້ທີ່ມີຄວາມຮູ້ ມີປະສົບການທີ່ຊຳນານ ມາລະດົມແນວຄວາມຄິດ, ສະຕິປັນຍາອັນຫລາກຫລາຍ ເພື່ອຊອກຫາທາງອອກ ແລະ ວິທີແກ້ໄຂຮ່ວມກັນ.

ໃນກອງປະຊຸມໄດ້ຮັບຟັງທ່ານ ອູ່ສະຫວັນ ທ່ຽງເທບວົງສາ ຜູ້ອຳນວຍການໂຮງໝໍລາວອາຊຽນ ບັນຍາຍໃນຫົວຂໍ້: ບົດຮຽນການປິ່ນປົວພະຍາດໂຄວິດ-19 ໂດຍສົມທົບແບບແຜນແພດຕາເວັນຕົກ ແລະ ຕາເວັນອອກ; ຮັບຟັງທ່ານ ສຈ. ດຣ. ພອນເທບ ພົນເສນາ ອະດີດປະທານກຳມາທິການວັດທະນະທຳ-ສັງຄົມ ສະພາແຫ່ງຊາດ ບັນຍາຍໃນຫົວຂໍ້: ບົດຮຽນເບື້ອງຕົ້ນ ໃນນາມທີ່ເປັນອາສາສະໜັກລົງໄປປະກອບສ່ວນສະກັດກັ້ນການແຜ່ລະບາດຂອງພະຍາດໂຄວິດ-19 ຢູ່ແຂວງຈຳປາສັກ. ຈາກນັ້ນ, ບັນດາຜູ້ເຂົ້າຮ່ວມ ກໍໄດ້ປະກອບຄຳຄິດຄຳເຫັນ ເພື່ອຊອກຫາວິທີທາງໃນການສະກັດກັ້ນ, ຄວບຄຸມ, ປ້ອງກັນ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ໃຫ້ໄດ້ປະສິດທິພາບ ແລະ ປະສິດທິຜົນສູງສຸດ.

 (ກົງທະນູຄຳ ພິພັດເສລີ)