ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ເພື່ອຍົກສູງຄຸນນະພາບຂອງວຽກງານຂໍ້ມູນ-ຂ່າວສານ ໃຫ້ທັນກັບເຫດການ ໃນຍຸກແຫ່ງເຕັກໂນໂລຊີ ທີ່ທັນສະໄໝ, ໃນຖານະເປັນກະບອກສຽງອັນສຳຄັນ ເພື່ອໂຄສະນາເຜີຍແຜ່ພາລະບົດບາດ, ສິດ ແລະ ໜ້າທີ່ຂອງສະພາ ແຫ່ງຊາດ ແລະ ສະພາປະຊາຊົນແຂວງ ສະໜອງຂໍ້ມູນ-ຂ່າວສານ ໃຫ້ແກ່ສະມາຊິກສະພາແຫ່ງຊາດ, ສະມາຊິກສະພາປະ ຊາຊົນແຂວງ ໂດຍຜ່ານລະບົບການເຂົ້າເວັບໄຊ ແລະ ແອັບພິເຄຊັນ ຂອງສະພາແຫ່ງຊາດ ໃຫ້ເຂົ້າເຖິງສັງຄົມ ກໍຄືປະຊາ ຊົນຢ່າງທົ່ວເຖິງ.
ໃນວັນທີ 4 ເມສາຜ່ານມາ, ກົມສື່ມວນຊົນ ຄະນະເລຂາທິການສະພາແຫ່ງຊາດ ໄດ້ເຄື່ອນໄຫວເຝິກອົບຮົມວຽກງານສື່ມວນຊົນໃນຫົວຂໍ້: ຍຸດທະສາດໃໝ່ແຫ່ງການກະຈາຍຂໍ້ມູນ-ຂ່າວສານຜ່ານລະບົບແອັບພິເຄຊັນ ໃຫ້ແກ່ພະນັກງານ-ວິຊາການ ທີ່ຮັບຜິດຊອບວຽກງານຂໍ້ມູນ-ຂ່າວສານຂອງສະພາປະຊາຊົນແຂວງວຽງຈັນ ນຳໂດຍທ່ານ ບຸນເລີດ ລ້ວນດວງຈັນ ຫົວໜ້າກົມ ພ້ອມດ້ວຍຄະນະ ໂດຍໄດ້ຮັບການຕ້ອນຮັບຈາກທ່ານ ຄຳຫລ້າ ສີສຸວົງ ເລຂາທິການສະພາປະຊາຊົນແຂວງວຽງຈັນ ພ້ອມດ້ວຍຄະນະ.
ໃນໂອກາດນີ້, ຄະນະທີມງານຂອງສະພາແຫ່ງຊາດ ໄດ້ແນະນຳການນຳໃຊ້ເວັບໄຊ-ແອັບພິເຄຊັນຂອງສະພາແຫ່ງຊາດໂດຍພື້ນຖານ ພ້ອມນັ້ນ, ກໍໄດ້ມີການແລກປ່ຽນບົດຮຽນຮ່ວມກັນຢ່າງກົງໄປກົງມາ ກ່ຽວກັບວຽກງານສື່ມວນຊົນ ແລະ ການນໍາໃຊ້ເຄື່ອງມືໃນການເຜີຍແຜ່ຂໍ້ມູນ-ຂ່າວສານຕ່າງໆ ເຮັດໃຫ້ທັງສອງຝ່າຍມີຄວາມເຂົ້າໃຈບັນຫາຕ່າງໆໄດ້ລະອຽດ ແລະ ເລິກເຊິ່ງສົມຄວນ.
(ພາບ ແລະ ຂ່າວ: ນາງ ປາກາລັກ ພົມມີໄຊ)