ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR


ວັນທີ 4 ມີນາ 2022 ນີ້ ແຂວງອັດຕະປື ໄດ້ຈັດພິທີສະເຫຼີມມສະຫຼອງວັນແມ່ຍິງສາກົນ ຄົບຮອບ 112 ປີຄື: ວັນທີ 8 ມີນາ ປີ 1910 ຫາ 8 ມີນາ 2022 ຂື້ນທີ່້ສວນສາທາລະນະຂອງແຂວງ,ເຊິ່ງການສະເຫຼີມສະຫຼອງໃນປີນີ້ ພາຍໃຕ້ຄໍາຂວັນທີ່ວ່າ: ຄວາມສະເໝີພາບຍິງ-ຊາຍໃນມື້ນີ້ ເພື່ອຄວາມຍືນຍົງໃນອານາຄົດ” ໃຫ້ກຽດປາຖະກະຖາຂອງທ່ານນາງ ມີນາພອນ ໄຊສົມພູ ຮອງເລຂາພັກ ປະທານສະພາປະຊາຊົນ​ (ສພຂ)​ ແຂວງອັດຕະປື,ເຂົ້າຮ່ວມຮັບຟັງມີບັນດາຄະນະບໍລິຫານງານສະຫະພັນແມ່ຍິງແຂວງ,ຄະນະໜ່ວຍສະຫະພັນແມ່ຍິງອ້ອມຂ້າງແຂວງ,ພ້ອມດ້ວຍເອື້ອຍນ້ອງແມ່ຍິງອ້ອມຂ້າງແຂວງເຂົ້າຮ່ວມ.

ທ່ານນາງ ມີນາພອນ ໄຊສົມພູ ໄດ້ຍົກໃຫ້ເຫັນ ວັນແມ່ຍິງສາກົນ 8 ມີນາ ແມ່ນເຫດການ ການເມືອງທີ່ສຳຄັນ ເປັນຂີດໝາຍແຫ່ງໄຊຊະນະອັນເປັນພື້ນຖານຂອງຂະບວນການແມ່ຍິງສາກົນ ໃນການຕໍ່ສູ້ທວງເອົາສິດ ຜົນປະໂຫຍດອັນຊອບທຳໃຫ້ແກ່ແມ່ຍິງຊາວຜູ້ອອກແຮງງານໃນທົ່ວໂລກ.ແມ່ນບາດລ້ຽວທາງດ້ານ ປະຫວັດສາດທີ່ສຳຄັນ ແລະ ໃຫຍ່ຫຼວງ ກ້າວສູ່ການປະຕິບັດສິດສະເໝີພາບຍິງ-ຊາຍ,ເປັນການເປີດສັງກາດໃໝ່ ສ້າງເງື່ອນໄຂໃຫ້ແມ່ຍິງໃນທົ່ວໂລກ ກໍ່ຄືແມ່ຍິງລາວບັນດາເຜົ່າ ໄດ້ມີໂອກາດພັດທະນາຕົນເອງຮອບດ້ານຄຽງຄູ່ກັບເພດຊາຍ,ເປີດໂອກາດໃຫ້ແມ່ຍິງ ໄດ້ສະແດງຄວາມສາມາດບົ່ມຊ້ອນຂອງຕົນ ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຄຽງບ່າຄຽງໄລ່ກັບເພດຊາຍ.

ທ່ານນາງ ມີນາພອນ ໄຊສົມພູ ຮອງເລຂາພັກແຂວງ ປະທານ ສພຂ ຍັງໄດ້ຮຽກຮ້ອງໃຫ້ຄະນະບໍລິຫານງານສະຫະພັນແມ່ຍີງອ້ອມຂ້າງແຂວງ ກໍ່ຄືເອື້ອຍນ້ອງຍິງບັນດາເຜົ່າຈົ່ງເພີ່ມທະວີຄວາມສາມັກຄີເປັນປືກແຜນແໜ້ນໜາ,ສືບຕໍ່ຄຽງບ່າຄຽງໄລ່ກັບເພດຊາຍ ຕັ້ງໜ້າເສີມຂະຫຍາຍມູນເຊື້ອຮັກຊາດ,ຮັກລະບອບປະຊາທິໄຕປະຊາຊົນ,ມູນເຊື້ອວັດທະນະທໍາອັນດີງຂາມຂອງຊາດ,ດຸໜັ່ນຂຸດຄົ້ນກຳລັງແຮງສັງລວຂອງແມ່ຍິງ ພ້ອມກັນແຂ່ງຂັນປະຕິບັດຄໍາຂວັນ ຮັກຊາດແລະພັດທະນາ ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ກໍ່ຄືພັດທະນາແຂວງອັດຕະປື ໃຫ້ມີຄວາມຈະເລີນ ຮຸ່ງເຮືອນ.

ການສະເຫຼີມສະຫຼອງວັນແມ່ຍິງສາກົນປີນີ້ ສະຫະພັນແມ່ຍິງອ້ອມຂ້າງແຂວງອັດຕະປື ຍັງໄດ້ຈັດກິດຈະກຳ ເຕັ້ນລີລາລີລາດ 4 ຈັງວະ ແລະ ສ້າງຂະບວນອອກແຮງງານລວມຕາມເດີ່ນສວນສາທາລະນະ,ຕາມເສັ້ນທາງຫຼວງ ຢ່າງເປັນຂະບວນຟົດພື້ນ,ພ້ອມທັງປະຕິບັດມາດຕະການປ້ອງກັນພະຍາດໂຄວິດ 19 ຢ່າງເຂັ້ມງວດ.