ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນໂອກາດເຄື່ອນໄຫວຢ້ຽມຢາມແຂວງຫລວງພະບາງຂອງທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ພ້ອມດ້ວຍຄະນະ ໃນວັນທີ 5 ກຸມພານີ້ ໂດຍການຕ້ອນຮັບຂອງທ່ານ ວົງສະຫວັນ ເທບພະຈັນ ຮອງເລຂາພັກແຂວງ, ປະທານສະພາປະຊາຊົນແຂວງຫລວງພະບາງ.

ໂອກາດດັ່ງກ່າວ ຄະນະ ໄດ້ຮັບຟັງການລາຍງານ ກ່ຽວກັບການກະກຽມຄວາມພ້ອມໃນການເປີດການທ່ອງທ່ຽວ ເພື່ອຕ້ອນຮັບນັກທ່ອງທ່ຽວພາຍໃນ ແລະ ຕ່າງປະເທດ ຂອງແຂວງຫລວງພະບາງ ແລະ ການພັດທະນາແຫລ່ງທ່ອງທ່ຽວນໍ້າຕົກຕາດກວາງຊີ ບ້ານທ່າແປ້ນ ແຂວງຫລວງພະບາງ ຈາກທ່ານ ຈັນສະໝອນ ທິບພະວັນ ຮອງຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຂວງຫລວງພະບາງ ເຊິ່ງທ່ານໄດ້ສະແດງຄວາມຍີນດີ ຕ້ອນຮັບບັນດາທ່ານເຂົ້າສູ່ອຸດທິຍານແຫລ່ງທ່ອງທ່ຽວຕາດກວາງຊີພື້ນທີ່ສີຂຽວອາກາດສົດຊື່ນ ແລະ ໄດ້ລາຍງານໃຫ້ຊາບວ່າ: ໂດຍປະຕິບັດຕາມຂໍ້ຕົກລົງວ່າດ້ວຍການຮັບຮອງເອົາແຜນປະຕິບັດງານຕົວຈິງ ສຳລັບການເປີດເຂດທ່ອງທ່ຽວສີຂຽວເພື່ອການທ່ອງທ່ຽວທີ່ປອດໄພຈາກພະຍາດໂຄວິດ-19 ໃນ ສປປລາວ, ຂອງຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຂັ້ນສູນກາງ, ສະບັບເລກທີ 4887/ສພກ, ລົງວັນທີ 29 ພະຈິກ 2021. ແຂວງຫລວງພະບາງ ແມ່ນໄດ້ຖືກບັນຈຸເຂົ້າໃນແຜນເຂດທ່ອງທ່ຽວສີຂຽວ ເພື່ອການທ່ອງທ່ຽວທີ່ປອດໄພຈາກພະຍາດໂຄວິດ-19 ໃນ ສປປ ລາວ (Green Travel Zone) 1 ໃນ 3 ເຂດ ຂອງໄລຍະທຳອິດ ເລີ່ມແຕ່ວັນທີ 1 ມັງກອນ 2022 ຫາວັນທີ 30 ມີນາ 2022 ເພື່ອຕ້ອນຮັບນັກທ່ອງທ່ຽວພາຍໃນ ແລະ ຕ່າງປະເທດ, ດ້ານການກະກຽມແຂວງຫລວງພະບາງ ໄດ້ເປັນເອກະພາບກຳນົດເອົາເຂດການທ່ອງທ່ຽວສີຂຽວຂອງແຂວງ ຕາມເງື່ອນໄຂທີ່ກຳນົດໄວ້ໃນແຜນຄື: ຫນຶ່ງນະຄອນ ແລະ ຕົວເມືອງມີ: ນະຄອນຫລວງພະບາງ, ເມືອງຈອມເພັດ, ເມືອງປາກອູ ແລະ ເມືອງງອຍ. ລະອຽດມີດັ່ງນີ້:

  1. ນະຄອນ ຫຼວງພະບາງ ປະກອບມີ: ແຫລ່ງທ່ອງທຽວພູສີ, ຫໍພິພິທະພັນແຫ່ງຊາດຫລວງພະບາງ, ວັດຊຽງທອງ, ວັດວາອາຮາມຕ່າງໆ ໃນນະຄອນຫລວງພະບາງ, ຕະຫລາດກາງຄືນ, ບ້ານຫັດຖະກຳຕໍ່າຫູກທໍໄໝ ບ້ານຜານົມ, ບ້ານຊ່າງຄ້ອງ, ສູນຫັດຖະກໍາ ອອກພົບຕົກ, ສູນວິທະຍາຊົນເຜົ່າ, ແຫລ່ງທ່ອງທ່ຽວນໍ້າຕົກຕາດກວາງຊີ, ນໍ້າຕົກຕາດແສ້, ບ້ານລ້ອງເລົ່າ, ສວນນໍ້າດົງ, ການລ່ອງເຮືອຊົມທຳມະຊາດ ອາທິດອັດສະດົງຕາມລໍາແມ່ນໍ້າຂອງ-ນໍ້າຄານ ແລະອື່ນໆ.
  2. ເມືອງຈອມເພັດ ປະກອບມີ: ເສັ້ນທາງທ່ອງທ່ຽວຊຽງແມນ ວັດຫາດສ້ຽວ, ບ້ານຫັດຖະກຳປັ້ນໝໍ້ຫລໍ່ໄຫ ບ້ານຈ່ານເໜືອ ແລະນໍ້າຕົກຕາດຮ້ອຍຄົວ.
  3. ເມືອງປາກອູ ປະກອບມີ: ບ້ານການທ່ອງທ່ຽວແບບອະນຸລັກປະຊາຊົນມີສ່ວນຮ່ວມ ບ້ານຊ່າງໄຫ, ບ້ານປາກອູ ແລະຖໍ້າຕິ່ງ.
  4. ເມືອງງອຍ ປະກອບມີ: ເຂດຫນອງຂຽວ, ບ້ານສົບຮຸນ, ຖໍ້າຜາກວາງ, ຖໍ້າຜາທອກ, ຈຸດຊົມທີວທັດທຳມະຊາດ (ຜາແດງ, ຜາຊົມນາງ…) ແລະ ການລ່ອງເຮືອຊົມທິວທັດທຳມະຊາດຕາມລຳແມ່ນໍ້າອູ.

ສະພາບດ້ານຄວາມພ້ອມ: ການສັກຢາວັກຊີນ: ນະຄອນ ຫລວງພະບາງ ແລະ ເມືອງເປົ້າໝາຍ ກໍໄດ້ຜ່ານຕາມເງື່ອນໄຂທີ່ໄດ້ກຳນົດໄວ້ ຄື: ປະຊາກອນ ຕ້ອງໄດ້ຮັບການສັກຢາວັກຊີນປ້ອງກັນໂຄວິດ-19 ຄົບໂດສ ຢ່າງໜ້ອຍຕ້ອງໄດ້ 70% ຂຶ້ນໄປ; ໃນນີ້ ປະຊາກອນ ນະຄອນ ຫລວງພະບາງ ແມ່ນໄດ້ຮັບວັກຊີນຄົບໂດສ ແລ້ວມີເຖິງ 83% ແລະ ເມືອງອື່ນໆ ທີ່ຢູ່ໃນເປົ້າໝາຍ ກໍຜ່ານຕາມເກນມາດຕະຖານ ທີ່ລັດຖະບານໄດ້ກຳນົດໄວ້.

 

ນອກຈາກນີ້, ບັນດາຫົວໜ່ວຍທຸລະກິດທ່ອງທ່ຽວ ກໍມີຄວາມພ້ອມໃນການຕ້ອນຮັບນັກທ່ອງທ່ຽວ ປະກອບມີ: ທຸລະກິດໂຮງແຮມ 33 ແຫ່ງ, ຮ້ານອາຫານ ແລະ ກິນດື່ມ ມີ 33 ຮ້ານ, ບໍລິສັດທ່ອງທ່ຽວ 30 ບໍລິສັດ, ການບໍລິການລົດຕູ້ນ້ອຍມີ 16 ບໍລິສັດ ໃນນີ້, ມີລົດຕູ້ນ້ອຍບໍລິການທ່ອງທ່ຽວ 463 ຄັນ, ມີເຮືອບໍລິການນຳທ່ຽວ 26 ລຳ, ມີຜູ້ນຳທ່ຽວ 180 ຄົນ ມີ 8 ພາສາ (ພາສາອັງກິດ 65 ຄົນ, ຝຣັ່ງ 24 ຄົນ, ເຢຍລະມັນ 9 ຄົນ, ຈີນ 34 ຄົນ, ໄທ 33 ຄົນ, ອິຕາລີ 4 ຄົນ, ລັດເຊຍ 2 ຄົນ ແລະ ພາສາຍີ່ປຸ່ນ 10 ຄົນ)

ແຫລ່ງທ່ອງທ່ຽວຕາມເຂດເປົ້າໝາຍ ກໍໄດ້ຮັບການປັບປຸງຈຳນວນໜຶ່ງແລ້ວ ປັດຈຸບັນ ພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວແຂວງ ໄດ້ເລັ່ງສຸມໃສ່ການຈັດຕັ້ງປະຕິບັດ ມາດຕະຖານການທ່ອງທ່ຽວປອດໄພ Lao safe ຄື: 5 ມາດຕະຖານ ແລະ 1 ຄຳແນະນຳ ເພື່ອຊຸກຍູ້ໃຫ້ຜູ້ປະກອບການດ້ານການທ່ອງທ່ຽວປະຕິບັດຕາມມາດຕະຖານ ເພື່ອຕ້ອນຮັບນັກທ່ອງທ່ຽວແບບປອດໄພ.

ໃນປີ 2022 ນີ້ ແຫລ່ງທ່ອງທ່ຽວນໍ້າຕົກຕາດກວາງຊີ ໄດ້ຖືກຮັບຮອງໃຫ້ເປັນແຫລ່ງທ່ອງທ່ຽວທີ່ຍືນຍົງຂອງອາຊຽນ. ໃນແຕ່ລະປີ ມີນັກທ່ອງທ່ຽວພາຍໃນ ແລະ ຕ່າງປະເທດ ເຂົ້າມາທ່ຽວຊົມຢ່າງຫລວງຫລາຍ ສະແດງອອກ ໃນເດືອນມັງກອນຜ່ານມາ ມີນັກທ່ອງທ່ຽວເຂົ້າມາທ່ຽວຕາດດັ່ງກ່າວ 22.852 ຄົນ ໃນນັ້ນ, ຕ່າງປະເທດ 20.558 ຄົນ.