(ສພຊ) ເພື່ອປຶກສາຫາລື ແລະ ແລກປ່ຽນຂໍ້ມູນ-ຂ່າວສານທາງດ້ານການຄຸ້ມຄອງລະບົບອາຄານຫໍສະພາແຫ່ງຊາດລາວ-ຫວຽດນາມ; ກວດລະບົບອາຄານຂອງສະພາແຫ່ງຊາດລາວ ເພື່ອຂຶ້ນແຜນການຊ່ວຍເຫລືອທາງດ້ານວິຊາການໃນຂັ້ນຕໍ່ໄປ; ປຶກສາຫາລື ແລະ ແລກປ່ຽນຂໍ້ມູນ-ຂ່າວສານທາງດ້ານການຈັດວາງສະແດງ ຫ້ອງມູນເຊື້ອຂອງສະພາແຫ່ງຊາດລາວ ແລະ ມອບເຄື່ອງຊ່ວຍເຫລືອໃຫ້ແກ່ສະພາແຫ່ງຊາດລາວ ໃນການປ້ອງກັນ ແລະ ຕອບໂຕ້ການແຜ່ບາດຂອງພະຍາດໂຄວິດ-19.
ໃນຕອນບ່າຍຂອງວັນທີ 6 ພຶດສະພາຜ່ານມາ ທີ່ຫ້ອງຮັບແຂກສະພາແຫ່ງຊາດ ສະຫາຍ ນາງ ປິ່ງຄໍາ ລາຊະສິມມາ ກໍາມະການສູນກາງພັກ, ເລຂາທິການສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງສະຫາຍ ຟາມ ດຶກ ທາວ (PHAM DUC THAO) ກົມໃຫຍ່ຄຸ້ມຄອງຫ້ອງວ່າການສະພາແຫ່ງຊາດຫວຽດນາມ ພ້ອມດ້ວຍຄະນະ.
ໂອກາດດັ່ງກ່າວ ສະຫາຍ ນາງ ປິ່ງຄໍາ ລາຊະສິມມາ ໄດ້ກ່າວສະແດງຄວາມຂອບໃຈຕໍ່ສະຫາຍ ຟາມ ດຶກ ທາວ ຫົວໜ້າກົມໃຫຍ່ຄຸ້ມຄອງຫ້ອງວ່າການສະພາແຫ່ງຊາດຫວຽດນາມ ທີ່ໄດ້ສະຫລະເວລາມາຢ້ຽມຢາມ ພ້ອມທັງຝາກຄວາມຢື້ຢາມຖາມຂ່າວ ເຖິງສະຫາຍ ບຸຍ ວັນ ເກືອງ ກຳມະການສູນກາງພັກ, ຫົວໜ້າຫ້ອງວ່າການສະພາແຫ່ງຊາດຫວຽດນາມ ແລະ ຕີລາຄາສູງການມາຢ້ຽມຢາມ ແລະ ເຮັດວຽກ ຢູ່ ສປປລາວ ຂອງຄະນະຜູ້ແທນ ສສ.ຫວຽດນາມ ເຊິ່ງເປັນການສະແດງໃຫ້ເຫັນເຖິງມູນເຊື້ອແຫ່ງຄວາມສາມັກຄີພິເສດ ລາວ-ຫວຽດນາມ, ເປັນການຈັດຕັ້ງຜັນຂະຫຍາຍຜົນການພົບປະທາງໄກ ຂອງສອງປະທານສະພາແຫ່ງຊາດ ລາວ-ຫວຽດນາມ ໃນເດືອນທັນວາ 2021 ທີ່ຜ່ານມາ ແລະ ທັງເປັນການປະກອບສ່ວນໃນການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ປີ 2022 ກໍຄືວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ, ວັນເຊັນສົນທິສັນຍາມິດຕະພາບ ແລະ ການຮ່ວມມື ລະຫວ່າງ ລາວ-ຫວຽດນາມ ຄົບຮອບ 45 ປີ ຢ່າງເປັນຂະບວນຟົດຟື້ນໃນທົ່ວປວງຊົນ ທັງເປັນການຮັດແໜ້ນ ແລະ ເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ກໍຄືການພົວພັນຮ່ວມມື ລະຫວ່າງສອງອົງການນິຕິບັນຍັດ ໃຫ້ເຂົ້າສູ່ລວງເລິກ ແລະ ແຕກດອກອອກຜົນຍິ່ງໆຂຶ້ນ ຫວັງວ່າການພົບປະເຮັດວຽກ ລະຫວ່າງຄະນະກົມຄຸ້ມຄອງຫ້ອງການສະພາແຫ່ງຊາດ ແລະ ຄະນະຮັບຜິດຊອບຫ້ອງວາງສະແດງມູນເຊື້ອ ຂອງສະພາແຫ່ງຊາດລາວ ກັບຄະນະຜູ້ແທນ ຈາກສະພາແຫ່ງຊາດຫວຽດນາມ ຈະເປັນການແລກປ່ຽນ ແລະ ຖອດຖອນບົດຮຽນ ໃນການຍົກລະດັບທາງດ້ານເຕັກນິກວິຊາການກ່ຽວກັບວຽກງານຄຸ້ມຄອງອາຄານ, ລະບົບເຕັກນິກພາຍໃນອາຄານ, ການຈັດວາງສະແດງຫ້ອງມູນເຊື້ອ ແລະ ສືບຕໍ່ໃຫ້ການສະໜັບສະໜູນທາງດ້ານວຽກງານຕ່າງໆທີ່ກ່ຽວຂ້ອງໃຫ້ແກ່ພະນັກງານຂອງສະພາແຫ່ງຊາດລາວ ແລະ ຮັບປະກັນໄດ້ຕໍ່ກັບການຄຸ້ມຄອງນຳໃຊ້ຫໍສະພາແຫ່ງຊາດລາວ ໃຫ້ສົມກັບຂອງຂວັນອັນລ້ຳຄ່າ ທີ່ພັກ, ລັດຖະບານ ແລະ ປະຊາຊົນ ຫວຽດນາມ ມອບໃຫ້ ສປປລາວ.
(ພາບ ແລະ ຂ່າວ: ສອນສັກ ວັນວິໄຊ)