ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນວັນທີ 17 ກຸມພາ 2022 ຢູ່ທີ່ຫ້ອງປະຊຸມສະພາປະຊາຊົນແຂວງໄດ້ເປີດກອງປະຊຸມແລກປ່ຽນບົດຮຽນລະຫວ່າງຄະນະເລຂາທິການສະພາແຫ່ງຊາດກັບຄະນະເລຂາທິການສະພາປະຊາຊົນແຂວງຊຽງຂວາງ ໂດຍການເປັນປະທານຂອງ ທ່ານ ນາງ ປິ່ງຄໍາ ລາຊະສິມມາ ຄະນະປະຈໍາສະພາແຫ່ງຊາດ ເລຂາທິການສະພາແຫ່ງຊາດ ໂດຍການໃຫ້ກຽດເຂົ້າຮ່ວມຂອງ ທ່ານ ນາງ ສົມພອນ ໂສພິລາວັນ ຄະນະປະຈໍາສະພາປະຊາຊົນແຂວງ ຮອງປະທານສະພາປະຊາຊົນແຂວງ, ມີຄະນະເລຂາທິການສະພາປະຊາຊົນແຂວງ, ປະທານ-ຮອງປະທານຄະນະກຳມະການ, ຫົວໜ້າ-ຮອງຫົວໜ້າຂະແໜງແລະພະນັກງານສະພາປະຊາຊົນແຂວງທີ່ຂຶ້ນກັບຄະນະເລຂາທິການເຂົ້າຮ່ວມ.

ໃນທີ່ປະຊຸມທ່ານ ນາງ ສາຍພູເງິນ ອຸດົມສຸກ ຄະນະປະຈໍາສະພາປະຊາຊົນແຂວງເລຂາທິການສະພາປະ ຊາຊົນແຂວງ ໄດ້ຜ່ານບົດລາຍງານຫຍໍ້ຂອງຄະນະເລຂາທິການສະພາປະຊາຊົນແຂວງ ໃນການປະຕິບັດວຽກງານໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າເຊິ່ງຄະນະເລຂາທິການສະພາປະຊາຊົນແຂວງ ໄດ້ເອົາໃຈໃສ່ເຄື່ອນໄຫວວຽກງານຕາມພາລະບົດບາດ, ສິດ ແລະ ໜ້າທີ່ຂອງຕົນຢ່າງຕັ້ງໜ້າ ໂດຍສະເພາະແມ່ນໄດ້ເອົາໃຈໃສ່ສຶກສາອົບຮົມດ້ານການເມືອງ-ແນວຄິດຂອງພະນັກງານສະພາປະຂາຊົນແຂວງ ໄດ້ປະຕິບັດວຽກງານການເປັນເສນາທິການໃຫ້ແກ່ສະພາປະຊາຊົນແຂວງເຊິ່ງໄດ້ອໍານວຍຄວາມສະດວກດ້ານເນື້ອໃນ, ງົບປະມານ ແລະ ອື່ນໆໃນການເຄື່ອນໄຫວວຽກງານຂອງຕົນ.ໃນທີ່ປະຊຸມບັນດາຜູ້ແທນກອງປະຊຸມໄດ້ຜັດປ່ຽນແລກປ່ຽນຄໍາ, ຄໍາເຫັນເຊິ່ງກັນ ແລະ ກັນ ກ່ຽວກັບການຈັດຕັ້ງປະຕິບັດໜ້າທີ່ວຽກງານຂອງຕົນໃນໄລຍະຜ່ານມາເປັນຕົ້ນແມ່ນດ້ານໂຄງປະກອບກົງຈັກການຈັດຕັ້ງຂອງສະພາປະຊາຊົນແຂວງ, ການສ້າງຄວາມເຂັ້ມແຂງໃຫ້ສະມາຊິກສະພາປະຊາຊົນແຂວງ ແລະ ພະນັກງານສະພາປະຊາຊົນແຂວງ, ການຕິດຕາມກາຂອງສະພາປະຊາຊົນແຂວງ ແລະ ອື່ນໆ ເພື່ອຮັບປະການໃນການປະຕິບັດໜ້າທີ່ວຽກງານໃນຕໍ່ໜ້າໃຫ້ມີປະສິດທິຜົນຫຼາຍຂຶ້ນກ່ວາເກົ່າ,

ໃນ​ໂອກາດ​ດັ່ງກ່າວ ທ່ານ ນາງ ປິ່ງ​ຄໍາ​ ລາຊະ​ສິມ​ມາ ​ໄດ້​ມອບ ເຄື່ອງສະມາດບອດ ເພື່ອຮັບໃຊ້ກອງປະຊຸມທາງໄກ, ສໍາມະນາຂອງສະພາປະຊາຊົນແຂວງຊຽງຂວາງ ມູນຄ່າ 130.000.000 ກີບ ພ້ອມ​ທັງ​ແນະ​ນໍາ​​ເຕັກ​ນິກການ​ນໍາ​​ໃຊ້​ອຸປະກອນດັ່ງກ່າວໃຫ້​ແກ່​ພະນັກງານ​ທີ່​ຮັບ​ຜິດ​ຊອບດ້ານ​ໄອ​ທີ​ຂອງ​ສະພາ​ປະຊາຊົນ​ແຂວງ. ທ່ານ ນາງ ສາຍພູເງິນ ອຸດົມສຸກ ໄດ້ສະແດງຄວາມຂອບໃຈມາຍັງສະພາແຫ່ງຊາດ ເວົ້າສະເພາະແມ່ນເລຂາທິການສະພາແຫ່ງຊາດ ທີ່ມີຄວາມເປັນຫ່ວງເປັນໄຍເຫັນໄດ້ເຖິງຄວາມຫຍຸ້ງຍາກ, ຂາດເຂີນອຸປະກອນຮັບໃຊ້ກອງປະຊຸມທາງໄກ ແລະ ທ່ານຍັງໃຫ້ຄໍາໝັ້ນສັນຍາວ່າຈະນໍາເອົາເຄື່ອງສະມາດບອດໄປໝູນໃຊ້ເຂົ້າໃນການປະຕິບັດໜ້າທີ່ວຽກງານໃຫ້ສະດວກຂຶ້ນກ່ວາເກົ່າແລະ ຈະພ້ອມກັນປົກປັກຮັກສາໃຫ້ສາມາດນໍາໃຊ້ເຂົ້າໃນວຽກງານຂອງສະພາໃຫ້ໄດ້ຢ່າງຍາວນານ.

ສະພາປະຊາຊົນແຂວງຊຽງຂວາງ

ຂ່າຍໂດຍ: ນາງ ສຸກສະຫວັນ ອິນທະແສງ