ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ຂ່າວ ເລຂາທິການສະພາປະຊາຊົນແຂວງຫຼວງນໍ້າທາ ຖະແຫຼງຂ່າວກ່ຽວກັບການການດຳເນີນກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງຫຼວງນໍ້າທາ ຊຸດທີ II

​​ຕອນບ່າຍຂອງວັນທີ 29 ກໍລະກົດ 2022 ທ່ານ ມີໄຊ ມີວິໄລ ກຳມະການຄະນະປະຈໍາສະພາປະຊາຊົນແຂວງ, ເລຂາທິການສະພາປະຊາຊົນແຂວງຫຼວງນໍ້າທາຊຸດທີ II ໄດ້ຖະແຫຼງຂ່າວກ່ຽວກັບການການດຳເນີນກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງຫຼວງນໍ້າທາ ຊຸດທີ II ເຊິ່ງກອງປະຊຸມສະໄໝສາມັນ ເທື່ອທ່ີ3 ຂອງສະພາປະຊາຊົນແຂວງຫຼວງນ້ໍາທາ ຊຸດທີ II ຈະໄດ້ໄຂຂຶ້ນຢ່າງເປັນທາງການ ໃນຕອນເຊົ້າຂອງວັນທີ 2 ສິງຫາ 2022 ຢູ່ທີ່ສະໂມສອນແຂວງຫຼວງນໍ້າທາ ໂດຍຈະໃຊ້ເວລາດຳເນີນກອງປະຊຸມເປັນເວລາ 3 ວັນ

ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີII ຄັ້ງນີ້ ຈະໄດ້ສຸມໃສ່ພິຈາລະນາ, ຮັບຮອງບັນດາເນື້ອໃນທີ່ສໍາຄັນ ຄື ພິຈາລະນາ, ຮັບຮອງເອົາວຽກງານບຸກຄະລາກອນຂອງແຂວງ ຕາມການສະເໜີຂອງອົງການປົກຄອງແຂວງ ແລະ ຄະນະປະຈໍາສະພາປະຊາຊົນແຂວງ;ຮັບຟັງບົດລາຍງານໂດຍຫຍໍ້ຂອງທ່ານເຈົ້າແຂວງກ່ຽວກັບຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປະຈໍາຫົກເດືອນຕົ້ນປີ ແລະ ແຜນການຫົກເດືອນທ້າຍປີ 2022 ຂອງແຂວງຫຼວງນໍ້າທາ;ຮັບຟັງບົດລາຍງານ ການຈັດຕັ້ງປະຕິບັດແຜນພັດທະນາເສດຖະກິດ-ສັງ ຄົມ ປະຈໍາຫົກເດືອນຕົ້ນປີ ແລະ ແຜນການປະຈໍາຫົກເດືອນທ້າຍປີ 2022 ຂອງແຂວງຫຼວງນໍ້າທາ;ຮັບຟັງ ບົດລາຍງານ ການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາຫົກເດືອນຕົ້ນປີ ແລະ ແຜນການປະຈໍາຫົກເດືອນທ້າຍປີ 2022 ຂອງແຂວງຫຼວງນໍ້າທາ;ຮັບຟັງ ບົດລາຍງານກ່ຽວກັບການຄຸ້ມຄອງລາຄາສິນຄ້າ ແລະ ການຄຸ້ມຄອງປ້ຳນໍ້າມັນພາຍໃນແຂວງ;ຮັບຟັງການລາຍງານກ່ຽວກັບ ສະພາບການຕ້ານ, ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ-19 ຕິດພັນກັບການຄຸ້ມຄອງ ແລະ ນໍາສົ່ງຄົນຕ່າງປະເທດ ກັບຄືນປະເທດ;ພິຈາລະນາ, ຮັບຮອງ ເອົາບົດລາຍງານກ່ຽວກັບ ການຮ່າງຂໍ້ຕົກລົງຂອງເຈົ້າແຂວງວ່າດ້ວຍ ການຄຸ້ມຄອງນໍ້າ, ຊັບພະຍາກອນນໍ້າ ແລະ ດີນບໍລິເວນແຄມນໍ້າ;ພິຈາລະນາ, ຮັບຮອງ ເອົາບົດລາຍງານກ່ຽວກັບ ການຮ່າງຂໍ້ຕົກລົງຂອງເຈົ້າແຂວງວ່າດ້ວຍ ການຄຸ້ມສິ່ງເສດເຫຼືອ;ຮັບຟັງບົດລາຍງານກ່ຽວກັບ ການເຄື່ອນໄຫວວຽກງານໃນໄລຍະແຕ່ກອງປະຊຸມສະໄໝສາມັນເທື່ອທີ 2 ຫາກອງປະຊຸມສະໄໝສາມັນເທື່ອທີ 3 ແລະ ແຜນການຮອດກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງຊຸດທີ II.

ພ້ອມນັ້ນຍັງໄດ້ເຊີນຊວນບັນດາທ່ານ ພະນັກງານ, ລັດຖະກອນ, ທະຫານ, ຕຳຫຼວດ, ນັກຮຽນ, ນັກສຶກສາ, ປັນຍາຊົນ, ກຳມະກອນ, ຊາວຜູ້ອອກແຮງງານ, ພໍ່ແມ່ພີ່ນ້ອງປະຊາຊົນບັນດາເຜົ່າທຸກຊັ້ນຄົນໃນທົ່ວແຂວງຫຼວງນໍ້າທາ ຈົ່ງຕິດຕາມການດຳເນີນກອງປະຊຸມໃນຄັ້ງນິ້ ແລະ ໃນໄລຍະດຳເນີນກອງປະຊຸມສະພາປະຊາຊົນແຂວງ ເພື່ອຮັບເອົາຄຳຄິດຄຳເຫັນ ແລະ ຄຳສະເໜີໂດຍກົງຈາກປະຊາຊົນ ທີ່ຈະສົ່ງໄປຍັງກອງປະຊຸມ, ບັນດາທ່ານສາມາດໂທລະສັບເຂົ້າຫາສະພາປະຊາຊົນແຂວງຫລວງນ້ຳທາ ທີໝາຍເລກໂທລະສັບ086 312 185.

 ໂດຍ:ອຳພອນ ສີປະເສີດ