(ສພຊ) ໃນໂອກາດທີ່ເດີນທາງມາຢ້ຽມຢາມ ສປປລາວ ຢ່າງເປັນທາງການ, ທ່ານ ປອ. ສຸເມດ ຕັນວິເວດສະກຸນ ເລຂາທິການມູນນິທິໄຊພັດທະນາ ແຫ່ງ ຣາຊະອານາຈັກໄທ ພ້ອມດ້ວຍຄະນະ ໄດ້ເຂົ້າຢ້ຽມຂ່ຳນັບທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປລາວ ໃນວັນທີ 17 ພະຈິກ 2023 ທີ່ຫ້ອງຮັບແຂກຂອງປະທານຄະນະປະຈຳສະພາແຫ່ງຊາດ ໂດຍການເຂົ້າຮ່ວມຂອງທ່ານ ສັນຍາ ປຣະເສີດ ປະທານກຳມາທິການການຕ່າງປະເທດ ສະພາແຫ່ງຊາດ ພ້ອມດ້ວຍທ່ານຮອງປະທານກຳມາທິການ, ຮອງເລຂາທິການສະພາແຫ່ງຊາດ, ບັນດາທ່ານຫົວໜ້າກົມ ແລະ ພາກສ່ວນກ່ຽວຂ້ອງ.

ໃນໂອກາດນີ້, ທ່ານ ປອ. ໄຊສົມພອນ ພົມວິຫານ ໄດ້ສະແດງຄວາມຍິນດີຕ້ອນຮັບທ່ານ ປອ. ສຸເມດ ຕັນວິເວດສະກຸນ ພ້ອມດ້ວຍຄະນະ ທີ່ໄດ້ມາຢ້ຽມຢາມ ສປປລາວ ໃນຄັ້ງນີ້ ທັງຕີລາຄາສູງຕໍ່ການຮ່ວມມືທີ່ເປັນມູນເຊື້ອຂອງສອງປະເທດລາວ-ໄທ ທີ່ມີມາແຕ່ດົນນານ; ພ້ອມນີ້, ທ່ານປະທານໄດ້ສະເໜີໃຫ້ສອງປະເທດມີການຮ່ວມມື ເຊິ່ງກັນແລະ ກັນ ໃນຂົງເຂດວຽກງານຕ່າງໆ ໂດຍສະເພາະແມ່ນການທ່ອງທ່ຽວເຫັນວ່າ ປະຊາຊົນໄທໃຫ້ຄວາມສົນໃຈມາທ່ຽວຊົມ ແລະ ຢ້ຽມຢາມສະຖານທີ່ທ່ອງທ່ຽວຕ່າງໆໃນ ສປປລາວ ຈຶ່ງເຫັນດີໃຫ້ມີການສົ່ງເສີມຕື່ມອີກ ແລະ ຂົງເຂດກະສິກຳ ສະເໜີໃຫ້ມີການສືບຕໍ່ຊ່ວຍເຫຼືອ ສປປລາວ ທາງດ້ານເຕັກນິກວິຊາການຕ່າງໆ ເພື່ອຍົກລະດັບຂີດຄວາມສາມາດຂອງຊາວກະສິກຳລາວ ໃຫ້ມີຄວາມຮູ້, ທັກສະທີ່ເຂັ້ມແຂງຍິ່ງໆຂຶ້ນ ເພື່ອເປັນກຳລັງແຮງໜຶ່ງຊ່ວຍໃນການແກ້ໄຂບັນຫາເສດຖະກິດ ໃນປັດຈຸບັນ.

ໂອກາດດຽວກັນນີ້, ທ່ານ ປອ. ສຸເມດ ຕັນວິເວດສະກຸນ ໄດ້ສະແດງຄວາມດີໃຈ ຕໍ່ການຕ້ອນຮັບອັນອົບອຸ່ນຈາກທ່ານ ປະທານສະພາແຫ່ງຊາດ ແຫ່ງ ສປປລາວ ພ້ອມດ້ວຍຄະນະ ທັງສະແດງຄວາມເຫັນດີເປັນເອກະພາບຕໍ່ຄຳເຫັນຂອງທ່ານ ປະທານສະພາແຫ່ງຊາດ ທັງສະແດງຄວາມຍິນດີໃຫ້ການຮ່ວມມື ແລະ ຊ່ວຍເຫຼືອແກ່ ສປປລາວ ໃນການພົວພັນຮ່ວມມືດ້ານຕ່າງໆ ໂດຍສະເພາະວຽກງານດ້ານກະສິກຳ ໃຫ້ມີບາດກ້າວທີ່ດີ ແລະ ເຂັ້ມແຂງຂຶ້ນເລື້ອຍໆ. ພ້ອມນີ້, ຍັງແຈ້ງໃຫ້ຊາບວ່າ ຄະນະ ຈະໄດ້ເດີນທາງໄປຢ້ຽມຢາມແຂວງຫຼວງພະບາງ ດ້ວຍທາງລົດໄຟ ແລະ ຢ້ຽມຢາມສະຖານທີ່ຕ່າງໆຂອງແຂວງອື່ນໆໃນ ສປປລາວ ອີກດ້ວຍ.