ວັນທີ 25 ມິຖຸນາ 2026 ນີ້, ຢູ່ທີ່ສະໂມສອນເມືອງຊານໄຊ ແຂວງອັດຕະປື, ໄດ້ມີພິທີ ປະກາດໂຄງປະກອບການຈັດຕັ້ງ, ບຸກຄະລະກອນ ແລະມອບ-ຮັບໜ້າທີ່ ລະຫວ່າງ ຫົວໜ້າຄະນະສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງຊຸດທີ IV ແລະ ຫົວໜ້າຄະນະສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງຊຸດທີ V ຢ່າງເປັນທາງການ, ໂດຍການໃຫ້ກຽດເຂົ້າຮ່ວມຂອງ ທ່ານ ນາງ ອ່ອນໃສ ມຽງລາວັນ ກໍາມະການພັກແຂວງ ຮອງປະທານສະພາປະຊາຊົນແຂວງ. ມີທ່ານ ຫັດສະໄນ ສີບຸນເຫຼືອງ ກຳມະການພັກແຂວງ ເລຂາພັກເມືອງຊານໄຊ, ມີບັນດາທ່ານການນໍາຂອງເມືອງ, ສະມາຊິກສະພາປະຊາຊົນຂັ້ນແຂວງປະຈໍາເຂດເລືອກຕັ້ງເມືອງ, ຫົວໜ້າ-ຮອງຫົວໜ້າຫ້ອງການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ. ໃນພິທີຄະນະຈັດຕັ້ງເມືອງຊານໄຊ ໄດ້ຂຶ້ນຜ່ານມະຕິຄະນະປະຈຳສະພາປະຊາຊົນແຂວງ ສະບັບເລກທີ 61/ຄປຈ ລົງວັນທີ 5 ມິຖຸນາ 2026 ວ່າດ້ວຍການຮັບຮອງເອົາໂຄງປະກອບການຈັດຕັ້ງ, ບຸກຄະລາກອນ ສະພາປະຊາຊົນແຂວງ ຊຸດທີ V ປະຈຳເຂດເລືອກຕັ້ງເມືອງຊານໄຊ, ໃນນັ້ນໄດ້ແຕ່ງຕັ້ງ: ທ່ານ ຫັດສະໄນ ສີບຸນເຫືຼອງ ກຳມະການພັກແຂວງ ເລຂາພັກເມືອງຊານໄຊ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງ ເປັນຫົວໜ້າຄະນະ. ທ່ານ ສຽງໃຈ ແກ້ວຄໍາໂກ້ ກຳມະການພັກເມືອງ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງ ເປັນຮອງຫົວໜ້າຄະນະ, ທັງເປັນຫົວໜ້າຫ້ອງການຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງ. ທ່ານ ທອງວັນ ຢວງຢາເຢຍ ຄະນະປະຈໍາພັກເມືອງ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງ ເປັນຄະນະກຳມະການ. ທ່ານ ຄໍາປະດິດ ສີຊານົນ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງ ເປັນຄະນະກຳມະການ. ທ່ານ ນ. ລັດສະໝອນ ວົງໂພສີ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງ ເປັນຄະນະກຳມະການ ແລະ ໄດ້ຜ່ານຂໍ້ຕົກລົງຂອງຫົວໜ້າຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງ ວ່າດ້ວຍການແຕ່ງຕັ້ງ ທ່ານ ຄໍາມູນ ເຮືອງໄຊໝື່ນບຸນ ຮອງປະທານແນວລາວສ້າງຊາດເມືອງ ເປັນຮອງຫົວໜ້າຫ້ອງການສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງ, ແຕ່ງຕັ້ງທ່ານ ວຽງທອງ ແກ້ວບົວພາດ ເປັນຫົວໜ້າໜ່ວຍງານຄົ້ນຄວ້າ-ສັງລວມ ແລະ ທ່ານ ສົມຫວັງ ຜ່ານກະຈ່າຍ ເປັນຫົວໜ້າໜ່ວຍງານບໍລິຫານ-ການເງີນ. ຈາກນັ້ນ, ໃນພິທີກໍໄດ້ມີການລົງນາມເຊັນບົດບັນທຶກມອບ-ຮັບໜ້າທີ່ຢ່າງເປັນທາງການ ລະຫວ່າງ ທ່ານ ບຸນເນັມ ໄຊຍະເສັ້ມ ຫົວໜ້າຄະນະສະມາຊິກສະພາປະຊາຊົນແຂວງ ຊຸດທີ IV ປະຈໍາເຂດເລືອກຕັ້ງເມືອງ(ຜູ້ເກົ່າ) ແລະ ທ່ານ ຫັດສະໄນ ສີບຸນເຫືຼອງ ຫົວໜ້າຄະນະສະມາຊິກສະພາປະຊາຊົນແຂວງ ຊຸດທີ Vປະຈໍາເຂດເລືອກຕັ້ງເມືອງ (ຜູ້ໃໝ່) ໂດຍຊ່ອງໜ້າຮອງປະທານສະພາປະຊາຊົນແຂວງ ແລະ ບັນດາທ່ານຜູ້ເຂົ້າຮ່ວມເປັນສັກຂີພິຍານ.ໃນຕອນທ້າຍຂອງພິທີ, ທ່ານ ນ. ອ່ອນໃສ ມຽງລາວັນ ຍັງໄດ້ໃຫ້ກຽດມີທິດຊີ້ນໍາ ແລະ ໂອ້ລົມຕໍ່ພິທີ ເຊິ່ງທ່ານໄດ້ເນັ້ນໜັກໃຫ້ຜູ້ທີ່ໄດ້ຮັບການແຕ່ງຕັ້ງ ແລະ ຈັດວາງເຂົ້າໃນໂຄງປະກອບກົງຈັກໃໝ່ ຈົ່ງຍົກສູງຄວາມຮັບຜິດຊອບທາງດ້ານການເມືອງ, ເພີ່ມທະວີຄວາມສາມັກຄີພາຍໃນໃຫ້ເປັນປຶກແຜ່ນ, ເອົາໃຈໃສ່ຜັນຂະຫຍາຍມະຕິຕົກລົງຕ່າງໆ ເຂົ້າໃນການປະຕິບັດໜ້າທີ່ວຽກງານຕົວຈິງ ໃຫ້ມີຄວາມເຂັ້ມແຂງ, ໂປ່ງໃສ ແລະ ມີປະສິດທິພາບສູງ ເພື່ອເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນຢ່າງແທ້ຈິງ. (ວິນັດ)