ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສ​ພ​ຊ) ກອງ​ປະ​ຊຸມ​ເຝິກ​ອົບ​ຮົມ​ ການຍົກສູງຂີດຄວາມສາມາດທາງ​ດ້ານທັກສະການລົງພົບປະກັບປະຊາຊົນຜູ້ມີສິດເລືອກຕັ້ງ, ທັກສະການປະກອບຄຳເຫັນ ແລະ ຊັກຖາມ; ການຕິດຕາມກວດກາການປະຕິບັດບັນດາມະຕິຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ແລະ ການຕິດຕາມກວດກາ ການຈັດຕັ້ງແຜນພັດທະນາເສດຖະກິດ-ສັງຄົມໃຫ້ແກ່ສະມາຊິກສະພາແຫ່ງຊາດ ​ຢູ່ 8 ເຂດເລືອກຕັ້ງຄື: ນະຄອນຫຼວງວຽງຈັນ, ແຂວງວຽງຈັນ, ບໍລິຄຳໄຊ, ຄຳມ່ວນ, ສະຫວັນນະເຂດ, ຈຳປາສັກ, ອັດຕະປື ແລະ ເຊກອງ ໄດ້​ຈັດ​ຂຶ້ນ​ທີ່ແຂວງສະຫວັນນະເຂດ ລະຫວ່າງ​ວັນທີ 1-2 ສິງຫາ 2022 ໂດຍ​ການ​ເປັນ​ປະ​ທານ​ຂອງ​ທ່ານ ປອ. ນາງ ສູນ​ທອນ ໄຊ​ຍະ​ຈັກ ຮອງ​ປະ​ທານ​ສະ​ພາ​ແຫ່ງ​ຊາດ, ໂດຍການເຂົ້າ​ຮ່ວມ​ຂອງທ່ານ ກົງ​ແກ້ວ ມີ​ວໍ​ລະ​ຈັກ ປະ​ທານ​ສະ​ພາ​ປະ​ຊາ​ຊົນ​ແຂແຂວງສະ​ຫວັນ​ນະ​ເຂດ, ມີ​ປະ​ທານ-ຮອງ​ປະ​ທານສະພາປະຊາຊົນແຂວງ ແລະ ສະ​ມາ​ຊິກ​ສະ​ພາ​ແຫ່ງ​ຊາຊາດ ທີ່ມາຈາກ 8 ເຂດເລືອກຕັ້ງດັ່ງກ່າວ ຈຳນວນເກືອບ 50 ທ່ານ.
ຈຸດປະສົງຈັດກອງປະຊຸມຄັ້ງນີ້ ແມ່ນເພື່ອຍົກລະດັບຂີດຄວາມສາມາດ ໃຫ້ແກ່ສະມາຊິກສະພາແຫ່ງຊາດ ໃນການປະຕິບັດພາລະບົດບາດ, ສິດ ແລະ ໜ້າທີ່ຂອງຕົນໃຫ້ມີປະສິດທິຜົນ, ມີຄວາມຮັບຮູ້, ຄວາມເຂົ້າໃຈ ກ່ຽວກັບບາງທັກສະທີ່ຈໍາເປັນ ໃນການປະຕິບັດໜ້າທີ່ຕົວຈິງຂອງຕົນ; ພ້ອມທັງເປັນໂອກາດໃຫ້ແກ່ ສະມາຊິກສະພາແຫ່ງຊາດໃນການແລກປ່ຽນ, ສົນທະນາກ່ຽວກັບບາງບົດຮຽນລະຫວ່າງວິທະຍາກອນ, ສະມາຊິກສະພາແຫ່ງຊາດ ແລະ ພະນັກງານທີ່ເປັນເສນາທິການດ້ວຍກັນ ແນໃສ່ການຍົກລະດັບຄວາມຮັບຮູ້ ແລະ ຄວາມສາມາດໃນການປະຕິບັດໜ້າທີ່ ການເມືອງໃຫ້ມີປະສິດທິຜົນດີ.
ໃນກອງປະຊຸມ, ຜູ້ເຂົ້າຮ່ວມໄດ້ຮັບຟັງວິທະຍາກອນຈາກບັນດາກຳມາທິການທີ່ກ່ຽວຂ້ອງຂອງສະພາແຫ່ງຊາດເຊັ່ນ: ປະທານກຳມາທິການວຽກງານສະມາຊິກສະພາແຫ່ງຊາດ ແລະ ຮອງປະທານກຳມາທິການແຜນການ, ການເງິນ ແລະ ການກວດສອບ ທີ່ໄດ້ນຳສະເໜີຫົວຂໍ້: ທັກສະ ການປະກອບຄໍາເຫັນ ແລະ ການຊັກຖາມ; ທັກສະການລົງພົບປະຜູ້ມີສິດເລືອກຕັ້ງ; ການຕິດຕາມກວດກາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ; ການຕິດຕາມກວດກາການຈັດຕັ້ງປະຕິບັດມະຕິຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ. ຈາກນັ້ນ, ບັນດາຜູ້ເຂົ້າຮ່ວມກອງປະຊຸມໄດ້ພ້ອມກັນສົນທະນາ, ແລກປ່ຽນປະກອບຄຳຄິດຄຳເຫັນ ໃນຫົວຂໍ້ຕ່າງໆທີ່ມີຄວາມສົນໃຈ ຢ່າງມີຈຸດສຸມ ກົງໄປກົງມາ ອັນໄດ້ສ້າງໃຫ້ສະມາຊິກສະພາແຫ່ງຊາດ ທີ່ເຂົ້າຮ່ວມສາມາດມີຂໍ້ມູນ ແລະ ບົດຮຽນຕົວຈິງ ໃນການປະຕິບັດໜ້າທີ່ຂອງຕົນ.
ໃນຕອນທ້າຍຂອງກອງປະຊຸມ, ທ່ານ ປອ. ນາງ ສູນທອນ ໄຊຍະຈັກ ໄດ້ສັງລວມຄຳຄິດເຫັນຂອງບັນດາທ່ານຜູ້ແທນທີ່ຫຼາກຫຼາຍ, ອຸດົມສົມບູນ ໂດຍໄດ້ຕີລາຄາວ່າ: ບັນ​ດາ​ຫົວ​ຂໍ້​ທີ່​ນຳ​ສະ​ເໜີ​ໃນ​ການ​ເຝິກ​ອົບ​ຮົມ​ຄັ້ງ​ນີ້ ແມ່ນສອດຄ່ອງກັບສະພາບຄວາມຕ້ອງການຂອງວຽກງານຕົວຈິງຂອງສະພາແຫ່ງຊາດ ກໍຄືຂອງສະມາຊິກສະພາແຫ່ງຊາດຢູ່ເຂດເລືອກຕັ້ງຕ່າງໆ ປະກອບສ່ວນຍົກລະດັບຂີດຄວາມສາມາດຂອງເຂົາເຈົ້າ ເພື່ອນຳໄປໝູນໃຊ້ເຂົ້າໃນການປະຕິບັດໜ້າທີ່ການເມືອງຂອງຕົນ ໃຫ້ມີຜົນສຳເລັດດີຂຶ້ນເລື້ອຍໆ; ກອງປະຊຸມຍັງໄດ້ຮຽກຮ້ອງໃຫ້ຜູ້ແທນທີ່ເຂົ້າຮ່ວມຊຸດເຝິກອົບຮົມ ຈົ່ງນຳເອົາບົດຮຽນທີ່ໄດ້ຈາກການເຝິກອົບຮົມຄັ້ງນີ້ ເຂົ້າໃນການປະຕິບັດໜ້າທີ່ການເມືອງ ຕາມພາລະບົດບາດ, ສິດ ແລະ ໜ້າທີ່ຂອງສະພາແຫ່ງຊາດ ກໍຄືຂອງສະມາຊິກສະພາແຫ່ງຊາດ ໃຫ້ມີຜົນສຳເລັດດີຂຶ້ນເລື້ອຍໆ.

(ພາບ ແລະ ຂ່າວ: ກົງທະນູຄຳ ພິພັດເສລີ)