(ສພຊ) – ວັນທີ 1 ຕຸລານີ້ ທີ່ສະພາແຫ່ງຊາດ, ອະນຸກໍາມະການເຕັກໂນໂລຊີຂໍ້ມູນຂ່າວສານ ແລະ ສື່ມວນຊົນ (ຕຂສມຊ) ໄດ້ຈັດກອງປະຊຸມເຝິກອົບຮົມການນໍາໃຊ້ລະບົບຈັດເກັບ ແລະ ສະໜອງຂໍ້ມູນຮ່ວມກັນ (G-share, G-Drive) ໃຫ້ແກ່ພະນັກງານໃນອະນຸກໍາມະການຕ່າງໆຂອງກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ (AIPA) ຄັ້ງທີ 45 ໂດຍການເປັນປະທານຂອງທ່ານ ຄຳແພງ ວິລະພັນ ປະທານກຳມາທິການກົດໝາຍ, ຫົວໜ້າອະນຸກໍາມະການ ຕຂສມຊ ເຊິ່ງວິທະຍາກອນຈາກສູນບໍລິຫານລັດດິຈິຕອນ, ກະຊວງເຕັກໂນໂລຊີ ແລະ ການສື່ ສານ ໄດ້ສະເໜີບົດຮຽນການນຳໃຊ້ລະບົບການຈັດເກັບ ແລະ ນຳໃຊ້ຂໍ້ມູນຮ່ວມກັນຂອງພາກລັດ, ບົດຮຽນກ່ຽວກັບການຕິດຕັ້ງແອັບພິເຄຊັນ G-share ແລະ G-Drive ຜ່ານທາງໂທລະສັບມືຖືສະມາດໂຟນ ແລະ ແທັບເລັດ; ຈາກນັ້ນ, ຜູ້ເຂົ້າຮ່ວມກໍໄດ້ສົນທະນາແລກປ່ຽນບົດຮຽນ ພ້ອມທັງເຝິກປະຕິບັດຕົວຈິງ.

ການເຝິກອົບຮົມຄັ້ງນີ້ ກໍເພື່ອຈັດຕັ້ງຜັນຂະຫຍາຍແຜນການກະກຽມ ແລະ ຮັບໃຊ້ການເປັນເຈົ້າພາບຈັດກອງປະຊຸມໄອປາ ຄັ້ງທີ 45 ຂອງຄະນະກໍາມະການລະດັບຊາດ ກໍຄືແຜນການຂອງອະນຸກໍາມະການເຕັກໂນໂລຊີຂໍ້ມູນຂ່າວ ສານ ແລະ ສື່ມວນຊົນ ໂດຍສະເພາະວຽກງານການເກັບກໍາ ແລະ ສະໜອງຂໍ້ມູນຮ່ວມກັນລະຫວ່າງອະນຸກໍາມະການຕ່າງໆ ໃຫ້ບັນລຸຜົນສໍາເລັດຕາມແຜນການວາງໄວ້ ທັງເຮັດໃຫ້ບັນດາພະນັກງານຂອງອະນຸກໍາມະການຕ່າງໆ ມີຄວາມເຂົ້າ ໃຈເລິກເຊິ່ງສາມາດສະໜອງຂໍ້ມູນເອກກະສານເຊິ່ງກັນແລະກັນ ມີຄວາມວ່ອງໄວ ແລະ ທັນສະໄໝ.

(ກົງທະນູຄຳ ພິພັດເສລີ)