ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ເພື່ອເຮັດໃຫ້ເປົ້າໝາຍທີ່ເຂົ້າຮ່ວມເຝິກອົບຮົມ ໄດ້ຮຽນຮູ້ທິດສະດີ ແລະ ເຝິກປະຕິບັດຕົວຈິງ ກ່ຽວກັບການເປັນຄູເຝິກທີ່ດີ; ເພື່ອສ້າງໃຫ້ຜູ້ເຂົ້າຮ່ວມເຝິກອົບຮົມມີຄວາມຮັບຮູ້, ມີຄວາມເຂົ້າໃຈຕໍ່ເນື້ອໃນບົດຮຽນ ໂດຍສະເພາະແມ່ນບັນດາຫລັກການ, ວິທີການ ແລະ ບາດກ້າວຂັ້ນຕອນໃນການກຽມພ້ອມເພື່ອເປັນຄູເຝິກ ທັງເຮັດໃຫ້ຜູ້ເຂົ້າຮ່ວມໄດ້ມີໂອກາດສົນທະນາບົດຮຽນຈາກວິທະຍາກອນໃຫ້ຫລາຍ ແລະ ແລກປ່ຽນເຊິ່ງກັນ ແລະ ກັນ ລະຫວ່າງນັກສຳມະນາກອນດ້ວຍກັນ ແລະ ໄດ້ເຝິກປະຕິບັດຕົວຈິງ ຈຶ່ງສາມາດເປັນຄູເຝິກໄດ້ໃນຕໍ່ໜ້າ; ໃນວັນທີ 5 ເມສາຜ່ານມາ ທີ່ເມືອງວັງວຽງ ແຂວງວຽງຈັນ, ສະຖາບັນຄົ້ນຄວ້າສະຕິກຳສະພາແຫ່ງຊາດ (ສນສ) ໄດ້ເປີດຊຸດເຝິກອົບຮົມໃນຫົວຂໍ້: “ການເປັນຄູເຝິກ ໃຫ້ແກ່ພະນັກງານເສນາທິການຂອງ ສນສ ແລະ ພະນັກງານສະພາປະຊາຊົນແຂວງ” ໂດຍການເປັນປະທານຂອງທ່ານ ປອ. ຢ່າງກູ້ ຢ່າງລືໄຊ ຫົວໜ້າ ສນສ; ມີບັນດາທ່ານຮອງຫົວໜ້າ ສນສ, ຫົວໜ້າ-ຮອງຫົວໜ້າສູນ, ຫົວໜ້າ-ຮອງຫົວໜ້າພະແນກ, ນັກວິທະຍາກອນຈາກສະຖາບັນຄົ້ນຄວ້າວິທະຍາສາດການປົກຄອງ ແລະ ເຝິກອົບຮົມ, ພະນັກງານຂອງສະພາປະຊາຊົນແຂວງ ຈາກ 4 ແຂວງຄື: ນະຄອນຫລວງວຽງຈັນ, ໄຊຍະບູລີ, ວຽງຈັນ ແລະ ບໍລິຄຳໄຊ ພ້ອມດ້ວຍພະນັກງານວິຊາການຈາກ ສນສ ເຂົ້າຮ່ວມ.
ໂອກາດນີ້, ທ່ານ ປອ. ຢ່າງກູ້ ຢ່າງລືໄຊ ໄດ້ກ່າວເປີດກອງປະຊຸມວ່າ: ຄະນະຊີ້ນຳລວມການຍົກສູງຂີດຄວາມສາມາດຂອງສະພາແຫ່ງຊາດ ກໍຄືຄະນະສະຖາບັນຄົ້ນຄວ້ານິຕິກໍາ ໄດ້ຖືສຳຄັນວຽກງານສ້າງວິທະຍາກອນ ແລະ ຄູເຝິກ ເຊິ່ງເປັນວຽກງານໜຶ່ງທີ່ມີຄວາມສຳຄັນໃນການຈັດຕັ້ງປະຕິບັດຕາມພາລະບົດບາດ, ໜ້າທີ່ ແລະ ຂອບເຂດສິດຂອງສະຖາບັນ ທັງເປັນແຜນວຽກຈຸດສຸມໜຶ່ງທີ່ໄດ້ກໍານົດໄວ້ໃນແຜນພັດທະນາການຍົກສູງຂີດຄວາມສາມາດໃຫ້ແກ່ສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ແລະ ພະນັກງານທີ່ເປັນເສນາທິການ ໄລຍະ 5 ປີ ກໍຄືແຜນພັດທະນາວຽກງານຂອງ ສນສ ໄລຍະ 5 ປີ (2021-2025). ໃນໄລຍະຜ່ານມາ, ພະນັກງານຫລັກແຫລ່ງຂອງສະຖາບັນຄົ້ນຄວ້ານິຕິກຳສະພາແຫ່ງຊາດ ໄດ້ເຂົ້າຮ່ວມເຝິກອົບຮົມການເປັນຄູເຝິກ ຢູ່ສະພາແຫ່ງຊາດ ສສ.ຫວຽດນາມ ຈຳນວນ 1 ຄັ້ງ ແລະ ຊ່ຽວຊານຈາກສະພາແຫ່ງຊາດ ສສ.ຫວຽດນາມ ກໍໄດ້ມາເຝິກອົບຮົມໃນຫົວຂໍ້ດັ່ງກ່າວ ຢູ່ ສປປລາວ ຈຳນວນ 1 ຄັ້ງ ໂດຍຈັດຂຶ້ນຢູ່ 3 ພາກຄື: ພາກເໜືອ, ພາກກາງ ແລະ ພາກໃຕ້ ເຊິ່ງໄດ້ມີຄວາມຮັບຮູ້ ເຂົ້າໃຈ ແລະ ນໍາໃຊ້ບົດຮຽນດັ່ງກ່າວ ປະກອບສ່ວນຕໍ່ວຽກງານສ້າງວິທະຍາກອນ ແລະ ຄູເຝິກ ເພື່ອຍົກສູງຂີດຄວາມສາມາດໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ດີຂຶ້ນເທື່ອລະກ້າວ. ສໍາລັບກອງປະຊຸມເຝິກອົບຮົມການເປັນຄູເຝິກຄັ້ງນີ້ ເປັນຄັ້ງທຳອິດ ທີ່ໄດ້ເຊີນນັກວິທະຍາກອນຈາກສະຖາບັນຄົ້ນຄວ້າວິທະຍາສາດການປົກຄອງ ແລະ ເຝິກອົບຮົມ ກະຊວງພາຍໃນ ມາເປັນຄູເຝິກ ເພື່ອໃຫ້ຄວາມຮູ້ ແລະ ຖ່າຍທອດບົດຮຽນທີ່ຫລາກຫລາຍ ໃນການສ້າງວິທະຍາກອນ ແລະ ຄູເຝິກ ໃຫ້ແກ່ສະຖາບັນຄົ້ນຄວ້ານິຕິກຳ ໃນການຈັດຕັ້ງປະຕິບັດແຜນພັດທະນາການຍົກສູງຂີດຄວາມສາມາດຂອງສະພາແຫ່ງຊາດ ກໍຄືແຜນພັດທະນາວຽກງານຂອງສະຖາບັນຄົ້ນຄວ້ານິຕິກຳ ໄລຍະ 5 ປີ ໃຫ້ມີຜົນສຳເລັດໃນແຕ່ລະປີ; ພ້ອມນັ້ນ, ທ່ານຍັງໄດ້ຮຽກຮ້ອງບັນດາຜູ້ເຂົ້າຮ່ວມການເຝິກອົບຮົມ ຈົ່ງໄດ້ເຊີດຊູຄວາມຮັບຜິດຊອບ ແລະ ສຸມສະຕິປັນຍາໃນການຮຽນຮູ້, ສົນທະນາ ແລະ ແລກປ່ຽນບົດຮຽນ ຢ່າງກົງໄປກົງມາ ເພື່ອໃຫ້ມີຄວາມສາມາດ ໃນການສືບຕໍ່ຄົ້ນຄວ້າ ແລະ ນຳໄປປະຍຸກໃຊ້ໃຫ້ສອດຄ່ອງກັບສະພາບຄວາມຕ້ອງການຂອງວຽກງານຕົວຈິງ.
ໃນກອງປະຊຸມ, ໄດ້ຮັບຟັງການການນຳສະເໜີບົດຮຽນ 4 ຫົວຂໍ້ຄື: ກ່ຽວກັບແນວຄວາມຄິດຂອງ Training of trainer-TOT ຄວາມໝາຍ, ຄວາມສໍາຄັນ ແລະ ບົດບາດຂອງວິທະຍາກອນ (ການບັນຊາການນຳພາສົນທະນາ, ເຮັດກິດຈະກຳ, ການຄວບຄຸມສັງເກດ, ການເວົ້າ, ກິລິຍາທ່າທາງ, ການແຕ່ງກາຍ, ການນຳໃຊ້ອຸປະກອນ ແລະ ການນຳໃຊ້ແຜນການສອນ); ການສ້າງຄວາມເຊື່ອໝັ້ນສຳລັບວິທະຍາກອນ ແລະ ການກະກຽມຫົວຂໍ້, ແນະນຳຂຶ້ນຫ້ອງສອນ (ການວາງຕົວ, ການສື່ສານ, ການນຳສະເໜີ, ການສ້າງຄວາມສົນໃຈ, ການຄວບຄຸມອາລົມ, ການແກ້ໄຂບັນຫາການນຳສະເໜີ ແລະ ການເວົ້າຈາ); ການຈັດຫ້ອງປະຊຸມ ແລະ ການກະກຽມແຜນການສອນ-ນຳສະເໜີ (ການຈັດຂະໜາດຫ້ອງຮຽນ, ແບ່ງຜູ້ເຝິກອົບຮົມ, ການສ້າງແຜນເຝິກອົບຮົມ, ການພັດທະນາແຜນການສອນ, ການກະກຽມຄວາມພ້ອມສໍາລັບການເຝິກອົບຮົມເຕັກນິກເຝິກອົບຮົມ ແລະ ຫລັກການເວົ້າຂອງວິທະຍາກອນ ແລະ ການຕໍານິທີ່ມີປະສິດທິພາບ; ພ້ອມກັນນັ້ນ, ບັນດາທ່ານຜູ້ເຂົ້າຮ່ວມກອງປະຊຸມ ຍັງຈະໄດ້ຈັດແບ່ງເປັນກຸ່ມ ເພື່ອພ້ອມກັນຄົ້ນຄວ້າ, ສົນທະນາ, ແລກປ່ຽນຄຳເຫັນ ແລະ ບົດຮຽນເຊິ່ງກັນແລະກັນ ເພື່ອສ້າງຄວາມຮັບຮູ້, ເຂົ້າໃຈ ຢ່າງເລິກເຊິ່ງ, ກໍາແໜ້ນເນື້ອໃນບັນຫາທີ່ສຳຄັນ ແລະ ສາມາດນຳໄປເສີມຂະຫຍາຍ, ປະດິດສ້າງ ໃຫ້ເໝາະສົມກັບຄວາມຕ້ອງການໃນການສ້າງວິທະຍາກອນ ແລະ ຄູເຝິກ ຂອງສະຖາບັນຄົ້ນຄວ້ານິຕິກໍາ ກໍຄືບັນດາກົງຈັກການຈັດຕັ້ງຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເພື່ອຊຸກຍູ້ການຈັດຕັ້ງປະຕິບັດແຜນພັດທະນາການຍົກສູງຂີດຄວາມສາມາດ ໃຫ້ແກ່ສະມາຊິກສະພາແຫ່ງຊາດ, ສະມາ ຊິກສະພາປະຊາຊົນຂັ້ນແຂວງ ແລະ ພະນັກງານທີ່ເປັນເສນາທິການ ໃຫ້ມີປະສິດທິຜົນດີຂຶ້ນ.
ກອງປະຊຸມດັ່ງກ່າວ ໄດ້ຮັບການສະຫນັບສະຫນູນດ້ານງົບປະມານຈາກມູນນິທິເອເຊຍ (The Asia Foundation) ແລະ ຄະນະເລຂາທິການສະພາແຫ່ງຊາດ ແລະ ຈະດຳເນີນໄປຈົນເຖິງວັນທີ 8 ເມສາ 2022 ຈຶ່ງຈະສຳເລັດ.
(ພາບ ແລະ ຂ່າວ: ສຸພາວັນ ຫອມສະນິດ)