ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ວັນທີ 12 ກັນຍາ 2022 ນີ້ ສະພາປະຊາຊົນແຂວງຫລວງນໍ້າທາ ໄດ້ລົງເຜີຍແຜ່ເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີII ຢູ່ເມືອງນາແລ ແຂວງຫລວງນໍ້າທາ, ລວມທັງໝົດ 2 ຈຸດຄື; ສະໂມສອນເມືອງ, ບ້ານເລົາ, ນຳໂດຍ ທ່ານ ຈັນທະສຸລິນ ໝັ້ນປະດິດ ຄະນະປະຈຳສະພາປະຊາຊົນແຂວງ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 3 ແຂວງຫຼວງນ້ໍາທາ,ປະທານຄະນະກຳມະການຍຸຕິທຳ ແລະ ປກຊ-ປກສ ພ້ອມດ້ວຍສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງ, ໃຫ້ກຽດເຂົ້າຮ່ວມຮັບຟັງມີ, ຄະນະນຳຂອງເມືອງ, ຄະນະພັກ, ຄະນະບັນຊາສອງກອງບັນຊາການ ປກຊ-ປກສ, ຫົວໜ້າ, ຮອງຫົວໜ້າຫ້ອງການ, , ພະນັກງານລັດຖະກອນອ້ອມຂ້າງແຂວງ, ອຳນາດການປົກຄອງບ້ານ ແລະ ປະຊາຊົນເຂົ້າຮ່ວມ 200 ກວ່າທ່ານ.

​​         ໃນໂອກາດດັ່ງກ່າວໄດ້ຮັບຟັງການເຜີຍແຜ່ເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ກອງປະຊຸມຄັ້ງນີ້; ໄດ້ພິຈາລະນາ ແລະ ຮັບຮອງເອົາຫຼາຍບັນຫາພື້ນຖານສຳຄັນຂອງປະເທດຊາດ ຄື ວຽກງານຂອງລັດຖະບານ; ວຽກງານຂອງໄອຍະການປະຊາຊົນສງສຸດ; ວຽກງານຂອງສະພາແຫ່ງຊາດ; ວຽກງານສ້າງ ແລະ ປັບປຸງກົດໝາຍ; ກອງປະຊຸມ ໄດ້ລົງຄະແນນສຽງຮັບຮອງເອົາມະຕິກອງປະຊຸມສະພາແຫ່ງຊາດ ທັງໝົດ 20 ສະບັບ ດ້ວຍຄະແນນສຽງເຫັນດີຫຼາຍກວ່າເຄິ່ງໜຶ່ງ ຂອງຈໍານວນສະມາຊິກສະພາແຫ່ງຊາດ ສະເລ່ຍຄະແນນສູງສຸດ 99% ແລະ ຕໍ່າສຸດ 79%.ຜົນສໍາເລັດຂອງກອງປະຊຸມຄັ້ງນີ້ ເປັນການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຕົວຈິງ, ແມ່ນຫມາກຜົນແຫ່ງສະຕິປັນຍາ, ການຍົກສູງຄວາມຮັບຜິດຊອບການເມືອງຂອງບັນດາທ່ານສະມາຊິກສະພາແຫ່ງຊາດ, ຄວາມຕັດສິນໃຈ ຂອງລັດຖະບານ, ກະຊວງ, ອົງການທີ່ກ່ຽວຂ້ອງ ທີ່ຈະສືບຕໍ່ພັດທະນາປະເທດຊາດ ໃນສະພາບມີຄວາມຫຍຸ້ງຍາກທາງດ້ານເສດຖະກິດ-ການເງິນໃຫ້ບັນລຸຕາມຄາດຫມາຍທີ່ວາງໄວ້, ນໍາເອົາປະເທດຊາດກ້າວຂຶ້ນຢ່າງບໍ່ຢຸດຢັ້ງ.

ພ້ອມນັ້ນ ໄດ້ຮັບຟັງການເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ3 ຂອງສະພາປະຊາຊົນແຂວງຫຼວງນໍ້າທາ, ກອງປະຊຸມໄດ້ພິຈາລະນາຮັບຮອງເອົາບັນຫາສໍາຄັນຂອງແຂວງດັ່ງນີ້: ຮັບຮອງເອົາ ບົດລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2022 ຂອງແຂວງ; ຮັບຮອງເອົາບົດລາຍງານກ່ຽວກັບ ການຄຸ້ມຄອງລາຄາສິນຄ້າ ແລະ ການຄຸ້ມຄອງປໍ້ານໍ້າມັນພາຍໃນແຂວງກອງປະຊຸມ; ຮັບຮອງເອົາບຸກ​ຄະ​ລາ​ກອນ​ຂອງ​ອົງ​ການ​ປົກ​ຄອງ​ແຂວງ; ຮັບຮອງຂໍ້ຕົກລົງຂອງເຈົ້າແຂວງໆຫຼວງນໍ້າທາ ຈໍານວນ 2 ສະບັບ; ຮັບຮອງເອົາ ບົດລາຍງານກ່ຽວກັບການເຄື່ອນໄຫວວຽກງານໃນໄລຍະແຕ່ກອງປະຊຸມສະໄໝສາມັນເທື່ອທີ 2 ຫາກອງປະຊຸມສະໄໝສາມັນເທື່ອທີ 3 ແລະ ແຜນການຮອດກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງ ຊຸດທີ II;

ຫລັງຈາກນັ້ນ ບັນດາທ່ານທີເຂົ້າຮ່ວມໄດ້ສະເໜີບັນຫາຂໍ້ຂ້ອງໃຈ, ຂໍ້ຫຍຸ້ງຍາກຕ່າງໆ ເພື່ອນຳໄປສະເໜີຕໍ່ພາກສ່ວນທີ່ກ່ຽວຂ້ອງເພື່ອນຳໄປແກ້ໄຂຕາມຄວາມເປັນຈິງ.

ໃນໂອກາດທີ່ສະພາປະຊາຊົນແຂວງຫລວງນໍ້າທາ ລົງເຄື່ອນໄຫວເຜີຍແຜ່ເຜີຍແຜ່ເນື້ອໃນຜົນສຳເລັດກອງປະຊຸມສະໄໝສາມັນເທື່ອທີ3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ນີ້ໄດ້ມອບເງິນຊ່ວຍເຫຼືອຊື້ວັດສະດຸກໍ່ສ້າງສະໂມສອນກອງບັນຊາການທະຫານເມືອງນາແລ ຈຳນວນ 6,000,000 ກີບ, ໃຫ້ກຽດມອບໂດຍ ທ່ານ ທ່ານ ຈັນທະສຸລິນ ໝັ້ນປະດິດ ຄະນະປະຈຳສະພາປະຊາຊົນແຂວງ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 3 ແຂວງຫຼວງນ້ໍາທາ,ປະທານຄະນະກຳມະການຍຸຕິທຳ ແລະ ປກຊ-ປກສ ແລະ ໃຫ້ກຽດມອບໂດຍ ທ່ານ ພັນໂທ ບຸນແພງ ໄຊສົງຄາມ ຫົວໜ້າກອງບັນຊາການທະຫານເມືອງນາແລ.

ຂ່າວ ແລະ ພາບໂດຍ ນາງ ອຳພອນ ສີປະເສີດ