ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ວັນທີ 24-26 ສິງຫາ 2022 ນີ້ ສະພາປະຊາຊົນແຂວງຫລວງນໍ້າທາໄດ້ເຜີຍແຜ່ເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຢູ່ເມືອງສິງ ແລະ  ເມືອງລອງ ແຂວງຫລວງນໍ້າທາ, ເຊິ່ງເມືອງສິງທັງໝົດ 6 ຈຸດຄື ສະໂມສອນເມືອງ, ບ້ານຈຽງມູນ, ບ້ານເອີຫຼ້າ, ບ້ານຕາໝີ, ບ້ານຜີເຢີ, ບ້ານມໍນະ ແລະ ເມືອງລອງ 6 ຈຸດຄື ສະໂມສອນເມືອງ, ບ້ານເຕົ້າໂຮມ, ບ້ານສາລາ, ບ້ານສມປານໃຕ້, ບ້ານປຸ່ງຊາຍ-ຊຽງກົກໃໝ່, ບ້ານຈ່າແກ້ວ, ເຊິ່ງນຳໂດຍ ທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ, ທ່ານ ນາງ ອຸ່ນຫຼ້າ ອ້ຽງລໍລາດ ກຳມະການພັກແຂວງ ຮອງປະທານສະພາປະຊາຊົນແຂວງ, ພ້ອມດ້ວຍສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງສິງ, ເມືອງລອງ, ໃຫ້ກຽດເຂົ້າຮ່ວມຮັບຟັງມີ, ຄະນະນຳຂອງເມືອງ, ຫົວໜ້າ, ຮອງຫົວໜ້າຫ້ອງການ, ອະດີດການນຳຂອງເມືອງ, ອະດີດພະນັກງານປະຕິວັດອາວຸໂສ, ບຳນານ, ພະນັກງານລັດຖະກອນອ້ອມຂ້າງແຂວງ, ຄະນະພັກຮາກຖານກຸ່ມບ້ານ, ນາຍບ້ານ ແລະ ປະຊາຊົນເຂົ້າຮ່ວມ 600 ກວ່າທ່ານ.

​          ໃນໂອກາດດັ່ງກ່າວໄດ້ຮັບຟັງການເຜີຍແຜ່ເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IXໄດ້ພິຈາລະນາ ແລະ ຮັບຮອງເອົາຫຼາຍບັນຫາທີ່ເປັນພື້ນຖານສຳຄັນຂອງປະເທດຊາດ ຄື ວຽກງານຂອງລັດຖະບານ; ວຽກງານຂອງໄອຍະການປະຊາຊົນສງສຸດ; ວຽກງານຂອງສະພາແຫ່ງຊາດ; ວຽກງານສ້າງ ແລະ ປັບປຸງກົດໝາຍ; ກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ໄດ້ລົງຄະແນນສຽງຮັບຮອງເອົາມະຕິກອງປະຊຸມສະພາແຫ່ງຊາດ ທັງໝົດ 20 ສະບັບ ດ້ວຍຄະແນນສຽງເຫັນດີຫຼາຍກວ່າເຄິ່ງໜຶ່ງ ຂອງຈໍານວນສະມາຊິກສະພາແຫ່ງຊາດ ສະເລ່ຍຄະແນນສູງສຸດ 99% ແລະ ຕໍ່າສຸດ 79%.ຜົນສໍາເລັດຂອງກອງປະຊຸມຄັ້ງນີ້ ເປັນການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຕົວຈິງ, ແມ່ນຫມາກຜົນແຫ່ງສະຕິປັນຍາ, ການຍົກສູງຄວາມຮັບຜິດຊອບການເມືອງຂອງບັນດາທ່ານສະມາຊິກສະພາແຫ່ງຊາດ, ຄວາມຕັດສິນໃຈ ຂອງລັດຖະບານ, ກະຊວງ, ອົງການທີ່ກ່ຽວຂ້ອງ ທີ່ຈະສືບຕໍ່ພັດທະນາປະເທດຊາດ ໃນສະພາບມີຄວາມຫຍຸ້ງຍາກທາງດ້ານເສດຖະກິດ-ການເງິນໃຫ້ບັນລຸຕາມຄາດຫມາຍທີ່ວາງໄວ້, ນໍາເອົາປະເທດຊາດກ້າວຂຶ້ນຢ່າງຫນັກແຫນ້ນ.

ພ້ອມນັ້ນໄດ້ຮັບຟັງການເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງຫຼວງນໍ້າທາ ໄດ້ໄຂຂຶ້ນຢ່າງເປັນທາງການ ໃນວັນທີ 2-4 ສິງຫາ 2022 ຢູ່ທີ່ສະໂມສອນຂອງແຂວງ ມີບັນດາທ່ານ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ, ສະມາຊິກສະພາປະຊາຊົນແຂວງ ເຂົ້າຮ່ວມທັງໝົດ 27 ທ່ານ, ຍິງ 7 ທ່ານ.    ກອງປະຊຸມໄດ້ພິຈາລະນາຮັບຮອງເອົາບັນຫາສໍາຄັນດັ່ງນີ້: ບັນຫາທີ 1 ວ່າດ້ວຍການຮັບຮອງເອົາ ບົດລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2022 ຂອງແຂວງ; ບັນຫາທີ 2ວ່າດ້ວຍການຮັບຮອງເອົາບົດລາຍງານກ່ຽວກັບ ການຄຸ້ມຄອງລາຄາສິນຄ້າ ແລະ ການຄຸ້ມຄອງປໍ້ານໍ້າມັນພາຍໃນແຂວງກອງປະຊຸມ; ບັນຫາທີ 3ວ່າດ້ວຍການຮັບຮອງເອົາບຸກ​ຄະ​ລາ​ກອນ​ຂອງ​ອົງ​ການ​ປົກ​ຄອງ​ແຂວງ; ບັນຫາທີ4ວ່າດ້ວຍການຮັບຮອງຂໍ້ຕົກລົງຂອງເຈົ້າແຂວງໆຫຼວງນໍ້າທາ ຈໍານວນ 2 ສະບັບ; ບັນຫາທີ 5ວ່າດ້ວຍການຮັບຮອງເອົາ ບົດລາຍງານກ່ຽວກັບການເຄື່ອນໄຫວວຽກງານໃນໄລຍະແຕ່ກອງປະຊຸມສະໄໝສາມັນເທື່ອທີ 2 ຫາກອງປະຊຸມສະໄໝສາມັນເທື່ອທີ 3 ແລະ ແຜນການຮອດກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງ ຊຸດທີ II;

 

ໃນຕອນທ້າຍ ທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ ໄດ້ມີຄຳເຫັນໂອ້ລົມ ແລະ ເນັ້ນໜັກບາງບັນຫາເປັນຕົ້ນແມ່ນດ້ານການເມືອງ-ແນວຄິດ ຕິດພັນກັບການປັບປຸງການຈັດຕັ້ງຂັ້ນບ້ານ ເອົາໃຈໃສ່ເຮັດວຽກງານການເມືອງ-ແນວຄິດ ໂດຍການນໍາເອົາມະຕິຄໍາສັ່ງ, ລະບຽບກົດໝາຍຕ່າງໆ ເຜີຍແຜ່ເຊື່ອມຊຶມ ໃຫ້ປະຊາຊົນພາຍໃນກຸ່ມບ້ານ ຈົ່ງມີແນວຄິດຫຼັກໝັ້ນ, ອຸ່ນອ່ຽງທຸນທ່ຽງ ເຊື່ອໝັ້ນ ຕໍ່ການຊີ້ນໍາ-ນໍາພາຂອງພັກ, ມີສິຕິລະວັງຕົວ ຕໍ່ທຸກກົນອຸບາຍ ມ້າງເພທໍາລາຍ ຂອງພວກບໍ່ຫວັງດີ, ຮູ້ຈໍາແນກມິດ-ສັດຕູຢ່າງຈະແຈ້ງ, ມີຄວາມສາມັກຄີປອງດອງ ປະກອບສ່ວນຢ່າງຕັ້ງໜ້າ ໃນການປົກປັກຮັກສາ ແລະ ສ້າງສາພັດທະນາສັງຄົມ ໃຫ້ມີຄວາມເປັນລະບຽບຮຽບຮ້ອຍ ແລະ ຈະເລີ່ນກ້າວໜ້າຂຶ້ນເທື່ອລະກ້າວ.ຄຽງຄູ່ກັນນີ້ ກໍໃຫ້ເອົາໃຈໃສ່ປັບປຸງກົງຈັກການຈັດຕັ້ງບ້ານ ແລະ ບຸກຄະລາກອນ ຕິດພັນກັບການປັງປຸງແບບແຜນວິທີການເຮັດວຽກ ໃຫ້ມີຄວາມໜັກແໜ້ນເຂັ້ມແຂງ ເປັນຕົ້ນ: ໜ່ວຍພັກບ້ານ, ອົງການປົກຄອງ, ແນວໂຮມ, ອົງການຈັດຕັ້ງມະຫາຊົນ, ປກສ ບ້ານ, ກອງຫຼອນ ໃຫ້ສາມາດເຄື່ອນໄຫວຕາມພາລະບົດບາດຂອງຕົນ ໃຫ້ໄດ້ຮັບຜົນດີ; ເອົາໃຈໃສ່ວຽກງານສ້າງເສດຖະກິດຄອບຄົວ ເພື່ອແກ້ໄຂຄວາມທຸກຍາກ, ຕິດພັນກັບການສ້າງເສດຖະກິດຄອບຄົວ ເພື່ອແກ້ໄຂຄວາມທຸກຍາກເທື່ອລະກ້າວ, ເພີ່ມທະວີວຽກງານປ້ອງກັນຊາດ-ປ້ອງກັນຄວາມສະຫງົບ, ຍົກສູງສະຕິເຄົາລົບ ແລະ ປະຕິບັດກົດໝາຍໃຫ້ເຂັ້ມງວດ, ຍົກສູງຄວາມສາມັກຄີຂອງທົ່ວປວງຊົນພາຍໃນບ້ານໃຫ້ປຶກແຜ່ນ.

 

 

 

ຂ່າວ ແລະ ພາບ ນາງ ອຳພອນ ສີປະເສີດ